పట్నం నరేందర్ రెడ్డి ఏమైనా టెర్రరిస్టా.. ఎందుకలా అరెస్టు చేశారు?: ప్రభుత్వానికి హైకోర్టు ప్రశ్న

వికారాబాద్ జిల్లా లగచర్ల ఘటనలో కొడంగల్‌ మాజీ ఎమ్మెల్యే పట్నం నరేందర్‌రెడ్డి అరెస్టు విధానాన్ని తెలంగాణ హైకోర్టు తప్పుపట్టింది. ఆయన ఏమైనా టెర్రరిస్టా..? అని ప్రభుత్వాన్ని ప్రశ్నించింది. తన అరెస్ట్‌ను వ్యతిరేకిస్తూ తనపై పెట్టిన కేసులను క్వాష్ చేయాలంటూ నరేందర్ రెడ్డి హైకోర్టును ఆశ్రయించిన సంగతి తెలిసిందే. ఈ పిటిషన్‌పై నేడు హైకోర్టులో విచారణ జరిగింది. నరేందర్ రెడ్డి తరపు న్యాయవాది కోర్టులో వాదనలు వినిపిస్తూ.. కాల్స్ చేసినందుకు అరెస్ట్ చేయడం సరికాదన్నారు. కనీసం అరెస్ట్ చేసిన విషయాన్ని ఆయన కుటుంబ సభ్యులకు సైతం చెప్పలేదన్నారు. దేశ అత్యున్నత న్యాయస్థానం సుప్రీం తీర్పులను కింది కోర్టు పరిగణలోకి తీసుకోలేదని వాదించారు.

అరెస్ట్ గ్రౌండ్స్ చూడకుండానే నరేందర్ రెడ్డికి న్యాయస్థానం రిమాండ్ విధించిందన్నారు. పోలీసులు కోర్టును తప్పుదోవ పట్టిస్తున్నారని.. తమకు నచ్చింది రాసుకుని కన్ఫెషన్ రిపోర్టుగా చూపిస్తున్నారన్నారు. పిటిషనర్ వాదనతో ఏకీభించిన న్యాయస్థానం.. కేబీఆర్‌ పార్కు వద్ద వాకింగ్‌కు వెళ్లిన నరేందర్ రెడ్డిని ఎందుకు అరెస్టు చేశారని ప్రశ్నించింది. ఓ మాజీ ఎమ్మెల్యేను ఎందుకు టెర్రరిస్టులా అరెస్టు చేయాల్సి వచ్చిందో చెప్పాలని నిలదీశారు. ఘటన తర్వాత నరేందర్‌ రెడ్డి పరారీలో ఉన్నారా ? అని పీపీని ప్రశ్నించింది. నరేందర్‌రెడ్డి అరెస్టు విషయంలో సుప్రీం కోర్టు నిబంధనలు పాటించలేదని ఆక్షేపించింది. లగచర్ల ఘటనా స్థలంలో పట్నం నరేందర్ రెడ్డి ఉన్నారా..? ఈ వ్యవహారంలో ఆయన పాత్ర ఏంటి..? అని ప్రశ్నించింది.

న్యాయస్థానం ప్రశ్నలకు ప్రభుత్వం తరపు న్యాయవాది బలంగా వాదనలు వినిపించారు. ఘటనా స్థలంలో పట్నం నరేందర్ రెడ్డి లేకున్నా.. నిందితులకు ఆయనే డబ్బు సమకూర్చారని వాదించారు. దాడికి పాల్పడ్డ నిందితులకు ఆయన సాయం అందించటంతో పాటుగా అధికారులపై దాడులకు పరోక్షంగా ప్రేరేపించారన్నారు. ఇరుపక్షాల వాదనలు విన్న న్యాయస్థానం.. క్వాష్ పిటిషన్‌పై తీర్పును రిజర్వ్ చేస్తున్నట్లు ప్రకటించింది. ఇక ప్రస్తుతం చర్లపల్లి జైలులో పట్నం నరేందర్ రెడ్డి రిమాండ్ ఖైదీగా ఉండగా.. జైలులో ఆయనకు ప్రత్యేక బ్యారక్, ఇంటి భోజనానికి అనుమతి ఇవ్వాలని హైకోర్టు జైలు సూపరింటెండెంట్‌కు ఆదేశాలు జారీ చేసిన సంగతి తెలిసిందే.