జనసేన కార్యాలయం ప్రారంభం
cinema | Suryaa Desk | Published : Wed, Oct 25, 2017, 12:19 PM
హైదరాబాద్లో జనసేన పార్టీ పరిపాలనా కార్యాలయాన్ని మంగళవారం లాంఛనంగా ప్రారంభించారు. భరతమాత సాక్షిగా పవన్ కళ్యాణ్ తన పార్టీ ఆఫీస్ను ప్రారంభించడం విశేషం. భరత మాతకు శాస్త్రోక్తంగా పూజలు నిర్వహించిన అనంతరం సర్వమత ప్రార్థనలు చేశారు. వేద మంత్రాల మధ్య సన్నిహితులు, జనసేన ప్రతినిధులు, అభిమానులతో కలిసి కార్యాలయంలో అడుగుపెట్టారు. తర్వాత ముస్లిం మత పెద్దలతో పాటు సినీనటుడు అలీ పవిత్ర ఖురాన్ను పఠించారు. క్రైస్తవ మతపెద్దలు బైబిల్ స్తోత్రాలతో జనసేనను ఆశీర్వదించారు.
పార్టీ కార్యాలయం ప్రారంభం సందర్భంగా.. అలీ తన మిత్రుడైన పవన్ కళ్యాణ్కు ఖురాన్ను బహుమతిగా ఇచ్చారు. ముస్లింలు పవిత్రంగా భావించే ఖురాన్ను జాగ్రత్తగా తన దగ్గర దాచుకుంటానని పవన్ ఈ సందర్భంగా చెప్పారు. ఈ ఆఫీస్ను పార్టీ పరిపాలనా సౌలభ్యం కోసం వాడుకోనున్నారు. రాజకీయ కార్యకలాపాల కోసం భాగ్యనగరంతోపాటు, అమరావతిలో కార్యాలయాల్ని ఏర్పాటు చేయనున్నట్లు జనసేన వెల్లడించింది.
తెలంగాణకు చెందిన నిమ్మల వీరన్న అనే కార్యకర్త ఈ కార్యక్రమానికి ముఖ్య అతిథిగా హాజరయ్యారు. వీరన్నతో పవన్ మాట్లాడించారు. ఆయన చాలా కాలంగా గోడలపై నినాదాలు రాస్తూ ప్రజల్లో చైతన్యం తీసుకురావడానికి నిస్వార్థంగా కృషి చేస్తున్నారని పవన్ తెలిపారు. వీరన్న తనకు 12 ఏళ్లుగా తెలుసని, తనకు ఆయన ఆదర్శమని పవన్ ఈ సందర్భంగా తెలిపారు.
|
|