అసలైన కార్యకర్తలను మింగే తోడేలుకే కాంగ్రెస్ పగ్గాలు.. సస్పెండ్‌పై బక్కా జడ్సన్ ట్వీట్

లోక్ సభ ఎన్నికల వేళ తెలంగాణలో రాజకీయాలు రసవత్తరంగా మారుతున్నాయి. సొంత పార్టీ నేతలే తమ నాయకత్వంపై బహిరంగంగా విమర్శలు చేసే సంస్కృతి ఉన్న ఏకైక పార్టీ కాంగ్రెస్. ఈ సంప్రదాయం ఎప్పటి నుంచో ఉండగా.. అసెంబ్లీ ఎన్నికల ప్రచారం మొదలైనప్పటి నుంచి కొద్దిగా తగ్గింది. అయితే.. కాంగ్రెస్ పార్టీ పగ్గాలను రేవంత్ రెడ్డికి ఇవ్వటంపై మొదటి నుంచి ఫక్తు కాంగ్రెస్ కార్యకర్తలు వ్యతిరేకిస్తూనే ఉన్నారు. కాగా.. ఉనికి కోల్పేయే స్థితి నుంచి అధికారంలోకి తీసుకురావటంతో.. రేవంత్ రెడ్డిపై ఉన్న వ్యతిరేకత పూర్తిగా తొలిగిపోయింది. కానీ.. ఒకరిద్దరు మాత్రం ఇప్పటికీ రేవంత్ రెడ్డి నాయకత్వాన్ని వ్యతిరేకిస్తూనే ఉన్నారు. అందులో బక్క జడ్సన్ ఒకరు.

సమయం దొరికినప్పడల్లా.. కాంగ్రెస్ నాయకత్వంపై బహిరంగంగానే విమర్శలు చేస్తూ వచ్చారు. ఇటీవల గాంధీ భవన్ మెట్లపై కూర్చొని సీఎం రేవంత్ రెడ్డి గురించి తీవ్ర విమర్శలు చేయటం.. అవి కాస్త వైరల్ కావటంతో.. నాయకత్వం తీవ్రంగా పరిగణించింది. సీఎం రేవంత్‌రెడ్డిపై అనుచిత వ్యాఖ్యలు చేయటాన్ని సీరియస్‌గా తీసుకున్న కాంగ్రెస్ నాయకత్వం.. పార్టీ సీనియర్ నేత బక్క జడ్సన్‌ను ఆరేళ్ల పాటు సస్పెండ్ చేసింది. ఈ మేరకు టీ కాంగ్రెస్ క్రమశిక్షణ కమిటీ ఛైర్మన్ చిన్నారెడ్డి మంగళవారం ఆదేశాలను జారీ చేశారు. బహిరంగ వేదికలపై పార్టీ పరిధిని దాటి మాట్లాడటం.. పార్టీ వ్యతిరేక కార్యకలాపాలకు పాల్పడటంతో జడ్సన్‌ను సస్పెండ్ చేసినట్లు తెలిపారు.

ఈ క్రమంలోనే తన సస్పెన్షన్ మీద బక్క జడ్సన్ ట్విట్టర్ వేదికగా ఘాటుగా స్పందించారు. "1989 నుంచి కాంగ్రెస్ పార్టీలో కొనసాగుతున్న నాకు రాహుల్ గాంధీ, ప్రియాంక గాంధీతో పాటు హైకమాండ్ ఇచ్చిన మద్దతుకు ధన్యవాదాలు. అసలైన కాంగ్రెస్ కార్యకర్తలను మింగేసే తోడేలుకు కాంగ్రెస్ అధిష్ఠానం తెలంగాణ బాధ్యతలను అప్పజెప్పింది. ఎట్టకేలకు నన్ను పార్టీ నుంచి బహిష్కరిస్తూ సరైన గుర్తింపునిచ్చారు" అంటూ జడ్సన్ ట్వీట్ చేశారు. కాగా.. ఆయన చేసిన ట్వీట్‌కు రేవంత్ రెడ్డి వీడియోను కూడా జత చేశారు జడ్సన్. ప్రస్తుతం.. ఆయన చేసిన ఈ ట్వీట్ వైరల్ అవుతోంది.