'మిస్టర్ టీ' ఓనర్ నవీన్ రెడ్డిపై కత్తులతో దాడి

మిస్టర్ టీ ఓనర్ నవీన్ రెడ్డి పేరు తెలంగాణలో చాలా మంది సుపరిచితమే. మిస్టర్ టీ అనే చాయ్ దుకాణంతో మొదలుపెట్టి రాష్ట్రవ్యాప్తంగా కొన్ని వందల బ్రాంచ్‌లు ఓపెన్ చేసి.. చిన్నవయసులోనే సక్సెస్ ఫుల్ పారిశ్రామికవేత్తగా ఎదిగిన నవీన్ రెడ్డి.. ఓ కిడ్నాప్ కేసులో సంచలనంగా మారాడు. హైదరాబాద్‌లోని ఆదిభట్లలో తాను ప్రేమించిన యువతిని కిడ్నాప్ చేసి.. రాష్ట్రంలో సంచలనంగా మారిన విషయం తెలిసిందే. ఆ కిడ్నాప్ విషయంలో అరెస్టయిన నవీన్ రెడ్డి ఆ తర్వాత.. బెయిల్ మీద విడుదల కాగా అప్పటి నుంచి సైలెంట్ అయిపోయాడు. కాగా.. ఇప్పుడు మరోసారి వార్తల్లో నిలిచాడు నవీన్.

అయితే.. నవీన్ రెడ్డిపై హస్తినపురనంలో కొందరు దుండగులు కత్తులతో దాడి చేశారు. హస్తినపురంలోని ఓ హోటల్ దగ్గర ఉండగా.. ముగ్గురు వ్యక్తులు నవీన్ రెడ్డిపై కత్తితో దాడి తెగబడ్డారు. ఈ దాడిలో నవీన్ రెడ్డి చేతికి, భుజానికి గాయాలయ్యారు. నవీన్ రెడ్డి ప్రతిఘటించటం, అక్కడే ఉన్న స్థానికులు అప్రమత్తమవటంతో దుండగులు అక్కడి నుంచి పారిపోయారు.

గాయాలపాలైన నవీన్ రెడ్డిని వెంటనే దగ్గర్లోని ప్రైవేటు ఆస్పత్రికి తరలించారు. ప్రస్తుతం నవీన్ పరిస్థితి నిలకడగానే ఉందని వైద్యులు తెలిపారు. అయితే.. ఈ దాడికి ఆర్థిక లావాదేవీలే కారణమని తెలుస్తోంది. దాడి చేసిం కూడా రాము అనే వ్యక్తితో పాటు మరో ఇద్దరిగా అనుమానం వ్యక్తం చేస్తున్నారు. ఈ దాడిపై ఎల్బీ నగర్ పోలీస్ స్టేషన్‌లో ఫిర్యాదు చేయగా.. కేసు నమోదు చేసిన పోలీసులు దర్యాప్తు ప్రారంభించారు.

గతంలో.. తాను ఇష్టపడిన అమ్మాయి తనను కాదని వేరే వాళ్లతో పెళ్లికి సిద్ధమైందని తెలిసి.. వాళ్ల ఇంటిపైకి దాడికి వెళ్లాడు నవీన్. సుమారు వంద మందితో ఇంటిపైకి వచ్చి.. ఫర్నీచర్ ధ్వంసం చేసి బీభత్సం సృష్టించారు. తాను ప్రేమించిన వైశాలిని అందరూ చూస్తుండగానే కారులో ఎక్కించుకుని కిడ్నాప్ చేశాడు. ఈ కిడ్నాప్ విషయం హైదరాబాద్‌లో చర్చనీయాంశంగా మారటంతో.. నగర శివార్లలో వదిలేసి గోవాకు పరారయ్యాడు. ఆ తర్వాత పోలీసులు గోవాకు వెళ్లి.. నవీన్ రెడ్డిని పట్టుకుని తీసుకురావటం, అరెస్ట్ చేసి విచారించటం, కస్టడీలోకి తీసుకోవటం, బెయిల్ మీద బయటకు రావటం తెలిసిందే.