కొండెక్కిన చికెన్ ధరలు.. కారణాలివే..! ప్రస్తుతం కేజీ ఎంతంటే

చికెన్ ప్రియులకు బ్యాడ్ న్యూస్. గత కొన్ని రోజులుగా ఏపీ, తెలంగాణలో చికెన్ ధరలు అమాంతం పెరుగుతున్నాయి. వారం రోజుల్లోనే చికెన్ ధరలు కొండెక్కి కూర్చున్నాయి. ఎండలతో పాటు చికెన్ రేట్లు కూడా మండిపోతూ.. సామాన్యులను బెంబేలెత్తిస్తున్నాయి. గత వారంలో.. హైదరాబాద్ లాంటి తెలుగు రాష్ట్రాల్లోని ప్రధాన పట్టణాల్లో కిలో చికెన్ (స్కిన్ లెస్) ధర రూ.200 నుంచి రూ.220 వరకు పలికింది. ఇక.. విత్ స్కిన్ అయితే.. కేవం రూ.180 నుంచి రూ.200 మాత్రమే. కాగా.. ఇప్పుడు కిలో చికెన్ ధర పెడితే గ్రామాల్లో అర కిలో మటన్ వచ్చే పరిస్థితి ఉంది.

ప్రస్తుతం హైదరాబాద్ మార్కెట్‌లో కిలో చికెన్ (స్కిన్ లెస్) రూ.300 వరకు పలుకుతుంది. స్కిన్‌తో అయితే.. రూ.280 ఉంది. పెరిగిన చికెన్ ధరలు చూసి చికెన్ ప్రియులు నోరెళ్లబెడుతున్నారు. వారంలోనే ధరలు ఇంతలా పెరగటం చూసి.. ఆశ్చర్యపోతున్నారు. ఏపీలోని ప్రధాన పట్టణాల్లోనూ చికెన్ ధరలు ఇలాగే మండిపోతున్నాయి. ఓవైపు చికెన్ ధరలు అమాంతంగా పెరిగిపోతుంటే.. మరోవైపు.. నిన్నమొన్నటి వరకు పెరుగుతూ పోయిన గుడ్ల ధరలు మెల్లిగా తగ్గుముఖం పట్టాయి.

గతవారంలో రూ.7 పలికిన కోడిగుడ్డు... ప్రస్తుతం రిటైల్ మార్కెట్‌లో ఐదు రూపాయలు పలుకుతోంది. అయితే.. కోడి గుడ్ల ధరలు ఇంతకన్నా తగ్గే ఛాన్స్ లేదని పౌల్ట్రీ రైతులు చెప్తున్నారు. అయితే.. చికెన్ ధరలు మాత్రం ఎండలు పెరిగే కొద్దీ మరింత పెరిగే అవకాశం ఉందంటున్నారు. అయితే.. తెలుగు రాష్ట్రాల్లో ఎండలు పెరుగుతుంటే.. కోళ్లు చనిపోయే ప్రమాదం ఉందని.. దీంతో కోళ్ల లభ్యత తగ్గి చికెన్ ధరలు పెరిగే అవకాశం ఉందని విశ్లేషిస్తున్నారు.

అయితే.. చికెన్ రేట్లు పెరగడానికి కోళ్ల దాణా ధరలు పెరగటం కూడా ఓ కారణంగా చెప్తున్నారు ఫౌల్ట్రీ రైతులు. కోళ్ల దాణా ధరలలో పెరుగుదల కారణంగా ఉత్పత్తి ఖర్చులు గణనీయంగా పెరిగాయని చెప్తున్నారు. కోళ్ల దాణాలో ఉపయోగించే సోయా, మొక్కజొన్న వంటి పంటల దిగుబడి పడిపోవడంతో.. మార్కెట్‌లో వీటి ధర పెరిగిపోతోంది. దీంతో చికెన్ రేట్లు కూడా అమాంతంగా పెరుగుపోయింది.

వేసవిలో నీటి కొరత, తీవ్రమైన వేడి కారణంగా పౌల్ట్రీ ఫామ్‌లలో ఉన్న కోళ్లు మృత్యువాత పడుతున్నాయని.. దీంతో కోళ్ల పెంపకం చాలా కష్టమైపోయిందని చెప్తున్నారు. దీంతో.. కోళ్ల సరఫరాపై తీవ్ర ప్రభావం పడిందన్నారు. అదనంగా పెరిగిన రవాణా ఖర్చులు కూడా ధరల పెరుగుదలకు కారణం అవుతున్నాయని చెప్పారు.