హైదరాబాద్ ట్రాఫిక్ కష్టాలకు చెక్.. ఎలివేటెడ్‌ కారిడార్లకు ప్రాథమిక నోటిఫికేషన్‌

హైదరాబాద్ నగరంలో ట్రాఫిక్ కష్టాలకు చెక్ పెట్టేందుకు తొలి డబుల్ డెక్కర్, ఎలివేటెడ్ కారిడార్లు నిర్మించేందుకు రేవంత్ సర్కార్ నిర్ణయం తీసుకున్న సంగతి తెలిసిందే. జంట న‌గ‌రాల‌ (హైదరాబాద్, సికింద్రాబాద్)తో పాటు ఉత్తర తెలంగాణ జిల్లాల ప్రజ‌లు, వాహ‌న‌దారుల ట్రాఫిక్ క‌ష్టాలకు చెక్ పెట్టేందుకు ప్రభుత్వం ఈ నిర్ణయం తీసుకుంది. నేషనల్ హైవే 44పై 5.320 కిలోమీట‌ర్ల కారిడార్‌ను రూ.1,580 కోట్ల వ్యయంతో నిర్మించనున్నారు. సికింద్రాబాద్ ప్యారడైజ్ నుంచి తాడ్‌బండ్, బోయిన‌ప‌ల్లి జంక్షన్ మీదుగా డెయిరీ ఫామ్‌ రోడ్డు వరకు 5.32 కిలోమీటర్ల డబుల్డెక్కర్ ఎలివేటెడ్ కారిడార్, జేబీఎస్ నుంచి శామీర్పేట ఓఆర్ఆర్ను కలుపుతూ(18.1 కిలోమీటర్ల) మరో ఎలివేటెడ్ కారిడార్ నిర్మించనున్నారు.

ఈ కారిడార్ నిర్మాణంలో కీలక ముందడుగు పడింది. కారిడార్ల నిర్మాణాలకు రెవెన్యూ యంత్రాంగం భూసేకరణ చేపట్టేందుకు సిద్ధమైంది. ఈ మార్గాల్లో ఉన్న ప్రభుత్వ, ప్రైవేటు ఆస్తులతోపాటు సర్కార్ భూముల వివరాలను గుర్తించేందుకు హైదరాబాద్‌ జిల్లా కలెక్టర్‌ ప్రైమరీ నోటిఫికేషన్‌ జారీ చేశారు. భూసేకరణ ప్రక్రియను వేగంగా పూర్తిచేయాలని డిప్యూటీ కలెక్టర్లు, స్థానిక ఎమ్మార్వోలకు సూచించారు. భూసేకరణ పనులను నిర్ణీత గడువులోనే పూర్తి చేయాలన్నారు. 100 రోజుల్లోపు ప్రాథమిక నోటిఫికేషన్, డిక్లరేషన్ల ప్రక్రియలు పూర్తవ్వాలని చెప్పారు. మరో మూడు నెలల్లో భూసేకరణ ప్రక్రియ పూర్చి చేయాలని.. ఆ తర్వాత నెల కారిడార్ల పనులను మెుదలు పేట్టేందుకు చర్యలు తీసుకోవాలన్నారు.

ఇక కంటోన్మెంట్ పరిధిలో ఎలివేటెడ్ కారిడార్ నిర్మాణం కోసం భూములు సేకరించిన తర్వాత మిగిలిన భూములు కబ్జా కాకుండా ప్రహరీలు నిర్మించాలని హెచ్ఎండీఏ అధికారులు నిర్ణయం తీసుకున్నారు. ఎలివేటెడ్ కారిడార్ కోసం కంటోన్మెంట్ పరిధిలో మెుత్తం 113.48 ఎకరాల భూమిని సేకరించాల్సి ఉంది. ఎంత భూమిని సేకరిస్తే అంతే మొత్తంలో భూములను ఇతర ప్రాంతాల్లో కంటోన్మెంట్‌కు ఇవ్వడానికి హెచ్ఎండీఏ ఇప్పటికే అంగీకారం తెలిపింది. ప్రాజెక్టుల కోసం సేకరించిన డిఫెన్స్ భూములు మినహా, మిగిలిన భూములకు ప్రహరీ నిర్మించేందుకు హెచ్‌ఏండీఏ సిద్ధమైంది. దాదాపు రూ.27 కోట్లతో ప్రహరీలు నిర్మించడానికి తాజాగా టెండర్లను ఆహ్వానించింది. ఈ ఫెన్సింగ్నిర్మాణాలను నాలుగు రీచ్లుగా విభజించి పనులు చేపట్టనున్నారు.

ఈ ఎలివేటెడ్ కారిడార్ల నిర్మాణంతో ఆయా ప్రాంతాల్లో ట్రాఫిక్ సమస్య పూర్తిగా తొలగిపోయే ఛాన్స్ ఉంది. నేషనల్ హైవే–44 రహదారిలో మేడ్చల్, మెదక్, కామారెడ్డి, నిజామాబాద్, నిర్మల్, ఆదిలాబాద్ రూట్లలో వెళ్లే వాహనాలకు ట్రాఫిక్ ఇబ్బందులు తప్పనున్నాయి. అలాగే జేబీఎస్–శామీర్పేట వరకూ నిర్మించే కారిడార్లో తిరుమలగిరి, అల్వాల్జంక్షన్ల వద్ద ట్రాఫిక్ రద్దీ తగ్గనుంది.