డ్రోన్ దాడులతో రష్యాను హడలెత్తిస్తున్న ఉక్రెయిన్
international | Suryaa Desk | Published : Mon, Mar 21, 2022, 03:32 PM
ప్రపంచంలో బలమైన సైనిక శక్తి ఉన్న దేశమైన రష్యాను ఉక్రెయిన్ తీవ్రంగా ప్రతిఘటిస్తోంది. తమదేశంపై రష్యా చేస్తున్న దాడులను తిప్పికొడుతోంది. యూరప్ దేశాలు, అమెరికా పంపిన డ్రోన్లతో పాటు టర్కీ నుంచి కూడా ప్రభావవంతమైన డ్రోన్లను ఉక్రెయిన్ వినియోగించుకుంటోంది. వీటి సాయంతో రష్యా యుద్ధ ట్యాంకులను ధ్వంసం చేస్తోంది. ప్రస్తుతం టర్కీ నుంచి కొనుగోలు చేసిన 20 నుంచి 50 వరకు డ్రోన్లు ఉక్రెయిన్ సైన్యం వద్ద ఉన్నాయి. ఈ డ్రోన్లు భారీ సైజులో ఉండడంతో నిర్ణీత ఎత్తులో మాత్రమే ఎగురుతాయి. దీంతో రష్యా యుద్ధ విమానాలు, ఎయిర్ ఫోర్స్ కళ్లుగప్పి చేయాల్సిన నష్టం అంతా చేసేస్తున్నాయి. ముఖ్యంగా రష్యా యుద్ధ ట్యాంకులు, వారికి సామగ్రి సరఫరా చేసే వాహనాలపై భీకర దాడులు చేస్తున్నాయి. టర్కీ ఉత్పత్తి చేసిన ఈ ఒక్కో డ్రోన్ విలువ 2 మిలియన్ యూఎస్ డాలర్లు ఉంటుంది. టర్కీకి చెందిన బైరెక్తర్ కంపెనీ వీటిని తయారు చేసింది. టర్కీ అధ్యక్షుడు ఎర్డగాన్ అల్లుడు బైరెక్తర్ ఈ సంస్థకు చీఫ్ టెక్నికల్ ఆఫీసర్గా బాధ్యతలు నిర్వహిస్తున్నారు.
|
|