కేంద్ర బడ్జెట్‌లో తెలంగాణకు అన్యాయంపై తీర్మానం,,బీజేపీ వాకౌట్ .. బీఆర్ఎస్ మద్దతు

తెలంగాణ అసెంబ్లీ సమావేశాల్లో భాగంగా.. కేంద్ర బడ్జెట్‌లో తెలంగాణకు అన్యాయం జరిగిందన్న అంశంపై సీఎం రేవంత్ రెడ్డి ప్రవేశపెట్టిన తీర్మానానికి బీఆర్ఎస్ మద్దతు తెలిపింది. కాగా.. బీజేపీ ఎమ్మెల్యేలు వ్యతిరేకిస్తూ సభ నుంచి వాకౌట్ చేయటం గమనార్హం. కేంద్ర బడ్జెట్‌లో తెలంగాణకు అన్యాయంపై రాష్ట్ర ప్రభుత్వం పెట్టిన తీర్మానాన్ని తాము ఏకగ్రీవంగా ఆమోదిస్తామని హరీష్ రావు వెల్లడించారు. కేంద్ర బడ్జెట్‌లో తెలంగాణ రాష్ట్రానికి అన్యాయం జరిగిందనేది వాస్తవమని హరీష్ రావు తెలిపారు. ఈ అన్యాయంపై.. రాష్ట్ర ప్రభుత్వం ఢిల్లీకి అఖిలపక్షాన్ని తీసుకెళ్తామంటే వచ్చేందుకు తాము సిద్ధంగా ఉన్నామన్నారు. అంతేకాదు.. బడ్జెట్‌లో రాష్ట్రానికి మొండిచేయి చూపినందుకు నిరసనగా సీఎం రేవంత్‌ రెడ్డి ఢిల్లీలో దీక్ష చేస్తామంటే.. తాము మద్దతిస్తామన్నారు. అయితే.. అందుకు సీఎం రేవంత్‌ రెడ్డి స్పందిస్తూ.. మాజీ సీఎం కేసీఆర్‌ దీక్షకు వస్తానంటే తాను తప్పకుండా ఢిల్లీలో దీక్ష చేస్తానని వివరించారు.

మరోవైపు.. తీర్మానంపై స్పందించిన కేటీఆర్.. ఈ పదేళ్లు జరిగిన అన్యాయానికి కొనసాగింపు మాత్రమే జరిగిందని తెలంగాణ గడ్డపై పుట్టిన ప్రతిబిడ్డ భావించినట్టు వివరించారు. కేసీఆర్‌ అవనసరంగా కేంద్రంలో పంచాయితీ పెట్టుకున్నారని.. అవనసర భేషజాలకు పోయారు కాబట్టే.. పదేళ్లు ఏం కాలేదని.. అందుకే తాను సఖ్యతతో ఉంటానని.. ప్రస్తుత సీఎం రేవంత్ రెడ్డి వ్యాఖ్యానించినట్టు కేటీఆర్ గుర్తు చేశారు. ఈరోజు మాత్రం.. పెద్దన్నా అనుకున్నామని కానీ దుర్మార్గంగా వ్యవహరిస్తూ వివక్ష, కక్ష అంటూ మాట్లాడుతున్నారన్నారు. తన దాకా వస్తేగానీ తత్వం బోధపడలేదని.. కేటీఆర్ కాంగ్రెస్ ప్రభుత్వాన్ని ఎద్దేవా చేశారు. అయితే.. తెలంగాణ అభివృద్ధి కోసం.. తాము ప్రభుత్వానికి అండగా నిలిచేందుకు సిద్ధమేనంటూ కేటీఆర్ ప్రకటించారు.

అంతకు ముందు.. కేటీఆర్ వర్సెస్ రేవంత్ రెడ్డి, హరీష్ రావు వర్సెస్ రేవంత్ రెడ్డి అన్నట్టుగా సభలో వాడీ వేడీగా మాటల యుద్ధం జరిగింది. ప్రతిపక్ష నేతలకు మంత్రులకు మధ్య కూడా గట్టిగానే మాటలు పేలాయి. అయితే.. చివరికి ప్రభుత్వం ప్రవేశపెట్టిన తీర్మానానికి బీఆర్ఎస్ మద్దతునివ్వగా.. శాసనసభ రేపటికి (జులై 5వ తేదీకి) వాయిదా పడింది. రేపు 12 గంటలకు తెలంగాణ పూర్తిస్థాయి బడ్జెట్‌ను ఆర్థిక మంత్రి, డిప్యూటీ సీఎం భట్టి విక్రమార్క ప్రవేశపెట్టనున్నారు.