ఏపీ సిఎం జ‌గ‌న్ ను క‌లిసిన ఫ్రాన్స్‌ పారిశ్రామిక వేత్తల బృందం

రెండు రోజుల పర్యటన కోసం రాష్ట్రానికి వచ్చిన ఫ్రాన్స్‌ పారిశ్రామిక వేత్తల బృందం తాడేపల్లిలోని క్యాంప్‌ కార్యాలయంలో గురువారం ముఖ్యమంత్రి వైయస్‌ జగన్‌మోహన్‌రెడ్డిని కలిసింది. ఆంధ్రప్రదేశ్‌ ఆర్ధిక అభివృద్ధి మండలి (ఈడీబీ) ఆధ్వర్యంలో ఫ్రాన్స్‌కు చెందిన పరిశ్రమలు, వాణిజ్య ప్రతినిధుల సమాఖ్య (మెడెఫ్‌) సభ్యులు రాష్ట్రానికి వచ్చారు. 39 సంస్థల తరపున ఈ ప్రతినిధులు రాష్ట్రంలో పర్యటిస్తుండగా, వారికి మెడెఫ్‌ చైర్మన్‌ జాఫ్రీ రౌక్స్‌ డీ బెజియెక్స్‌ నేతృత్వం వహిస్తున్నారు. సీఎం వైయస్‌ జగన్‌ను గురువారం కలిసిన ఫ్రెంచ్‌ పరిశ్రమల ప్రతినిధులు రాష్ట్రంలో పట్టణ మౌలిక వసతులు, స్మార్ట్‌ సిటీ, పట్టణాభివృద్ధి, ఆటోమొబైల్, సౌర, ఇంధన పునరుత్పాదకత తదితర రంగాలలో పెట్టుబడికి ఆసక్తి కనబర్చారు. దీన్ని స్వాగతించిన ముఖ్యమంత్రి వైయస్‌ జగన్, రైతులకు మేలు జరగడంతో పాటు, వారి ఆదాయం పెరిగేలా పాడి, మాంసం, పండ్లు ఫలాలు, కూరగాయల వంటి రంగాలపైనా దృష్టి పెట్టాలని కోరారు. వీటితో పాటు ప్రభుత్వ ప్రైవేటు భాగస్వామ్యం (పీపీపీ)లో మౌలిక వసతుల కల్పన ప్రాజెక్టులను గుర్తించాలని.. ముఖ్యంగా మురుగునీటి పారిశుద్ధ్యం, చెత్త రీసైకిల్‌ వంటి వాటిపై దృష్టి పెట్టాలని సూచించారు. పౌరులకు మరింత మెరుగైన సేవలందించే స్మార్ట్‌ ఎనర్జీ విధానం, స్మార్ట్‌ సిటీ పరిపాలన ప్రభుత్వ ప్రాధాన్యాల్లో కీలకమని ముఖ్యమంత్రి వైయస్‌ జగన్‌ వెల్లడించారు. వీటిపైనా కలిసి రావాలని ఆయన ఫ్రెంచ్‌ బృందాన్ని కోరారు. రాష్ట్ర ప్రభుత్వంతో దీర్ఘకాల భాగస్వామ్య ఒప్పందానికి తాము సానుకూలంగా ఉన్నామని ఫ్రెంచ్‌ బృందానికి నేతృత్వం వహిస్తున్న మెడెఫ్‌ చైర్మన్‌ జాఫ్రీ రౌక్స్‌ డీ బెజియెక్స్‌ తెలిపారు.

తొలి రోజు పర్యటనలో బుధవారం మధ్యాహ్నం ఈ బృందంతో భేటీ అయిన మంత్రులు బుగ్గన రాజేంద్రనాథ్‌రెడ్డి, కురసాల కన్నబాబు, బాలినేని శ్రీనివాసరెడ్డి రాష్ట్రంలో పెట్టుబడులకు ఉన్న అవకాశాలను వివరించారు. ఫ్రెంచ్‌ ప్రతినిధులు లేవనెత్తిన పలు సందేహాలకు మంత్రి బుగ్గన రాజేంద్రనాథ్‌రెడ్డితో పాటు, ముఖ్యమంత్రి అదనపు ప్రధాన కార్యదర్శి డాక్టర్‌ పీ.వీ.రమేష్‌ సమాధానం చెప్పారు. వారి సందేహాలన్నీ ఇద్దరూ నివృత్తి చేశారు.