ఈ కోళ్లు చాలా రేటు గురూ.. ధర తెలిస్తే ఆశ్చర్యపోతారు

ఆ కోళ్లు చాలా రేటు గురూ.. ఆ కోడి గుడ్డు ఖరీదు వింటే మీరు నోరు వెళ్ళబెడతారు. వేల ధర నుంచి లక్షలలో పలికే ఆ కోళ్లు ధరలు, వాటి డిమాండ్ మీరు చూస్తే ఆశ్చర్యపోకతప్పదు. ఇంతకు అవి ఏ జాతి కోళ్ళు, ఎందుకు ఆ కోళ్లకు అంత గిరాకీ అని ఆశ్చర్యపోతున్నారా..! అది తెలుసుకోవాలంటే మనం ప్రకాశం జిల్లా కంభం పట్టణం పై ఓ లుక్ వేయాల్సిందే.

ప్రకాశం జిల్లా కంభం పట్టణానికి చెందిన కేతం వెంకట్రావు,కేతం ప్రసాద్ గత కొన్ని నెలలుగా కోళ్లపై ఉన్న మక్కువతో వాటిని పెంచుతున్నారు. పర్ల జాతి, రెడ్ కీరి, బ్లాక్ కీరి, ఆరెంజ్ కీరి, పొంరాం, మైల, డేగ, కాకినెలి, పొంరాం కీరి, కోడి నెమెలి జాతికి చెందిన ఈ కోళ్ళు వేల నుంచి లక్షలు పలుకుతున్నాయి. ఈ జాతి కోళ్లు అధికశాతం తమిళనాడు రాష్ట్రంలో పెంచుతారు. జనవరి మాసం వచ్చిందంటే వీటికి మరింత డిమాండ్ పెరుగుతుంది. పర్ల జాతికి సంబంధించిన ఈ కోళ్ళు కేవలం వాటి కోడి గుడ్డు ధరనే రూ.5,000 పలుకుతుంది అంటే మీరే అర్థం చేసుకోవచ్చు ఆ జాతి కోళ్లకు ఎంత డిమాండో...

పదిహేను రోజుల పర్ల జాతి కోడి పిల్లలకు పదిహేను వేలు పలికిన ధర ఐదు నెలలు తిరిగేసరికి వేల రూపాయల నుంచి లక్షలు పలుకుతున్నాయి. ఐదు నెలల పర్ల జాతి కోడి రెండున్నర లక్షల వరకు పలుకుతుంది అంటే ఈ కోళ్లు చాలా హాట్ గురూ అనకుండా ఉండలేరు మీరు.. ఈ కోళ్లు ను ప్రతి సంవత్సరం జనవరి మాసంలో తమిళనాడు రాష్ట్రంలోని తిరుచ్చిలో జరిగే కోళ్ల ప్రదర్శనలో ఈ జాతి కోళ్ళు అని ప్రదర్శిస్తారు. అక్కడ ఆకట్టుకున్న కోడికి భారీగానే పారితోషకాలు అందుతాయి. ప్రతి సంవత్సరం జనవరి 9వ తేదీన జరిగే ఈ కోళ్ల ప్రదర్శనకు ఇతర రాష్ట్రాల నుంచి తమ కోళ్ళతో యజమానులు పోటీలో పాల్గొనేందుకు ఉత్సాహం చూపిస్తారు..

తమకు మొదటి నుంచి కోళ్ల పై ఉన్న మక్కువతో వివిధ ప్రాంతాలు తిరిగి సేకరించిన గుడ్లు వాటి పిల్లలను పెంచి వాటిని సంరక్షిస్తామని, ప్రస్తుతం ఈ కోళ్ళకు మంచి డిమాండ్ ఉందని కోళ్ల పెంపకం దారులు కేతం వెంకట్రావు, కేతం ప్రసాద్ వెల్లడించారు. ప్రతి సంవత్సరం తమిళనాడు రాష్ట్రంలోని తిరుచ్చిలో జరిగే కోళ్ల ప్రదర్శనకు ఈ కోళ్లు కొనుగోలు చేసేందుకు వివిధ ప్రాంతాల నుంచి వస్తారని వీటికి మంచి డిమాండ్ ఉందని తెలిపారు.

ప్రతి సంవత్సరం సంక్రాంతి వచ్చిందంటే చాలు కోళ్లకు వేల రూపాయల ధర నుంచి లక్షలు పలుకుతాయి. అందుకే ఈ కోళ్లను చూసిన వీటి ధరలు విన్న, ఈ కోళ్లు చాలా హాట్ గురూ అనకుండా ఉండలేరు ఏమో...