బ్యాంక్ అకౌంట్లో ఎంత క్యాష్ డిపాజిట్ చేయొచ్చు

బ్యాంకింగ్ అవసరాల కోసం చాలా మంది దగ్గర ఒకటికి మించి బ్యాంక్ అకౌంట్లు ఉంటాయని చెప్పొచ్చు. చదువుకునే విద్యార్థుల దగ్గర్నుంచి మొదలు.. ఉద్యోగస్తులు, వ్యాపారస్తులు, సినీ, రాజకీయ, క్రీడా ప్రముఖులు ఇలా అందరూ బ్యాంక్ అకౌంట్ వినియోగిస్తుంటారు. ఇందులో సేవింగ్స్ అకౌంట్, శాలరీ అకౌంట్, కరెంట్ అకౌంట్ ఇలా చాలానే ఉంటాయి. ఎక్కువగా సేవింగ్స్ అకౌంట్ వాడుతుంటారు. ఇక్కడ మనం డబ్బులు నిల్వ చేసుకోవచ్చు. ఇందులో డబ్బులపై వడ్డీ కూడా చెల్లిస్తుంటాయి బ్యాంకులు. కొన్ని బ్యాంకులు జీరో బ్యాలెన్స్‌తో పొదుపు ఖాతాల్ని ఆఫర్ చేస్తుండగా.. మరికొన్ని కనీస మొత్తం డిపాజిట్ చేయాలని చెబుతుంటాయి. ప్రభుత్వ ప్రయోజనాలు పొందాలన్నా.. పాన్ కార్డు కోసమైనా.. శాలరీ పడాలన్నా.. డబ్బుల్ని దాచుకోవాలన్నా బ్యాంక్ అకౌంట్ కావాల్సిందే.

ఇంకా ఇప్పుడంతా డిజిటల్ మయం అయిపోయింది. ట్రాన్సాక్షన్స్ అన్నీ ఆన్‌లైన్‌లోనే జరుగుతున్నాయి. చేతిలో నగదు ఉంచుకునే వారి సంఖ్య తగ్గింది. ఆన్‌లైన్ ట్రాన్సాక్షన్స్ చేయాలన్నా .. బ్యాంక్ అకౌంట్ ఉండాలి. అయితే.. ఈ క్రమంలోనే చాలా మంది ఆన్‌లైన్‌లో పెద్ద మొత్తంలో కూడా క్యాష్ ట్రాన్సాక్షన్స్ జరుపుతుంటారు. ఇక్కడే చాలా మందికి ఒక సందేహం వస్తుంటుంది. బ్యాంక్ సేవింగ్స్ ఖాతాలో ఎంత వరకు క్యాష్ జమ చేయొచ్చనే దానిపై చాలా మందికి అవగాహన ఉండదు.

అందుకే బ్యాంక్ అకౌంట్లో క్యాష్ డిపాజిట్ లిమిట్ గురించి తెలుసుకోవాల్సి ఉంటుంది. ఒక పరిమితి దాటితే ఆదాయపు పన్ను శాఖ నుంచి నోటీసులు అందుకునే అవకాశం ఉంటుంది. దీనిపై మీరు ఐటీ శాఖకు వివరణ ఇవ్వాల్సి ఉంటుంది. సేవింగ్స్ అకౌంట్లో ఎంత నగదు అయినా డిపాజిట్ చేసుకోవచ్చు గానీ.. ఒక ఆర్థిక సంవత్సరంలో పొదుపు ఖాతాలో జమ చేయగల మొత్తంపై ఒక లిమిట్ విధించింది. రూ. 10 లక్షలకు మించి క్యాష్ డిపాజిట్ చేసినట్లయితే అప్పుడు ఆదాయపు పన్ను పరిధిలోకి వస్తారు. దీని గురించి మీరు ఇన్‌కం టాక్స్ డిపార్ట్‌మెంట్‌కు తెలియజేయాల్సి ఉంటుంది. దీనిపై మీరు టాక్స్ కట్టాల్సి రావొచ్చు.

రూ. 10 లక్షలకు మించిన క్యాష్ డిపాజిట్లపై బ్యాంకులు కూడా ఆదాయపు పన్ను శాఖకు సమాచారం అందిస్తుంటుంది. దీనిపై మీకు నోటీసులు వస్తే.. దానికి బదులివ్వాల్సి ఉంటుంది. అంటే ఆ ఆదాయంపై ఆధారాలు చూపించాల్సి ఉంటుంది. ఇక క్యాష్ డిపాజిట్ లిమిట్ బ్యాంకుల్లో ట్రాన్సాక్షన్‌పై చాలా వరకు రూ. లక్ష, రోజుకు అయితే రూ. 2 లక్షల వరకు ఉంది. రూ. 50 వేలపైన డిపాజిట్ చేస్తే.. పాన్ కార్డు ధ్రువీకరించుకోవాల్సి ఉంటుంది.