ట్యాక్సీ డ్రైవర్‌తో లవ్ ట్రాక్.. భర్త, పిల్లలను వదిలి లండన్ నుంచి హైదరాబాద్‌కు

ప్రేమ అనేది ఎవరికి, ఎవరిపై, ఎప్పుడు కలుగుతుందో ఎవరికీ తెలియదు. ప్రేమించడానికి కారణం ఏంటి? అంటే ఎవరూ చెప్పలేరు. అందుకే ప్రేమ గుడ్డిది అంటారు. అయితే ఇలా ఎందుకు అంటారో ఇటువంటి ఘటనలు చూసినప్పుడు, వినప్పుడే తెలుస్తుంది. ఓ వివాహిత ట్యాక్సీ డ్రైవర్‌తో ప్రేమలో పడి పచ్చటి కాపురాన్ని కాదనుకొని లండన్ నుంచి హైదరాబాద్ చేరుకుంది. భర్త, పిల్లలను వదిలేసి ప్రియుడి మోజులో నగరానికి చేరుకుంది.

వివరాల్లోకి వెళితే.. హైదరాబాద్‌ అల్వాల్‌ ప్రాంతానికి చెందిన ఓ జంటకు 17 ఏళ్ల క్రితం వివాహం జరిగింది. భర్త ఉద్యోగం నిమిత్తం ప్రస్తుతం వారు లండన్‌లో నివసిస్తున్నారు. ఈ ఏడాది ఫిబ్రవరిలో ఆమె తల్లి హైదరాబాద్‌లో మృతి చెందింది. దీంతో అస్తికల నిమజ్జనం కోసం నగరానికి వచ్చింది. స్థానికంగా ఓ ట్యాక్సీని అద్దెకు తీసుకుని తిరిగారు. ఆ సమయంలో ట్యాక్సీ డ్రైవర్‌ శివ ఆమె సెల్‌ఫోన్‌ నంబరు తీసుకున్నాడు. లండన్ వెళ్లిన తర్వాత ఆమెతో చాటింగ్‌ మొదలుపెట్టాడు. ట్యాక్సీ డ్రైవర్ మాయమాటలకు వివాహిత ఆకర్షితురాలైంది. అతడితో ప్రేమలో పడింది.

సెప్టెంబరు 16న ఆమె భర్త తల్లి మృతి చెదింది. దీంతో అతడు ఒంటరిగా హైదరాబాద్‌ వచ్చాడు. ఇదే అదనుగా ఆమె పిల్లలను వదిలేసి సెప్టెంబరు 30న ప్రియుడి బర్త్‌డే వేడుకల కోసం హైదరాబాద్‌ చేరుకుంది. అమ్మ ఇంటికి రావడం లేదని పిల్లలు తండ్రికి ఫోన్ చేసి చెప్పటంతో అతడు ఆందోళనకు గురయ్యాడు. వెంటనే భార్యకు ఫోన్‌ చేయగా.. ఎటువంటి స్పందనా లేదు. లండన్‌ వెళ్లి ఆరా తీయగా.. ఆమె హైదరాబాద్‌ వెళ్లినట్లు తెలిసిందే. మరోసారి సెల్‌ఫోన్‌కు ఫోన్ చేయగా.. ఫోన్ లిఫ్ట్ చేసింది. తాను ఓ పని నిమిత్తం హైదరాబాద్ వచ్చానని.. ఈ నెల 5న లండన్‌కు టికెట్లు బుక్ చేసినట్లు చెప్పింది. ఎయిర్‌పోర్టుకు బయలుదేరానని మరోసారి, ఓ ట్యాక్సీ డ్రైవర్‌ కిడ్నాప్‌ చేశాడని మరోసారి రకరకాల సమాధానాలు చెప్పింది.

దీంతో తీవ్ర ఆందోళనకు గురైన ఆమె భర్త స్నేహితులు, బంధువుల సాయంతో పోలీసులకు సమాచారం అందించాడు. రంగంలోకి దిగిన పోలీసులు.. విచారణ చేపట్టారు. సెల్‌ఫోన్‌ సిగ్నల్స్ ఆధారంగా ఆమె గోవాలో ఉన్నట్లు తెలిసింది. ప్రియుడితో కలిసి గోవాలో ఎంజాయ్ చేస్తున్నట్లు పోలీసులు గుర్తించారు. వెంటనే అక్కడకు వెళ్లి ఆమెను తీసుకొచ్చి లండన్ విమానం ఎక్కించారు. ట్యాక్సీ డ్రైవర్‌ శివపై కేసు నమోదు చేసి విచారణ చేపట్టారు.