దెబ్బకొట్టిన బీఎస్ఎన్ఎల్.. సరికొత్త ప్లాన్స్ తెస్తున్న జియో.. రోజుకు రూ. 10 తోనే అన్‌లిమిటెడ్ బెనిఫిట్స్
business | Suryaa Desk | Published : Sat, Nov 02, 2024, 11:48 PM
ఇటీవలి కాలంలో ప్రముఖ టెలికాం కంపెనీలు రిలయన్స్ జియో, భారతీ ఎయిర్‌టెల్, వొడాఫోన్- ఐడియా నెట్‌వర్క్ కస్టమర్లు తగ్గిపోతున్నారు. టారిఫ్స్ విపరీతంగా పెంచడమే ఇందుకు ప్రధాన కారణంగా చెప్పొచ్చు. లోక్‌సభ ఎన్నికలు పూర్తయిన కొద్ది రోజులకే వరుసగా టారిఫ్స్ పెంచేశాయి. ముందుగా రిలయన్స్ జియోనే టారిఫ్స్ పెంచుతున్నట్లు ప్రకటించగా.. మరుసటి రోజే ఎయిర్‌టెల్, వొడా- ఐడియా కూడా రేట్లు పెంచుతున్నట్లు వెల్లడించాయి. గరిష్టంగా దాదాపు 25 శాతం వరకు పెరగడంతో కస్టమర్లకు భారీ షాక్ తగిలిందని చెప్పొచ్చు. తప్పనిసరి అయినవారు వీటిల్లోనే కొనసాగుతుండగా.. ఇంకొందరు మాత్రం ఏ మాత్రం అవకాశం వచ్చినా... ప్రభుత్వ టెలికాం సంస్థ బీఎస్ఎన్ఎల్‌వైపు మళ్లారు. అక్కడ టారిఫ్స్ పెంచలేదు. ఇంకా తక్కువ ధరల్లోనే మంచి రీఛార్జ్ ప్లాన్స్ చవకకు తీసుకొచ్చింది.
ఇటీవలి నెలల గణాంకాల్ని పరిశీలిస్తే బీఎస్ఎన్ఎల్ కస్టమర్ల సంఖ్య పెరగ్గా.. ఇదే సమయంలో జియో, ఎయిర్‌టెల్ వంటివి కస్టమర్లను కోల్పోయాయి. ఈ క్రమంలోనే మళ్లీ జియో అప్రమత్తత పాటిస్తోంది. కస్టమర్లను తిరిగి తెచ్చుకునేందుకు లేదా పెంచుకునేందుకు.. కొత్త కొత్త ప్లాన్స్ ప్రకటిస్తోంది. అన్ని వర్గాల అవసరాల్ని తీర్చే దిశగా విభిన్న ప్లాన్స్ ప్రవేశపెడుతోంది.
>> రూ. 999 ధరతో 98 రోజుల వ్యాలిడిటీతో కొత్త ప్లాన్ తెచ్చింది. ఇక్కడ రోజువారీగా 2జీబీ డేటా వస్తుంది. దీంతోనే అన్‌లిమిటెడ్ కాలింగ్ సదుపాయం సహా రోజుకు 100 ఎస్ఎంఎస్ లు ఉచితంగా పొందొచ్చు. 5జీ డేటా సౌలభ్యం పొందొచ్చు. ఇంకా జియో టీవీ, జియో క్లౌడ్, జియో సినిమా వంటి పలు జియో యాప్స్ యాక్సెస్ పొందుతారు. ప్రస్తుతం అందుబాటులో ఉన్నటువంటి అత్యంత ఫీచర్- రిచ్ ప్లాన్స్‌లో ఇదొకటిగా ఉంది. ఈ లెక్కన ఇక్కడ రోజుకు రూ. 10 చొప్పున పడుతుందని గుర్తుంచుకోవాలి. అయితే ఫీచర్లు మాత్రం అద్భుతంగా ఉన్నాయి.
>> మరోవైపు రూ. 3599 యాన్యువల్ ప్లాన్ కూడా లాంఛ్ చేసింది జియో. ఇక్కడ 365 రోజుల వ్యాలిడిటీ వస్తోంది. అపరిమిత కాలింగ్, రోజుకు ఉచితంగా 100 ఎస్ఎంఎస్‌లు పంపుకోవచ్చు. ఇక్కడ సంవత్సరం మొత్తంలో ఏకంగా 912.5 జీబీ డేటా అందుకుంటారు. రోజుకు 2.5 జీబీ డేటా ప్లాన్ అన్నమాట. రోజూ ఎక్కువ డేటా అవసరం ఉన్న వారికి ఇది ఉపయుక్తంగా ఉంటుంది. జియోలో పాపులర్ ప్లాన్లలో రూ. 799 ఉంది. ఇక్కడ డైలీ 1.5 జీబీ డేటా పొందొచ్చు. 84 రోజుల వ్యాలిడిటీతో జియో టీవీ, జియో సినిమా సబ్‌స్క్రిప్షన్ వస్తుంది. అన్‌లిమిటెడ్ కాలింగ్, డైలీ 100 ఎస్ఎంఎస్ సదుపాయం ఉంటుంది.
|
|