వంద కోట్ల బడ్జెట్ సినిమాతో గ్రాండ్ ఎంట్రీ ఇస్తున్న బట్టలకొట్టు వ్యాపారి !
cinema | Suryaa Desk | Published : Tue, May 31, 2022, 01:37 PM
తమిళనాడులో పేరొందిన న్యూ శరవణ స్టోర్స్ అధినేత శరవణ సినీరంగ ప్రవేశం చెయ్యబోతున్నారు. "ది లెజెండ్" అనే సినిమాలో లీడ్ రోల్ లో నటించి ఆ సినిమాకు నిర్మాతగా కూడా వ్యవహరించారు. JD జెర్రీ డైరెక్షన్లో తెరకెక్కిన ఈ చిత్రానికి హ్యారిస్ జయరాజ్ సంగీతమందించారు. ప్రభు, సుమన్, యోగిబాబు కీలకపాత్రలు పోషించారు. దాదాపు వంద కోట్ల బడ్జెట్టుతో తెరకెక్కిన ఈ మూవీ ట్రైలర్ నిన్ననే రిలీజ్ అయ్యింది. శరవణ సినిమాలో ఎక్కువశాతం సూపర్ స్టార్ రజినీకాంత్ స్టైల్ ను ఇమిటేట్ చేసినట్టు క్లియర్ గా తెలుస్తుంది. శరవణ సొంత సినిమా కావడం, ఆయన దగ్గర డబ్బుకు కొదువ లేకపోవడంతో ది లెజెండ్ సినిమాకు భారీ సెట్టింగులు, మెరుగైన సాంకేతిక బృందం పని చేసారు. స్టార్ హీరోల రేంజులో హీరోయిజం, ఎలివేషన్స్ శరవణ సినిమాలో ఉండటం విశేషం. వంద కోట్లు సినిమా బడ్జెట్ అయితే, ప్రమోషన్స్ కోసం డబ్బును నీళ్లప్రాయంలా ఖర్చు పెడుతున్నారు శరవణ. ఆడియో రిలీజ్ కోసం స్టార్ హీరోయిన్లను ఒకే వేదికపై చేర్చి, వారితో చిట్ చాట్ సెషన్ నిర్వహించి సినిమాకు కావలసిన ప్రచారం చేసాడు. తాజాగా విడుదలైన ట్రైలర్ తో ఈ సినిమా అందరి దృష్టిని ఆకర్షించింది. త్వరలోనే థియేటర్లలో విడుదల కానున్న ఈ చిత్రం హిట్టయితే ఓకే కానీ, డిజాస్టర్ గా మిగిలితే శరవణ తనకు తానుగా వెళ్లి ట్రోలర్ల చేతికి చిక్కినట్టే.
|
|