పట్టపగలే పంటపొలాల్లో ఇదేం పని.. చుట్టూ చీరలు కట్టి మరీ

చుట్టూ పచ్చని పంటపొలాలు.. వాటిమధ్య ఓ పెద్ద చెట్టు.. చల్లని గాలి.. ఆహ్లాదరకమైన వాతావరణం.. ఇంకేముంది వెదర్ టెంప్టింగ్‌గా ఉంది. అస్సలు ఆగలేకపోయారు. టేబుళ్లు వేసి సెట్టింగ్ చేశారు. వాళ్లు చేస్తున్న బాగోతం బయటివాళ్లకు కనపడకుండా.. చెట్టు చుట్టూ చీరలు కట్టారు. ఎవరూ రారన్న బలమైన నమ్మకంతో లోపల పని మొదలుపెట్టారు. ఇంతకూ వాళ్లు చేస్తున్న పనేంటీ అనుకుంటున్నారా.. అదేనండి పేకాట. ఊరి శివార్లలో ఉన్న పంటపొలాల్లో ఓ మామిడి చెట్టు కింద.. ప్లాస్టిక్ టేబుళ్లు, కుర్చీలు ఏర్పాటు చేసుకుని.. దర్జాగా పేకాడుతున్నారు.

ఇంత పకడ్బందీగా ఎవరూ రాలేరన్న నమ్మకంతో ఏర్పాటు చేసుకున్న ఈ పేకాట స్థావరం గురించి పోలీసులకు సమాచారం అందింది. ఇంకేముంది.. ఆ పేకాటరాయుళ్లను రెడ్ హ్యాండెడ్‌గా పట్టుకునేందుకు పోలీసులు కూడా రైతుల గెటప్‌లు వేసుకుని పొలానికి వెళ్తున్నట్టుగా వెళ్లి.. పేకాటరాయుళ్లను రెడ్ హ్యాండెడ్‌గా పట్టుకున్నారు. ఇది ఎక్కడో కాదు.. రాజన్న సిరిసిల్ల జిల్లా ముస్తాబాద్‌‍ మండలంలో జరిగింది.

ఎక్కడ పేకాట ఆడినా పోలీసులు ఇట్టే పట్టుకుంటున్నారని పేకటరాయుళ్లు ఇలా స్కెచ్ వేశారు. రోడ్డు నుంచి లోపలికి ఉండే ఓ పొలంలో చెట్టు కింద తమ దుకాణం సెట్ చేసుకుంటున్నారు. ఒకవేళ పోలీసుల జీప్ వస్తే.. అక్కడికి చేరుకునేలోపు పారిపోవచ్చని ప్లాన్ చేశారు. కానీ.. పేకాటరాయుళ్లకే దిమ్మతిరిగేలా పోలీసులు స్కెచ్ వేశారు. ముస్తాబాద్ మండలంలోని బందనకల్ గ్రామ శివారు ప్రాంతంలో పంటపొలాల మధ్య పేకాటాడుతున్నారనే సమాచారం వచ్చింది. పోలీస్ జీపులో వెళ్తే పారిపోతున్నారనే ఉద్దేశంతో.. వేరే వాహనంలో వెళ్లారు. అది కూడా రైతు కూలీల వేషంలో. మాసిన ఆంగీలు, తలకు తువాళ్లు కట్టుకుని.. దిక్కులు చూసుకుంటూ నడుచుకుంటూ పేకాట స్థావరం దగ్గరి వరకూ మెల్లిగా ఎలాంటి అనుమానం రాకుండా వెళ్లారు.

వాళ్లను చూసిన పేకాటరాయుళ్లు కూడా.. వ్యవసాయ కూలీలుగా భావించి.. దర్జాగా కూర్చుని పని కానిచ్చేస్తున్నారు. దగ్గరకు వెళ్లే వరకు పెద్దగా పట్టించుకోలేదు. చివరకు వాళ్లను చుట్టుముట్టేసరికి.. కింద ప్యాంట్లు, షూ చూసి.. వాళ్లు కూలీలు కాదు పోలీసులను గుర్తించారు. దీంతో.. ఒక్కసారిగా కంగు తిన్నారు. అటు పారిపోలేక.. ఇటు ఏం చెప్పాలో తెలీక.. బిత్తరపోయారు. ఇంకేముంది... పేకాట ఆడుతున్న ఏడుగురుని అదుపులోకి తీసుకున్న పోలీసులు.. కేసు నమోదు చేశారు. వారి నుంచి నగదు స్వాధీనం చేసుకున్నారు. పేకాట ఆడటం నిషేదమని.. ఎవరైనా అడితే కఠిన చర్యలు తీసుకుంటామని గ్రామస్థులను పోలీసులు హెచ్చరించారు.