ఐటీఆర్ దాఖలు చేస్తున్నారా? ఈ తప్పులు అస్సలు చేయొద్దు.. చూసుకోండి

ఆదాయపు పన్ను పరిధిలోకి వచ్చే వారు ఐటీ రిటర్నులు దాఖలు చేయాల్సిన సమయం ఆసన్నమైంది. అయితే, ఐటీ రిటర్నుల దాఖలుపై సరైన అవగాహన లేకపోయినా, నిపుణుల సలహాలు లేకుండా ఐటీఆర్ దాఖలు చేయడం కొత్త కష్టమైన పనిగా చెప్పవచ్చు. ఆడిట్ అవసరం లేని వారు ప్రతి ఏటా జులై 31వ తేదీలోపు ఇన్‌కమ్ ట్యాక్స్ రిటర్నులు దాఖలు చేయాల్సి ఉంటుంది. చాలా మంది చివరి నిమిషం వరకు వేచి ఉండి చివర్లో పొరపాట్లు చేస్తుంటారు. ఆ తర్వాత ఐటీ నోటీసులు అందుకోవడం వంటి చిక్కులు ఎదుర్కొంటారు. అయితే ఐటీఆర్‌లో చేసే తప్పులను సరిదిద్దుకునే వెసులుబాటు ఉంటుంది. రివైజ్డ్ రిటర్నులు దాఖలు చేయవచ్చు. అయితే, అలాంటి ఇబ్బందులు లేకుండా మొదటిసారే జాగ్రత్తగా రిటర్నులు దాఖలు చేయడం మంచిది. ఎలాంటి జాగ్రత్తలు తీసుకోవాలో తెలుసుకుందాం.

ఐటీఆర్ ఫారం..

ఐటీ రిటర్నులు దాఖలుకు తమకు ఏది సరైనదో ఆ ఐటీఆర్ ఫారం ఎంచుకోవాలి. రూ.50 లక్షల వరకు వేతనం, ఒక ఇంటిపై ఆదాయం, వడ్డీ తదితర మార్గాల్లో ఆదాయం వస్తే ఐటీఆర్-1 ఎంచుకోవాలి. రూ.50 లక్షలకుపైగా ఆదాయం ఉన్నప్పుడు ఐటీఆర్ -4 ఎంచుకోవాలి. అలాగే రూ.50 లక్షలకుపైగా ఆదాయం ఉండి ఒకే ఇంటి ద్వారా ఆదాయం వస్తే ఐటీఆర్-2 ఎంచుకోవాలి. వృత్తి నిపుణులు, ఐటీఆర్-1, ఐటీఆర్-2 విషయంలో అనుమానం ఉంటే ఐటీఆర్ -3 ఎంచుకోవచ్చు. షేర్లలో క్రయవిక్రయాలు చేసినప్పుడు మీరు నిర్వహించిన ట్రాన్సాక్షన్ల ఆదారంగా ఐటీఆర్2 లేదా 3 ఎంచుకోవాలి.

బ్యాంక్ అకౌంట్ అథెంటికేషన్..

పన్ను చెల్లింపుదారులు ఇ-ఫైలింగ్ పోర్టల్‌లో ముందుగానే తమ బ్యాంక్ అకౌంట్ ధ్రువీకరించాల్సి ఉంటుంది. ట్యాక్స్ పేయర్ల ఖాతా యాక్టివ్‌గానే ఉందని ఇది నిర్ధరిస్తుంది. అప్పుడే రిఫండ్లు నేరుగా బ్యాంక్ ఖాతాలోకి వస్తాయి.

ఐటీఆర్ ఇ-వెరిఫై..

ఐటీ రిటర్నులు దాఖలు చేసిన తర్వాత దాన్ని కచ్చితంగా ధ్రువీకరించాలి. అప్పుడే దాఖలు ప్రక్రియ పూర్తయినట్లు అవుతుంది. లేదంటే పరిగణనలోకి తీసుకోరు. ఐటీఆర్ అప్‌లోడ్ చేసిన 30 రోజుల్లోగా దాన్ని వెరిఫై చేయాల్సి ఉంటుంది.

మినహాయింపులు..

సెక్షన్ 80సీ చాలా ముఖ్యం. నిబంధనల ప్రకారం ఈ సెక్షన్ కింద వివిధ పెట్టుబడి పథకాల్లో ఇన్వెస్ట్ చేసిన రూ.1,50,000 వరకూ మినహాయింపు లభిస్తుంది. ఈపీఎఫ్, పీపీఎఫ్, ఈఎల్ఎస్ఎస్, హోమ్ లోన్ అసలు, పిల్లల ట్యూషన్ ఫీజులు, లైఫ్ ఇన్సూరెన్స్ పాలసీ ప్రీమియం వంటివి ఉంటాయి. సెక్షన్ 80డీలో ఆరోగ్య బీమా ప్రీమియం వివరాలు నమోదు చేయాలి. సేవింగ్స్ అకౌంట్ ద్వారా వడ్డీ ఆదాయం రూ.10 వేలకు మించితే సెక్షన్ 80టీటీఏ కింద మినహాయింపు కోరవచ్చు. అలాగే జీతంలో హెచ్ఆర్ఏ లేకుంటే అద్దె చెల్లింపులకు 80జీజీ కింద మినహాయింపు కోరవచ్చు.

ఇతర ఆదాయాలు..

చాలా మంది అదనపు మార్గాల ద్వారా వచ్చే ఆదాయాన్ని ఐటీఆర్‌లో చూపించరు. వడ్డీ, కమీషన్ వంటి వాటి నుంచి వచ్చే ఆదాయం వదిలేస్తారు. వీటన్నింటిపై టీడీఎస్ కట్ చేసి ఉంటారనే ఉద్దేశంతో అవసరం లేదనుకుంటారు. కానీ, ఐటీఆర్‌లో ప్రతీ ఆదాయ మార్గాన్ని పేర్కొనాల్సిందే. లేదంటే తర్వాత ఇబ్బందులు ఎదురువుతాయి. కొన్ని ఆదాయపు పన్ను దగ్గర ఉన్న వివరాలకూ, మీ ఫారం-16కూ సరిపోకపోవచ్చు. మీ వద్ద వసూలు చేసిన పన్నును ఆదాయపు పన్ను విభాగానికి జమ చేయకపోవడం వల్ల ఈ వ్యత్యాసం కనిపిస్తుంది. రిటర్నులు దాఖలు చేసే ముందు ఫారం 16, ఫారం 16ఏ, 26ఏఎస్, వార్షిక సమాచారా నివేదిక పూర్తిగా పరిశీలించాలి. ఏదైనా తేడా ఉంటే మీ యాజమాన్యం దృష్టికి తీసుకెళ్లాలి. ఐటీఆర్ ఫైలింగ్ గడువులోగా పూర్తి చేయాలి. లేదంటే రూ.1000 నుంచి రూ.5 వేల వరకు జరిమానా చెల్లించాల్సి వస్తుంది.