తల్లి అంత్యక్రియల కోసం కూతురి భిక్షాటన.. తోచినంత సాయం చేసిన స్థానికులు

విధి ఎంత బలీయమైనదో అప్పుడప్పుడు కొన్ని సన్నివేశాలు చూస్తుంటే అర్థమవుతుంది. అచ్చం అలాంటి ఘటనే ఇది. ఏ చిన్నారికి రాకూడని కష్టం ఈ అమ్మాయికి వచ్చింది. నిర్మల్ జిల్లా తానూర్ మండలం బేళ్తరోడ గ్రామానికి చెందిన 11 ఏళ్ల వయసున్న దుర్గ.. ఇప్పుడు అనాథగా మారిపోయింది. కొన్ని నెలల క్రితం ఆమె తండ్రి అనారోగ్యంతో మృతి చెందగా.. ఇప్పుడు తల్లి కూడా తనను ఒంటరిగా వదిలేసి.. ఆత్మహత్య చేసుకుని అనంతలోకాలకు పయనమైపోయింది. ఉన్న ఒకే ఒక్క ఆధారమైన తల్లి చనిపోవటంతో.. లోకం గురించి ఏమీ తెలియని ఆ 11 ఏళ్ల చిన్నారికి ఏం చేయాలో దిక్కుతోచని పరిస్థితి ఎదురైంది.

బంధువులు, నా అన్నవాళ్లు ఎవరూ రాకపోవటంతో.. తల్లి మృతదేహం పక్కనే ధీనంగా ఏడుస్తూ కూర్చుంది. తల్లి అంత్యక్రియలు ఎలా చేయాలి.. అందుకు కావాల్సిన డబ్బులు ఎట్లా.. అనేది ఏమీ తెలియక.. అక్కడికి వచ్చిన వారి దగ్గర భిక్షాటన చేయటం అందరినీ కలచివేసింది. బెల్ తరోడా గ్రామంలో గంగామణి (36) తన భర్తతో గొడవ పడి.. కూలీనాలీ చేసుకుని 11 ఏళ్ల కూతురు దుర్గతో కలిసి ఒంటరిగా జీవనం సాగిస్తోంది. ఈ క్రమంలోనే.. భర్త అనారోగ్యంతో కొంతకాలం క్రితం మరణించాడు. ఏం కష్టమొచ్చిందో ఏమో కానీ.. గంగామణి కూడా తనదారి తాను చూసుకుంది. లోకమెరుగని తన 11 ఏళ్లు కూతురిని ఒంటరిని‌ చేసి ఆత్మహత్య చేసుకుంది. బంధువులు‌ లేరు.. నా అన్నవాళ్లెవరూ రాలేదు. విగత జీవిలా పడి‌ ఉన్న తల్లిని చూసుకుంటూ గుండెలవిసేలా రోధిస్తోంది దుర్గ.

గంగామణి అంత్యక్రియలు ఎలా..? వాళ్ల తరపున ఎవరూ రాలేదు..? ఖర్చులు ఎవరు భరిస్తారు..? అంటూ చివరి చూపు చూసేందుకు వచ్చిన ఇరుగూపొరుగూ అనుకుంటుంటే విన్న ఆ చిన్నారి.. తన తల్లి అంత్యక్రియల కోసం తప్పని పరిస్థితుల్లో భిక్షాటన చేపట్టింది. తల్లి మృతదేహం దగ్గరే.. ఓ చిన్న గుడ్డను పరిచి తోచిన సాయం చేయమంటూ స్థానికులను‌ వేడుకుంది.

ఆ చిన్నారి ధీన స్థితి గురించి ఆ నోటా ఈ నోటా తెలిసి.. స్థానికులు పెద్ద ఎత్తున అక్కడికి తరలి‌వచ్చి తమ‌వంతు ఆర్థిక సాయం అందించారు. ఆత్మహత్య కావడంతో కేసు నమోదు చేసుకున్న పోలీసులు విచారణ చేపట్టారు. విచారణ కోసం వచ్చిన పోలీస్ సిబ్బంది.. ఆ చిన్నారి పరిస్థిత చూసి చలించిపోయి తోచిన సాయం అందించారు. కాగా.. ఈ విషయం తెలిసి‌న మరికొందరు ఆన్ లైన్ ద్వారా చిన్నారికి తోడుగా నిలిచి అంత్యక్రియలకు సాయం అందించారు. తన తల్లి కోసం లోకమెరుగని ఆ చిన్నారి భిక్షాటన చేయటం.. అందిరినీ మనసులను మెలిపెడుతోంది. 11 ఏళ్ల వయసులో ఆ చిన్నారికి వచ్చిన కష్టం చూసి.. స్థానికులు కన్నీళ్లు పెట్టుకుంటున్నారు.