మహిళలకు సౌభాగ్యం కిట్లు పంపిణీ చేయనున్న టీటీడీ

శ్రావణ మాసం వచ్చేసింది,. వరలక్ష్మీ వ్రతాల సందడి మొదలైంది. ఈ నేపథ్యంలో వరలక్ష్మీ వ్రతం పూజలకు వచ్చే మహిళలకు సౌభాగ్యం పేరుతో కిట్లు అందించాలని తిరుమల తిరుపతి దేవస్థానం నిర్ణయించింది. ఆలయాలలో నిర్వహించే వరలక్ష్మీ వ్రతం పూజలకు హాజరయ్యే మహిళా భక్తులకు హిందూ ధర్మప్రచార పరిషత్, తిరుమల తిరుపతి దేవస్థానం ఆధ్వర్యంలో ఈ సౌభాగ్యం కిట్లు అందించనున్నారు. ఆంధ్రప్రదేశ్, తెలంగాణ రాష్ట్రాల్లో టీటీడీ ఆధ్వర్యంలో నడుస్తున్న 51 ఆలయాలలో ఈ సౌభాగ్యం కిట్లు పంపిణీ చేయనున్నారు.

ఉమ్మడి కడప జిల్లాలోని టీటీడీ విలీన ఆలయాలలో ఆగస్ట్ 8వ తేదీన సౌభాగ్యం పేరుతో సుమంగళి ద్రవ్యాల కిట్లు పంపిణీ చేయాలని నిర్ణయించారు. అందుకు అనుగుణంగా ఏర్పాట్లు చేయాలని టీటీడీ ఉన్నతాధికారుల నుంచి ఆదేశాలు వచ్చాయి. సౌభాగ్యం పేరుతో అందించే ఈ సుమంగళి ద్రవ్యాల కిట్‌లో పసుపుకొమ్ము, కుంకుమ పొట్లం, రెండు కంకణాలు, అర డజను గాజులు, ఒక పసుపు ధారం ఉంటాయి.

తిరుమల తిరుపతి దేవస్థానం నిర్ణయం నేపథ్యంలో ఒంటిమిట్ట కోదండ రామాలయానికి 4000 సౌభాగ్యం కిట్లు అందించారు. అలాగే దేవుని కడపలోని లక్ష్మీ వేంకటేశ్వరస్వామి ఆలయానికి 4000, జమ్మలమడుగు నారాపుర వేంకటేశ్వరస్వామి ఆలయానికి 2 వేలు, నందలూరు సౌమ్యనాథస్వామి ఆలయం, తాళ్లపాకలోని ఆలయాలకు 2 వేలు చొప్పున టీటీడీ సౌభాగ్యం కిట్లను పంపింది. ఆయా ఆలయాలలో వరలక్ష్మీ వ్రతం పూజల అనంతరం మహిళలకు ఈ సౌభాగ్యం కిట్లు పంపిణీ చేస్తారు. సౌభాగ్యం కిట్లతో పాటుగా మహాలక్ష్మీ చతుర్వింశతి నామావళిః మంత్ర పత్రాన్ని కూడా అందజేయనున్నారు.

మరోవైపు శ్రావణ మాసం నేపథ్యంలో ఆలయాలు కిటకిటలాడుతున్నాయి. శుభకార్యాలకు మంచి ముహర్తాలు ఉండటంతో పాటుగా ఆగస్ట్ నెలలో పలు పర్వదినాలు కూడా వచ్చాయి. వివాహాలు, వరలక్ష్మీ వ్రతాలు, వినాయక చవితి పండుగ, శ్రీకృష్ణాష్టమి పర్వదినం , రాఖీ పౌర్ణమి వంటి పండుగలు ఈ నెలలోనే రావటంతో ఆలయాల వద్ద భక్తుల సందడి ఉండే అవకాశం ఉంది.

కార్వేటి నగరంలో తెప్పోత్సవాలు

మరోవైపు కార్వేటినగరం వేణుగోపాలస్వామి ఆలయంలో తెప్పోత్సవాలు నిర్వహించనున్నారు. ఆగ‌స్టు 6 నుంచి 8వ తేదీ వరకూ మూడు రోజుల పాటు కార్వేటినగరం వేణుగోపాలస్వామి ఆలయంలో తెప్పోత్సవాలు నిర్వహించనున్నారు. ఈ సందర్భంగా స్వామివారు తెప్పలపై విహరించి భక్తులకు అభయప్రదానం చేస్తారు. అలాగే ఈ మూడు రోజులు ఉద‌యం 9.30 నుంచి 10.30 గంట‌ల వ‌ర‌కు స్నపన తిరుమంజ‌నం, సాయంత్రం తిరువీధి ఉత్సవం నిర్వహిస్తారు.