బర్త్ డే పార్టీకి పిలిచి..సహోద్యోగుల గ్యాంగ్ రేప్

రాజస్థాన్‌లోని పర్యాటక నగరం ఉదయపూర్‌లో అత్యంత దారుణమైన ఘటన వెలుగులోకి వచ్చింది. ఒక ప్రైవేట్ ఐటీ కంపెనీలో మేనేజర్‌గా పని చేస్తున్న మహిళపై అదే కంపెనీకి చెందిన సీఈఓ (CEO), ఎగ్జిక్యూటివ్ హెడ్ భర్త కలిసి కదులుతున్న కారులో సామూహిక అత్యాచారానికి పాల్పడ్డారు. ఈ అకృత్యం జరుగుతున్న సమయంలో కంపెనీకి చెందిన మహిళా ఎగ్జిక్యూటివ్ హెడ్ కూడా కారులోనే ఉండటం గమనార్హం. బాధితురాలి ఫిర్యాదుతో పోలీసులు ముగ్గురు నిందితులను అదుపులోకి తీసుకున్నారు.

పుట్టినరోజు వేడుకల్లో ఘాతుకం..

పోలీసుల వివరాల ప్రకారం.. ఈ ఘటన డిసెంబర్ 20వ తేదీన జరిగింది. కంపెనీ సీఈఓ పుట్టినరోజు, నూతన సంవత్సర వేడుకల సందర్భంగా శోభాగ్ పురాలోని ఒక హోటల్‌లో పార్టీ ఏర్పాటు చేశారు. రాత్రి 9 గంటలకు ప్రారంభమైన ఈ వేడుకలు అర్ధరాత్రి 1.30 వరకు కొనసాగాయి. అయితే పార్టీలో మద్యం సేవించిన మేనేజర్ అపస్మారక స్థితికి చేరుకుంది. అతిథులందరూ వెళ్లిపోయిన తర్వాత నిందితులు ముగ్గురు కలిసి ఆమెను ఇంటి వద్ద వదిలేస్తామని నమ్మించి కారులో ఎక్కించుకున్నారు.

కారు సుఖేర్ ప్రాంతానికి చేరుకున్నాక.. నిందితులు ఒక షాపు వద్ద ఆపి బాధితురాలికి సిగరెట్ వంటి మత్తు పదార్థాన్ని బలవంతంగా తినిపించారు. దీంతో ఆమె పూర్తిగా స్పృహ కోల్పోయింది. బాధితురాలు పోలీసులకు ఇచ్చిన ఫిర్యాదులో.. తనకు స్పృహ వచ్చినప్పుడు సీఈఓ తనపై లైంగిక వేధింపులకు పాల్పడగా.. ఎగ్జిక్యూటివ్ హెడ్ భర్త అత్యాచారం చేశాడని పేర్కొంది. తెల్లవారుజామున 5 గంటల వరకు ఆమెను కారులోనే తిప్పుతూ ఈ అరాచకానికి ఒడిగట్టారు. చివరకు ఆమెను ఇంటి వద్ద వదిలి వెళ్లారు.

ఈ ఘటన జరిగిన మూడు రోజుల తర్వాత బాధితురాలు ధైర్యం చేసి పోలీసులను ఆశ్రయించింది. అయితే ఆమె ఫిర్యాదుకు బలం చేకూరుస్తూ.. కారులోని డాష్‌క్యామ్ ఈ ఘోరాన్నంతా రికార్డు చేసింది. కారులో జరిగిన సంభాషణలు, వీడియో ఫుటేజీని బాధితురాలు పరిశీలించి పోలీసులకు ఆధారంగా సమర్పించింది. ఈ కీలక సాక్ష్యంతో కేసు మలుపు తిరిగింది. మహిళా నేరాల విభాగం అదనపు ఎస్పీ మాధురీ వర్మ నేతృత్వంలో దర్యాప్తు ప్రారంభమైంది. ఉదయపూర్ ఎస్పీ యోగేశ్ గోయల్ ఈ ఘటనను ధృవీకరిస్తూ.. సీఈఓతో పాటు ఒక మహిళా ఉద్యోగిని, ఆమె భర్తను అదుపులోకి తీసుకుని విచారిస్తున్నట్లు తెలిపారు. బాధితురాలికి వైద్య పరీక్షలు నిర్వహించామని, రిపోర్టు కోసం వేచి చూస్తున్నామని వెల్లడించారు. బాధితురాలి గోప్యతను కాపాడేందుకు ఆమె వివరాలను పోలీసులు గోప్యంగా ఉంచారు.