అప్పుడు పెళ్లిచూపులు, మెంటల్ మదిలో.. ఇప్పుడు మేజర్, 777చార్లీ ... పోలికేంటో తెలుసా?

విడుదలకు ముందు అంటే ఒక రెండు,మూడు వారాల ముందు పెయిడ్ ప్రీమియర్స్ పేరుతో సినిమాను సెలెక్టెడ్ థియేటర్లలో ప్రదర్శించేవారు. ఫ్రీగా డబ్బులు రావడమే కాక, మౌత్ పబ్లిసిటీ కూడా ఎక్కువగా ఉండటంతో, ఈ ఫార్మటు లో విడుదలైన పెళ్లి చూపులు, మెంటల్ మదిలో సినిమాలు సూపర్ హిట్టయ్యాయి. తగ్గుముఖం పట్టిన ఈ పద్దతిని అడవి శేష్ మేజర్ సినిమాతో తిరిగి వెలుగులోకి తీసుకొచ్చారు. శశికిరణ్ తిక్కా డైరెక్షన్లో మేజర్ సందీప్ ఉన్నికృష్ణన్ బయోపిక్ గా తెరకెక్కిన ఈ సినిమా జూన్ 3 న థియేటర్లకు రానుంది. ఈ విడుదల తేదికి దాదాపు రెండు వారాల ముందు నుండి మేజర్ దేశవ్యాప్తంగా ఉన్న మెట్రో నగరాల్లో సెలెక్టెడ్ థియేటర్లలో ప్రదర్శింపబడింది. యూనివర్సల్ సబ్జెక్టు కావడంతో ప్రాంతంతో సంబంధం లేకుండా మేజర్ సినిమాకు పాజిటివ్ టాక్ వచ్చింది. దీంతో రేపు విడుదలయ్యే సినిమా ఖచ్చితంగా సూపర్ హిట్ అవుతుందని చిత్రబృందం నమ్మకంగా ఉంది. ఇప్పుడిదే దారిలో కన్నడ నటుడు రక్షిత్ శెట్టి కూడా వెళ్లబోతున్నాడు. 

రక్షిత్ శెట్టి లీడ్ రోల్ లో నటించిన 777చార్లీ సినిమాను పెయిడ్ ప్రీమియర్స్ కు సిద్ధం చేస్తున్నాడు. కిరణ్ రాజ్ దర్శకత్వంలో కామెడీ అడ్వెంచరస్ థ్రిల్లర్ గా రూపుదిద్దుకున్న ఈ చిత్రాన్ని జి.ఎస్ గుప్తా తో కలిసి రక్షిత్ శెట్టి నిర్మించారు. ఇటీవలే రిలీజ్ ఐన ట్రైలర్ కు ప్రేక్షకుల నుండి ముఖ్యంగా పెంపుడు కుక్కలను ప్రాణంగా చూసుకునే వారినుండి అద్భుతమైన స్పందన వచ్చింది. తెలుగులో ఈ చిత్రాన్ని దగ్గుబాటి రానా సమర్పిస్తున్నారు. ప్రపంచవ్యాప్తంగా, పాన్ ఇండియా భాషల్లో, జూన్ 10న విడుదలకానున్న ఈ సినిమా తొలి పెయిడ్ ప్రీమియర్ ను ఈరోజు అమృత్ సర్ లో ఏర్పాటు చేసారు. ఆ తర్వాత లక్నో, పూణే, త్రివేండ్రం, షోలాపూర్, చెన్నై, కోల్కతా, మధురై, హైదరాబాద్ సిటీల్లో కూడా ప్రీమియర్ షోలను ప్రదర్శించనున్నారు.