పురుషుల్లో కూడా రొమ్ము క్యాన్సర్, ఈ లక్షణాలు కనిపిస్తే మగవారు అప్రమత్తంగా ఉండాలి

రొమ్ము క్యాన్సర్ ఒక ప్రమాదకరమైన వ్యాధి. సాధారణంగా రొమ్ము క్యాన్సర్ మహిళలకు మాత్రమే వస్తుందనుకుంటారు. అయితే, ఈ తీవ్రమైన వ్యాధి పురుషులకు కూడా రావచ్చు. ఇది మహిళలతో పోలిస్తే పురుషులలో చాలా అరుదుగా ఉంటుంది. పురుషులలో రొమ్ము క్యాన్సర్ చాలా అరుదుగా ఉండటం వల్ల, దీని గురించి అవగాహన తక్కువగా ఉంటుంది. అందువల్ల, పురుషులు తమలో వచ్చే ఏవైనా అసాధారణ మార్పులను ఆలస్యంగా గుర్తించవచ్చు, ఇది చికిత్సను క్లిష్టతరం చేస్తుంది. పురుషుల్లో రొమ్ము క్యాన్సర్ ఉంటే కనిపించే లక్షణాలేంటో ఇప్పుడు తెలుసుకుందాం.

పురుషుల్లో రొమ్ము క్యాన్సర్ అంటే ఏంటి?

క్లీవ్‌ల్యాండ్ క్లినిక్ ప్రకారం, పురుషులలో రొమ్ము క్యాన్సర్ చాలా అరుదు. మొత్తం రొమ్ము క్యాన్సర్ కేసులలో 1 నుంచి 2% మందిలో ఈ క్యాన్సర్ పురుషులలో కనిపిస్తుంది. ఈ వ్యాధి మహిళల్లో ఎక్కువగా కనిపిస్తుంది. పురుషులకు స్త్రీలతో పోలీస్తే రొమ్ము కణజాలం పెరగదు. అయితే, వారికి రొమ్ము నాళాలు ఉంటాయి. దీని కారణంగా, పురుషులకు కూడా రొమ్ము క్యాన్సర్ వచ్చే ప్రమాదం ఉంది. పురుషులలో రెండు రకాల రొమ్ము క్యాన్సర్ ఉన్నాయి. మొదటిది డక్టల్ కార్సినోమా, రెండవది లోబ్యులర్ కార్సినోమా. పురుషుల్లో రొమ్ము క్యాన్సర్ లక్షణాలేంటో చుద్దాం.

రొమ్ములో గడ్డ లేదా గట్టిదనం

ఇది పురుషులలో రొమ్ము క్యాన్సర్ యొక్క అత్యంత సాధారణ లక్షణం. సాధారణంగా ఇది ఛాతీ గోడకు దగ్గరగా, చనుమొన వెనుక లేదా దాని చుట్టూ ఉంటుంది. ఈ ముద్ద సాధారణంగా నొప్పి లేకుండా ఉంటుంది, కానీ కొన్నిసార్లు సున్నితంగా లేదా నొప్పిగా ఉండవచ్చు. ఇది తరచుగా గట్టిగా, స్థిరంగా ఉంటుంది. ఈ లక్షణం తరచుగా కనిపిస్తే నిర్లక్ష్యం చేయవద్దని నిపుణులు సూచిస్తున్నారు.

చనుమొనలో మార్పులు

పురుషుల్లో బ్రెస్ట్ క్యాన్సర్ ఉంటే చనుమొన లోపలికి లాగబడినట్లు కనిపిస్తుంది. చనుమొన నుంచి రక్తం, పసుపు రంగు లేదా ఇతర స్పష్టమైన ద్రవం కారడం వంటి లక్షణాలు కనిపిస్తాయి. ఇది చాలా ఆందోళన కలిగించే లక్షణం. వెంటనే వైద్యుడిని సంప్రదించాలి. చనుమొన చర్మం ఎర్రగా మారడం, పొలుసులు రావడం లేదా పుండు పడటం వంటి లక్షణాలు కూడా కనిపిస్తాయి.

చర్మ మార్పులు

రొమ్ము చర్మం ముడతలు పడటం లేదా గుంతలు పడటం, రొమ్ము చర్మం నారింజ తొక్కలాగా కనిపించడం వంటి లక్షణాలు కనిపిస్తాయి. రొమ్ము ప్రాంతంలో అసాధారణమైన వాపు లేదా ఎరుపు కనిపిస్తుందని నిపుణులు అంటున్నారు. పురుషుల్లో బ్రెస్ట్ క్యాన్సర్ ఉంటే రొమ్ము లేదా చనుమొన ప్రాంతంలో వివరించలేని దురద లేదా దద్దుర్లు ఉంటాయని ఎక్స్‌పర్ట్స్ చెబుతున్నారు. క్యాన్సర్ కణాలు చంకలోని శోషరస కణుపులకు వ్యాపించినట్లయితే, చంకలో గడ్డలు లేదా వాపు కనిపించవచ్చు.

ముఖ్యమైన విషయాలు

* ఈ లక్షణాలు కనిపించినంత మాత్రాన క్యాన్సర్ అని కాదు. కొన్ని ఇతర సాధారణ, ప్రమాదకరం కాని పరిస్థితులు కూడా ఇలాంటి లక్షణాలను కలిగించవచ్చు. ఉదాహరణకుగైనేకోమాస్టియా - పురుషులలో రొమ్ము కణజాలం పెరగడం.

* అయినప్పటికీ, పైన పేర్కొన్న ఏ లక్షణం కనిపించినా, వెంటనే వైద్యుడిని సంప్రదించడం చాలా ముఖ్యం. ముందుగా గుర్తించడం వల్ల పెద్ద ప్రమాదం నుంచి తప్పించుకోవచ్చని నిపుణులు అంటున్నారు.

* పురుషులలో రొమ్ము క్యాన్సర్ సున్నా నుంచి నాలుగు దశల వరకు ఉంటుంది. వ్యాధి తీవ్రంగా ఉంట.. శస్త్రచికిత్స మాత్రమే చికిత్సకు ఏకైక మార్గం కావచ్చు. ఈ వ్యాధికి కీమోథెరపీ, రేడియేషన్, హార్మోన్ థెరపీతో కూడా చికిత్స చేస్తారు.