జిల్లాల అయోమయానికి సాయిరెడ్డి ప్రకటన ఆజ్యం
Andhra Pradesh Telugu | Suryaa Desk | Published : Sun, Dec 22, 2019, 07:58 PM
ఏపీలో మూడు రాజధానుల రభస కొనసాగుతుంటే మరోవైపు విశాఖలో నిన్న ఎంపీ విజయ సాయిరెడ్డి 25 జిల్లాలు ఏర్పాటు చేయాలనే ఆలోచనలో ఉన్నట్టు ప్రకటించి అగ్నికి ఆజ్యం పోసారు. ఇప్పటికే జిల్లాలు పార్లమెంటు నియోజకవర్గాలను కేంద్రాలుగా ఎంపిక చేస్తామని ప్రకటించిన ప్రభుత్వపెద్దలు దూరాభారాలను లెక్కలోకి తీసుకుని మరిన్ని జిల్లాలను ఏర్పాటు చేస్తామని చెప్పినా, ఆపై ఈ ఊసే లేకుండా పోయింది.
తాజాగా విజయసాయిరెడ్డి చేసిన ప్రకటనతో జిల్లాలు 25కే పరిమితం కాబోతున్నాయన్నది స్పష్టమైంది. అదే జరిగితే నేరుగా పార్లమెంటు నియోజకవర్గ కేంద్రాలకు వెళ్లేందుకు రవాణ సౌకర్యాలు లేని ప్రాంతాలు చాలానే ఉన్నాయి. ఇందుకు అరకు పార్లమెంటు స్థానం తీసుకుంటే... నియోజకవర్గ కేంద్రం ప్రస్తుతం విశాఖ జిల్లాలలో ఉన్నప్పటికీ పార్లమెంటు సభ్యురాలిని కలవాలంటే రెండు జిల్లాలు దాటి రెండొందల పైచిలుకు కిలోమీటర్లు ప్రయాణించాల్సి వస్తోంది. ఈ నేపథ్యంలో గిరిజన జిల్లా ప్రతిపాదన చేసినా, అది హుళక్కే అనిపిస్తోంది. మూడు రాజధానుల అంశంపై అధికార, ప్రతిపక్షాల మధ్య తీవ్రస్థాయిలో వాగ్వాదం జరుగుతోంది. కొత్తజిల్లాలకు ప్రాతిపదిక లేంటో జనం అయోమయంలో ఉన్న నేపథ్యంలో సాయిరెడ్డి ప్రకటన మరింత మీమాంశలోకి తోసేసినట్టే కనిపిస్తోంది. ఈ జిల్లాలపై స్పష్టత రావాలంటే మరింత సమయం తీసుకుంటా రా? లేక రాజధానుల ప్రకటనలాగే అయోమయంలోకి నెడతారా? అన్నది చూడాలి.
|
|