వరదల్లో 9 మందిని కాపాడిన జేసీబీ డ్రైవర్.. మరో వ్యక్తికి బీఆర్ఎస్ నేతల సన్మానం

ఖమ్మం వరదల్లో చిక్కుకున్న 9 మందిని కాపాడిన జేసీబీ డ్రైవర్ సుభాన్ రియల్ హీరో అనిపించుకున్న సంగతి తెలిసిందే. మున్నేరు ఉద్ధృతి ఎక్కువవటంతో బ్రిడ్జిపైనే 9 మంది చిక్కుకుపోగా.. ధైర్యం చేసి వారి వద్దకు వెళ్లి సురక్షితంగా ఒడ్డుకు చేర్చాడు. ప్రాణాలకు ప్రమాదమని తెలిసినా.. పోతే తాను ఒక్కడినే పోతానని.. వస్తే మాత్రం 10 మందితో తిరిగొస్తాని చెప్పి ధైర్యంగా వరదకు ఎదురీది వారిని రక్షించాడు. జేసీబీతో వెళ్లి వారిని సురక్షితంగా బయటకు తీసుకొచ్చి రియల్ హీరోగా నిలిచాడు.

అయితే వరద బాధితులను పరామర్శించేందుకు ఖమ్మం వచ్చిన పలువురు బీఆర్‌ఎస్‌ నేతలు సుభాన్‌ విషయంలో పొరపాటు పడ్డారు. తొమ్మిది మందిని కాపాడిన రియల్ హీరో జేసీబీ డ్రైవర్‌ సుభాన్‌ అనుకొని మరో వ్యక్తిని అభినందించి సన్మానించారు. పొరపాటున ఓ వ్యక్తికి శాలువాలు కప్పి, భుజం తట్టి అభినందించారు. ఆ వ్యక్తి కూడా తాను జేసీబీ డ్రైవర్ కాదని వారించకుండా ఎంచక్కా వారితో సన్మానం చేయించుకున్నాయి. అయితే జేసీబీ డ్రైవర్ అతడు కాదనే విషయం ఆలస్యంగా వెలుగులోకి వచ్చింది. సుభాన్‌ తెగువతో బయటపడిన వారు ఈ విషయాన్ని వెల్లడించారు.

బీఆర్‌ఎస్‌ నేతలు నన్మానించిన వ్యక్తి ఎవరో తమకు తెలియదని.. తమను రక్షించిన డ్రైవర్ సుభాన్ వేరే వ్యక్తి అని పేర్కొన్నారు. ఈ విషయం ఆ నోటా ఈ నోటా తెలిసి చర్చనీయాంశంగా మారింది. 'ఏందన్నా.. ఇదీ.. చూసుకోబడ్లే. కనబడినవారికళ్లా శాలువాలు కప్పుతారా ఏందీ..' అని సదరు వీడియోను సోషల్ మీడియాలో పోస్ట్ చేసి కామెంట్లు పెడుతున్నారు. అయితే సన్మానం చేయించుకున్న వ్యక్తి అడ్రస్ మాత్రం దొరకలేదు. బీఆర్ఎస్ నేతలతో ఏంచక్కా సన్మానం చేయించుకొని అక్కడి నుంచి మెళ్లిగా జారుకున్నాడు.

హరియాణాకు చెందిన సుభాన్‌ పొట్టకూటి కోసం రాష్ట్రానికి వచ్చాడు. ఎక్సకవేటర్‌ డ్రైవర్‌గా పని చేస్తున్నాడు. అయితే రెండ్రోజుల క్రితం ప్రకాశ్ నగర్‌ వంతెన దాటేందుకు ప్రయత్నించారు. భారీ వర్షాలకు మున్నేరు పోటెత్తింది. వారు సగం దూరం వెళ్లేసరికి వెంకటగిరి వైపు వరద ప్రవాహం ముంచెత్తగా వంతెనపైనే ఎటూ వెళ్లలేక ఉండిపోయారు. వరదల్లో చిక్కుకున్న వారిని రక్షించేందుకు సిద్ధమైన ప్రభుత్వం.. హెలికాప్టర్లు తెప్పించేందుకు యత్నించింది. కానీ ప్రతికూల వాతావరణం వల్ల రక్షించటం సాధ్యపడలేదు. మంత్రి తుమ్మల నాగేశ్వరరావు ఎన్డీఆర్‌ఎఫ్‌ బృందాలను రంగంలోకి దించినా ఫలితం లేకుండా పోయింది. దీంతో ముందుకొచ్చిన సుభానీ జేసీబీ సాయంతో వారిని బయటకు తీసుకొచ్చాడు. బాధితులు సురక్షితంగా బయటపడడంతో అందరూ ఊపిరి పీల్చుకోగా.. సుభాన్‌ను ప్రతి ఒక్కరూ ప్రశంసించారు.