ఎస్బీఐ కొత్త స్కీమ్.. ఈ ఒక్క రోజే ఛాన్స్.. కనీసం రూ. 5 వేలతో చేరొచ్చు
business | Suryaa Desk | Published : Tue, Sep 24, 2024, 11:44 PM
దిగ్గజ మ్యూచువల్ ఫండ్ సంస్థ.. ఎస్బీఐ మ్యూచువల్ ఫండ్ కొద్ది రోజుల కిందట ఎస్బీఐ నిఫ్టీ 500 ఇండెక్స్ ఫండ్ లాంఛ్ చేసింది. దేశీయ స్టాక్ మార్కెట్లోని స్మాల్ క్యాప్, మిడ్ క్యాప్, లార్జ్ క్యాప్ ఇలా అన్ని రంగాల స్టాక్స్‌లో ఇది ఇన్వెస్ట్ చేస్తుంది. దీంతో వైవిధ్యత ఉండి మంచి రిటర్న్స్‌కు అవకాశం ఉంటుందని చెప్పొచ్చు. మ్యూచువల్ ఫండ్లలో ఉన్న ప్రత్యేకతే ఇది. స్టాక్ మార్కెట్లో అయితే కేవలం ఒకే స్టాక్‌లో ఇన్వెస్ట్ చేయడం ద్వారా హెచ్చుతగ్గుల్ని బట్టి లాభనష్టాలు వస్తుంటాయి. అదే మ్యూచువల్ ఫండ్లలో అయితే.. ఒకే మ్యూచువల్ ఫండ్ పథకం ద్వారా పలు స్టాక్స్‌లో ఇన్వెస్ట్ చేసే వీలుంటుంది. ఇక్కడ సమతుల్యత పాటించొచ్చన్నమాట. ఒక దాంట్లో నష్టమొచ్చినా.. మరో దానితో దీనిని పూడ్చుకోవచ్చు. ఈ క్రమంలోనే ఎస్బీఐ మ్యూచువల్ ఫండ్ కొత్త పథకం కూడా ఇన్వెస్టర్లను ఆకర్షిస్తోంది.
నికర ఆస్తుల పరంగా చూస్తే.. ఎస్బీఐ మ్యూచువల్ ఫండ్ అనేది దేశంలో అతిపెద్ద ఫండ్ హౌస్ అని చెప్పొచ్చు. ఇటీవల సెప్టెంబర్ 17న ఈ ఓపెన్ ఎండెడ్ పథకాన్ని తీసుకొచ్చింది. సబ్‌స్క్రిప్షన్ సెప్టెంబర్ 17న ప్రారంభం కాగా.. సెప్టెంబర్ 24 (మంగళవారం) అంటే నేటితో ముగియనుంది. దీని సబ్‌స్క్రిప్షన్ కోసం ఇవాళ ఒక్కరోజే ఉందన్నమాట.
ఇక్కడ నిఫ్టీ 500 ఇండెక్స్‌లోని అన్ని స్టాక్స్‌లో పెట్టుబడి పెడుతుంది. అంటే స్మాల్, మిడ్, లార్జ్ క్యాప్ స్టాక్స్ అన్నింటిలో కలిపి మార్కెట్ విలువ పరంగా టాప్- 500 లో ఉన్న కంపెనీ స్టాక్స్‌లో ఇది ఇన్వెస్ట్ చేస్తుందని చెప్పొచ్చు. ఇక ఈ పథకంలో చేరాలంటే కనీసం రూ. 5 వేలు పెట్టుబడి కావాలి. రూ. 1 మల్టిపుల్స్‌తో తర్వాత ఎంతైనా ఇన్వెస్ట్ చేయొచ్చు. ఇక.. ఇందులో సిప్ (సిస్టమేటిక్ ఇన్వెస్ట్‌మెంట్ ప్లాన్- క్రమానుగత పెట్టుబడి విధానం) విధానంలో కూడా ఇన్వె్స్ట్ చేయొచ్చు. అంటే రోజువారీగా, వారం ప్రాతిపదికన, నెలవారీగా, త్రైమాసికం ప్రాతిపదికన, 6 నెలలకు ఓసారి, ఏడాదికి ఒకసారి ఇలా సిప్ అవకాశం ఉంది.
మ్యూచువల్ ఫండ్లలో దీర్ఘకాలంలోనే మంచి లాభాలు వస్తాయి. ఇక్కడ కాంపౌండింగ్ ఎఫెక్ట్ కారణంగా.. సంపద ఏటా పెరుగుతూనే ఉంటుంది. ఇక్కడ పెట్టుబడిపై వడ్డీ సహా.. వడ్డీపైనా వడ్డీ వస్తూనే ఉంటుంది. అందుకే.. చాలా మంది స్టాక్ మార్కెట్లకు ప్రత్యామ్నాయంగా మ్యూచువల్ ఫండ్ పథకాల్లో ఇన్వెస్ట్ చేసేందుకు ఆసక్తి చూపిస్తుంటారు. ముఖ్యంగా వీటిల్లో ఇన్వెస్ట్ చేసేముందు పాస్ట్ రిటర్న్స్ తెలుసుకోవడం ఉత్తమం.
|
|