అప్పట్లో దర్శకేంద్రుడు... ఇప్పట్లో అనిల్ రావిపూడికి సాటి లేరు - సునీల్

ఒకప్పుడు స్టార్ కమెడియన్ హోదాను అనుభవించిన సునీల్ సెకండ్ ఇన్నింగ్స్ లో విభిన్న పాత్రలను ఎంచుకుంటూ తనలోని నటుడిని పూర్తిగా ఆవిష్కరిస్తున్నాడు. హీరో, కమెడియన్, సపోర్టింగ్ రోల్, విలన్.. ఇలా ప్రతి పాత్రలోనూ వైవిధ్యతను చూపిస్తూ ప్రేక్షకుల హృదయాల్లో చిరకాల స్థానాన్ని సంపాదించుకుంటున్నాడు.

సునీల్ ముఖ్యపాత్ర పోషించిన చిత్రం ఎఫ్ 3. అనిల్ రావిపూడి డైరెక్ట్ చేసిన ఎఫ్ 2 కు సీక్వెల్ గా, ఆయన దర్శకత్వంలోనే ఎఫ్ 3 తెరకెక్కింది. వెంకటేష్, వరుణ్ తేజ్, తమన్నా, మెహ్రీన్ కీలక పాత్రలు పోషించారు. ఎఫ్ 2 లో ముఖ్యపాత్రలన్ని ఎఫ్ 3 లో కొనసాగటమే కాక మరికొన్ని ప్రత్యేక పాత్రలు కూడా జత చేరాయి. వాటిలో సునీల్, సోనాల్ చౌహన్ పాత్రలు కూడా ఉన్నాయి. 

ఈ చిత్రం వేసవి కానుకగా మే 27న ప్రేక్షకుల ముందుకు రాబోతుంది. ఈ మేరకు గత కొన్నిరోజుల నుండి చిత్రబృందం ప్రచార కార్యక్రమాల్లో పాల్గొంటూ చాలా బిజీగా ఉన్నారు. తాజాగా జరిగిన ఒక ఇంటర్వ్యూలో సునీల్ మాట్లాడుతూ దర్శకుడు అనిల్ రావిపూడిపై ప్రశంసల జల్లు కురిపించారు. ఎక్కువమంది ఆర్టిస్టులను సమన్వయ పరుచుకుంటూ చాలా గొప్పగా అనిల్ ఈ సినిమాను తెరకెక్కించారని, అనిల్ కష్టపడే విధానం చూసి తనకు ఆశ్చర్యం కలిగిందని సునీల్ తెలిపారు. అనిల్ సెట్లో ఎప్పుడూ, ఎవరిపైనా కోప్పడ్డ దాఖలాలే లేవని, ప్రతి ఒక్కరిని తన కుటుంబ సభ్యుడిలా అనిల్ చూసుకునేవారని చెప్పారు. నటీనటుల సమస్యలను అర్ధం చేసుకుని, వారిని ఇబ్బందులకు గురిచెయ్యకుండా స్నేహభావంతో మెలిగే దర్శకులు చాలా అరుదని, అప్పట్లో దర్శకేంద్రుడు రాఘవేంద్రరావు ..ఇప్పుడు అనిల్ రావిపూడి మాత్రమే అలా చేస్తున్నారని సునీల్ పేర్కొన్నారు.