మార్ఫింగ్ చిత్రాలతో బ్లాక్మెయిల్
Andhra Pradesh Telugu | Suryaa Desk | Published : Tue, Jan 11, 2022, 12:46 PM
గుంటూరు: ఓ యువకుడు తన ఫొటోలను అసభ్యకరంగా మార్ఫింగ్ చేసి తన కోరిక తీర్చాలని, లేకపోతే సామాజిక మాధ్యమాల్లో పెడతానని బెదిరిస్తున్నాడంటూ ఓ గృహిణి సోమవారం గుంటూరు అర్బన్ పోలీసు కార్యాలయంలో నిర్వహించిన స్పందనలో ఫిర్యాదు చేసింది. ‘గుంటూరుకు చెందిన ఓ యువతికి అదే ప్రాంతానికి చెందిన బైక్ మెకానిక్ పదేళ్ల కిందట పరిచయమై ప్రేమిస్తున్నానని వెంటపడ్డాడు.
చనువుగా ఉండి ఫొటోలు తీశాడు. అతని ప్రవర్తన నచ్చకపోవడంతో మాట్లాడటం ఆపేసింది. తర్వాత ఆమెకు పెళ్లి అయ్యింది. నలుగురు పిల్లలు. ఈ క్రమంలో సదరు యువకుడు చనువుగా ఉన్నప్పటి ఫొటోలను అసభ్యకరంగా మార్ఫింగ్ చేసి బెదిరిస్తున్నాడు. తన కోరిక తీర్చాలని లేని పక్షంలో డబ్బులు ఇవ్వాలన్నాడు. మూడు విడతలుగా రూ. 3 లక్షలు తీసుకున్నాడు. మళ్లీ డబ్బులు ఇవ్వాలని బ్లాక్మెయిల్కు దిగాడు.
వేధింపులు భరించలేక విషయాన్ని భర్తకు తెలిపింది. యువకుడిపై చర్యలు తీసుకొని రక్షణ కల్పించాలని ఎస్పీని కోరింది. స్పందించిన అధికారులు వెంటనే నిందితుడిపై చర్యలు తీసుకొని బాధితురాలికి న్యాయం చేయాలని ఆదేశించారు.
|
|