ఈ నగరానికి ఏమైంది’ టైటిల్ విని భయపడ్డా: కేటీఆర్

పెళ్లి చూపులు’ చిత్రంతో క్రియేటివ్ దర్శకుడిగా నిరూపించుకున్న యువ దర్శకుడు తరుణ్ భాస్కర్ ‘ఈ నగరానికి ఏమైంది?’ చిత్రంతో జూన్ 29న ప్రేక్షకుల ముందుకు వస్తున్న సందర్భంగా ప్రమోషన్స్‌లో భాగంగా ఈ మూవీ ప్రి రిలీజ్ ఈవెంట్‌ను హైదరాబాద్‌లో వైభవంగా నిర్వహించారు. ఈ ఆడియో వేడుకకు తెలంగాణ ఐటీ మినిష్టర్ కేటీఆర్ ముఖ్య అతిథిగా హాజరయ్యారు. 

ఈ సందర్భంగా కేటీఆర్ మాట్లాడుతూ.. ‘ప్రతి సోమవారం చేనేత కళాకారులకు మద్దతుగా వారిని ప్రోత్సహిస్తూ చేనేత వస్త్రాలను ధరించాలని భావించాం. ఈ కార్యక్రమానికి తరుణ్ భాస్కర్ ఆహ్వానిస్తూ.. ‘ఈ నగరానికి ఏమైంది?’ ఈవెంట్‌కి అందరూ చేనేత వస్త్రాలను ధరించే వస్తామన్నారు. అయితే కొంత ఛీటింగ్ చేశారు కాని అందరూ పాటించినందుకు ధన్యవాదాలు. 

‘ఈ నగరానికి ఏమైంది’ టైటిల్ చూసినప్పడు నేను భయపడ్డా.. ఎందుకంటే వర్షాకాలం వచ్చిందంటే సాధారణంగా పేపర్స్‌లో ‘ఈ నగరానికి ఏమైంద’ని రాస్తారు అందుకే భయపడ్డా. పెళ్లిచూపులు సినిమా నాకు చాలా ఇష్టం. దర్శకుడు తరుణ్ భాస్కర్ ఫ్యామిలీ నాకు బాగా తెలుసు. ఆ టైంలో నిర్మాత సురేష్ బాబు ఈ సినిమా చూడమని నాకు చెప్పారు ఆ సినిమా అద్భుతంగా ఉంది. 

ఇక పెళ్లి చూపులు లాంటి సూపర్ హిట్ వచ్చిన తరువాత మళ్లీ కొత్త వాళ్లతో తీస్తున్నా.. హంగామా లేకుండా ప్రి రిలీజ్ ఈవెంట్ చేస్తున్నా అంటే నాకు ఆశ్చర్యం కలిగింది. ఎవరైనా ఒక హిట్ వస్తే స్టార్ హీరోలతో సినిమా తీయాలని అనుకుంటారు కాని తరుణ్ భాస్కర్‌ది విభిన్న శైలి. అందుకే సక్సెస్‌‌లను అందుకున్నారు. త్వరలో రాబోయే ‘ఈ నగరానికి ఏమైంది’ చిత్రం కూడా ‘పెళ్లి చూపులు’ కంటే పెద్ద హిట్ అవుతుందంటూ చిత్ర యూనిట్‌కి ఆల్ ది బెస్ట్ చెప్పారు మంత్రి కేటీఆర్. ఈ కార్యక్రమంలో చిత్ర యూనిట్‌తో పాటు నిర్మాత సురేష్ బాబు, దగ్గుబాటి రానా తదితరులు హాజరయ్యారు.