రేపే ఏపీ కేబినెట్ భేటీ.. లక్షా 61 వేలకోట్ల ప్రాజెక్టుకు గ్రీన్‌సిగ్నల్

ఆంధ్రప్రదేశ్ మంత్రివర్గ సమావేశం బుధవారం (నవంబర్ 6)న జరగనుంది. రేపు ఉదయం 11 గంటలకు సీఎం చంద్రబాబు నాయుడు అధ్యక్షతన సచివాలయంలో ఏపీ కేబినెట్ భేటీ జరగనుంది. ఈ భేటీలో పలు అంశాలపై మంత్రివర్గం చర్చించి నిర్ణయం తీసుకోనుంది. ఈ నెలలోనే ఏపీ అసెంబ్లీ సమావేశాలు నిర్వహించనున్నారు. ఇప్పటికే నోటిఫికేషన్ కూడా విడుదలైంది. ఈ సమావేశాల్లో పూర్తిస్థాయి బడ్జెట్ ప్రవేశపెట్టనున్నారు. ఈ నేపథ్యంలో బడ్జెట్ గురించి కేబినెట్ భేటీలో చర్చించనున్నారు. అలాగే ఓ భారీ ప్రాజెక్టుకు ఆమోదం కూడా తెలిపే అవకాశాలు ఉన్నాయనే చర్చ జరుగుతోంది.

ఉక్కు సంస్థ.. ఆర్సెలార్‌ మిట్టల్, జపాన్‌కు చెందిన నిప్పాన్ స్టీల్స్‌ జాయింట్ వెంచర్ అయిన ఆర్సెలార్ మిట్టల్ నిప్పాన్ స్టీల్స్ ఇండియా సంస్థ ఏపీలో పెట్టుబడులు పెట్టేందుకు ఆసక్తి చూపుతోంది. అనకాపల్లి జిల్లాలో ఆర్సెలార్ మిట్టల్ నిప్పాన్ స్టీల్స్ ఇండియా ఇంటిగ్రేటెడ్ స్టీల్ ప్లాంట్ ఏర్పాటు చేయాలని భావిస్తోంది. బుధవారం జరిగే ఆంధ్రప్రదేశ్ మంత్రివర్గ సమావేశంలో దీనికి ఆమోదం లభించే అవకాశాలు ఉన్నాయి. దీనికి అవసరమైన ప్రతిపాదనలు కూడా సిద్ధం చేసినట్లు సమాచారం. మరోవైపు ఇంటిగ్రేటెడ్ స్టీల్ ప్లాంట్‌తో పాటుగా కో-టెర్మినస్‌ క్యాప్టివ్‌ పోర్టు అభివృద్ధికి మిట్టల్ సంస్థ ప్రతిపాదనలు పంపింది.

ఆర్సెలార్ మిట్టల్ సంస్థ రెండు దశల్లో ఏపీలో 1.61 లక్షల కోట్ల పెట్టుబడి పెట్టనున్నట్లు సమాచారం. ఈ పెట్టుబడుల ద్వారా 63,000 మందికి ఉపాధి లభించే అవకాశాలు ఉన్నాయి. మొదటి దశలో భాగంగా 7.3 మిలియన్ టన్నుల ఉత్పత్తి సామర్థ్యంతో ఇంటిగ్రేటెడ్ స్టీల్ ప్లాంట్ నిర్మించనున్నారు. ఇందుకోసం నాలుగేళ్లలో రూ.70వేల కోట్లు ఖర్చు చేయనున్నారు. దీని ద్వారా 20వేల మందికి ఉపాధి దొరకనుంది. 2029 జనవరి నాటికల్లా మొదటిదశ పనులు పూర్తిచేస్తామని కంపెనీ తన ప్రతిపాదనల్లో పేర్కొంది. ఇక రెండో దశలో రూ.80వేల కోట్ల పెట్టుబడితో స్టీల్ ప్లాంట్ పనులు నిర్వహించనున్నారు. రెండో దశ పనులను 2033 నాటికి పూర్తి చేస్తామని కంపెనీ తన ప్రతిపాదనల్లో తెలిపింది. దీని ద్వారా మరో 35వేల మందికి ఉపాధి కల్పించనున్నట్లు ఆర్సెలార్ మిట్టల్ సంస్థ వెల్లడించింది.

మరోవైపు ఆర్సెలార్ మిట్టల్ ఇంటిగ్రేటెడ్ స్టీల్‌ప్లాంట్ కోసం నక్కపల్లి మండలంలో 2164.31 ఎకరాల భూమిని ప్రభుత్వం గుర్తించింది. ఏపీఐఐసీకి చెందిన భూములు అందుబాటులో ఉన్నట్లు జిల్లా కలెక్టర్‌ నివేదిక ఇచ్చారు. ఆర్సెలార్ మిట్టల్ కంపెనీ ప్రతిపాదనలపైనా, కలెక్టర్ నివేదికపైనా ఏపీ కేబినెట్‌లో చర్చించే అవకాశం ఉంది. అలాగే కంపెనీ ప్రతిపాదనలకు కూడా ఆమోదించనున్నట్లు సమాచారం.