'పొన్నియన్ సెల్వన్' టీజర్ కు ముహూర్తం ఖరారు
cinema | Suryaa Desk | Published : Tue, Jun 14, 2022, 09:12 PM
ప్రముఖ దర్శకుడు మణిరత్నం డ్రీమ్ ప్రాజెక్ట్ గా రూపొందుతున్న చిత్రం "పొన్నియిన్ సెల్వన్". చియాన్ విక్రమ్,ఐశ్వర్యా రాయ్, కార్తీ, జయం రవి, త్రిష ముఖ్య పాత్రలు పోషిస్తున్న ఈ చిత్రాన్ని మద్రాస్ టాకీస్, లైకా ప్రొడక్షన్స్ సంయుక్తంగా నిర్మిస్తున్నారు. హిస్టారికల్ ఫిక్షన్ డ్రామాగా తెరకెక్కుతున్న ఈ చిత్రానికి మణిరత్నం కో ప్రొడ్యూసరుగా వ్యవహరిస్తున్నారు. రెండు భాగాలుగా రూపుదిద్దుకుంటున్న ఈ చిత్రం మొదటి భాగానికి సంబంధించిన షూటింగు విజయవంతంగా పూర్తయింది. పొన్నియిన్ సెల్వన్ - 1 సెప్టెంబర్ 30న ప్రేక్షకుల ముందుకు రావడానికి రెడీ అవుతుంది.
తాజాగా అందుతున్న సమాచారం ప్రకారం, పొన్నియిన్ సెల్వన్ మూవీ టీజర్ ను మేకర్స్, జూలై నెలలో ఒక మంచి రోజు చూసి విడుదల చేస్తారని తెలుస్తుంది. ఈ టీజర్ ఈవెంట్ ను తంజావూరులోని ఒక పురాతన దేవాలయంలో అంగరంగ వైభవంగా చెయ్యాలని భావిస్తున్నారట. టీజర్ ఈవెంట్ తదుపరి ఆడియో రిలీజ్ ఫంక్షన్ ను ఆగస్టు మొదటివారంలో జరుపుతారని కూడా తెలుస్తుంది. ఈ మేరకు త్వరలోనే మేకర్స్ నుండి అధికారిక ప్రకటన వెలువడబోతుందట.
"పొన్నియిన్ సెల్వన్" కధ విషయానికి వస్తే, తమిళంలో కల్కీ కృష్ణమూర్తి రచించిన, 1950లలో ప్రచురితమైన నవల పొన్నియిన్ సెల్వన్ ఆధారంగా తెరకెక్కింది. ఈ నవల చారిత్రక కల్పిత కధ. తమిళ,మలయాళ,కన్నడ,హిందీ,తెలుగు భాషలలో విడుదలవనున్న ఈ చిత్రానికి ఏ.ఆర్. రెహమాన్ సంగీతం అందించారు. మణిరత్నం ఎంతో ప్రతిష్టాత్మకంగా తీస్తున్న ఈ చిత్రం ఎన్ని రికార్డ్సు క్రియేట్ చేస్తుందో వేచి చూడాలి.
|
|