పచ్చళ్లు పెడుతున్నారా.. గుడ్ న్యూస్.. సగానికి సగం పడిపోయిన వెల్లుల్లి ధరలు

వేసవికాలం అంటే గుర్తొచ్చిది.. ఎండలు, సెలవులే కాదు.. నోరూరించే పళ్లచ్చు కూడా. ఎండాకాలం అంటేనే పచ్చళ్ల సీజన్ అన్నట్టుగా.. రకరకాల ఊరగాయలు పెట్టేస్తుంటారు. ముఖ్యంగా మామిడికాయలతో పెట్టే రకరకాల పచ్చళ్లు నోరూరిస్తుంటాయి. అయితే.. ఈ పచ్చళ్ల కాలంలో మహిళలకు శుభవార్త. మొన్నటివరకు ధరలతోనే ఘాటెక్కించి సామాన్యుల కంట కన్నీళ్లు పెట్టించిన అల్లం వెల్లుల్లి ధరలు.. ఇప్పుడు సగానికి సగం దిగివచ్చి గృహిణులకు ఊరటనిచ్చాయి. సరిగ్గా.. పచ్చళ్ల వేళ ధరలు తగ్గుముఖం పట్టటంతో.. చాలా మంది కొనిపెట్టుకుంటున్నారు.

నెల కిందటి వరకు వెల్లుల్లి ధరలు ఆకాశాన్నంటాయి. మార్కెట్‌లో కిలో మేలురకం వెల్లుల్లి ధర.. 500 వందల నుంచి 600 వరకు పలికింది. దీంతో.. అంతంత రేటు పెట్టి కిరాణా దుకాణా యాజమానులు కూడా కొనేందుకు సాహసం చేయకపోవటంతో.. వెల్లుల్లి ఎక్కడా దొరకలేదు కూడా. ఆ పరిస్థితుల నుంచి.. ఇప్పుడు అల్లం, వెల్లుల్లి ధరలు క్రమంగా తగ్గుతూ సాధారణ స్థాయికి చేరుకున్నాయి.

ప్రస్తుతం మార్కెట్లలో వెల్లుల్లు కిలో ధర 200 నుంచి 250 రూపాయలు పలుకుతోంది. వీధుల్లో అమ్మొచ్చే అల్లం వెల్లుల్లి అయితే.. కేవలం 150 రూపాయలకే కిలో లెక్కన ఇస్తుండటం గమనార్హం. దీంతో.. సామాన్యులు వెల్లుల్లిని ఎక్కువగా కొనుగోలు చేసి.. నిలువచేసుకుంటున్నారు. మరికొన్ని రోజులైతే అవకాయ పెట్టే సమయం రానుండటంతో.. వాటికోసం ఇప్పుడే కొని దాచుకుంటున్నారు.

అయితే.. రేట్లు ఒక్కసారిగా పెరగటం, పంట కూడా ఒకేసమయానికి చేతికిరావటంతో.. పెద్ద ఎత్తున మార్కెట్‌లోకి వెల్లుల్లి దిగుబడులు వస్తున్నాయి. దీంతో.. ధరలు తగ్గుముఖం పట్టాయి. రానున్న రోజుల్లో అల్లం వెల్లుల్లి ధరలు మరింత తగ్గుముఖం పట్టే అవకాశముందని వ్యాపారులు చెప్తున్నారు. అల్లం వెల్లుల్లి ధరలు తగ్గటం సామాన్యులకు ఊరటనిచ్చే అంశమే అయినా.. రైతులకు కొంత నిరాశను కలిగిస్తోంది. మొన్నటి వరకు మంచి లాభాలు తెచ్చిపెట్టిన వెల్లుల్లి ఇప్పుడు అంతా గిట్టుబాటు కావటంలేదని నిరాశ చెందుతున్నారు.