దిల్ రాజు స్ట్రాటజీ ఏంటి?.. ఆ సినిమాపై ఎందుకు మౌనం?

దిల్ రాజు... టాలీవుడ్ లో మంచి అభిరుచి గల నిర్మాతగా, సక్సెస్ఫుల్ నిర్మాతగా స్టార్ ఇమేజ్ ను సొంతం చేసుకున్నాడు. సొంత బ్యానరైన శ్రీ వెంకటేశ్వర క్రియేషన్స్ పై ఆయన నిర్మించిన కొత్త చిత్రం "థాంక్యూ". విక్రమ్ కే కుమార్ డైరెక్షన్లో రూపొందిన ఈ చిత్రాన్ని నాగచైతన్య హీరోగా నటించారు. ఈ చిత్రంలో ఢిల్లీ బ్యూటీ రాశీఖన్నా హీరోయిన్. తమన్ సంగీతం అందిస్తున్న ఈ సినిమాలో మాళవికా నాయర్, అవికా గోర్ కీలక పాత్రలు పోషిస్తున్నారు. జూలై 8వ తేదీన విడుదల కావడానికి రెడీ అవుతుంది. ఎప్పుడో షూటింగ్ పూర్తి చేసుకున్న ఈ చిత్రం పోస్ట్ ప్రొడక్షన్ పనులకు చాలా టైం తీసుకుంది. మొన్నటి వరకు కూడా ఈ మూవీ పై ఎలాంటి అప్డేట్ లేక చైతూ అభిమానులు అగ్గిలం మీద గుగ్గిలమయ్యారు. ఫ్యాన్స్ మొర ఆలకించిన థాంక్యూ టీం  గత కొన్ని రోజుల నుండి వరస అప్డేట్ల నిస్తూ వస్తుంది. ముందుగా రిలీజ్ డేట్ తో మొదలు పెడితే, టీజర్, లిరికల్ సాంగ్స్ అంటూ సైలెంట్ గా ప్రమోషన్స్ చేస్తున్నారు. కానీ ఇలాంటి సైలెంట్ ప్రమోషన్స్ రీసెంట్ టైం లో , ముఖ్యంగా చాన్నాళ్ల తర్వాత సోలో గా ఎంట్రీ ఇవ్వబోతున్న చైతూ మూవీకి వర్కౌట్ అవ్వవని కొంతమంది అభిప్రాయం. గతంలో నటించిన లవ్ స్టోరీ , బంగార్రాజు సినిమాల సక్సెస్ ను చైతూ సాయిపల్లవి, నాగార్జునతో కలిసి షేర్ చేసుకున్నాడు. 

నిజానికి దిల్ రాజు నిర్మిస్తున్న సినిమాలంటే, ప్రేక్షకుల్లో మంచి ఎక్స్పెక్టేషన్స్ ఉంటాయి. వారి అంచనాలకు తగ్గట్టే దిల్ రాజు కూడా మూవీ టీం తో కలిసి ప్రమోషన్స్ చేస్తుంటారు. నిర్మాతగా కేవలం సినిమా బడ్జెట్ లెక్కలను చూసుకోవడమే కాక మూవీ టీం తో కలిసి మొదటి రోజు నుండి ఆఖరి రోజు వరకు ప్రయాణం చేసే దిల్ రాజు, చైతూ థాంక్యూ పట్ల ఎందుకు సైలెంట్ గా ఉన్నాడన్నది తెలియట్లేదు. చైతూ మూవీకి ఈ మాత్రం బజ్ సరిపోదు. సినిమా విడుదలకు ఇంకా ఇరవై రోజుల సమయం ఉంది కాబట్టి, మూవీ టీం ను దిల్ రాజు ఇప్పటికైనా నిద్ర లేపి వరస ప్రమోషన్స్ లో పాల్గొనేలా చూస్తే బావుంటుందని అక్కినేని అభిమానుల కోరిక.