మహిళలకు సర్కార్ శుభవార్త.. ఉద్యోగాల్లో భారీగా రిజర్వేషన్లు పెంపు

మధ్యప్రదేశ్‌లో అధికారంలో ఉన్న మోహన్ యాదవ్ నేతృత్వంలోని బీజేపీ ప్రభుత్వం.. సంచలన నిర్ణయం తీసుకుంది. మహిళా రిజర్వేషన్లను పెంచుతూ తీసుకున్న నిర్ణయానికి మధ్యప్రదేశ్ మంత్రివర్గం ఆమోదం తెలిపింది. ప్రభుత్వ ఉద్యోగాల్లో మహిళలకు 35 శాతం రిజర్వేషన్లను కల్పించనున్నట్లు వెల్లడించింది. ఈ నేపథ్యంలోనే భోపాల్‌లోని మంత్రాలయలో ముఖ్యమంత్రి మోహన్ యాదవ్ అధ్యక్షతన జరిగిన కేబినెట్ సమావేశంలో మహిళా రిజర్వేషన్ల పెంపుపై నిర్ణయం తీసుకున్నారు. ఆ తర్వాత తాజాగా మధ్యప్రదేశ్ కేబినెట్ తీసుకున్న నిర్ణయాన్ని డిప్యూటీ సీఎం రాజేంద్ర శుక్లా వెల్లడించారు.

మధ్యప్రదేశ్‌లో ప్రభుత్వ సర్వీసుల కింద అన్ని రిక్రూట్‌మెంట్లలో మహిళలకు 33 శాతం రిజర్వేషన్లు అమలు చేస్తున్నారు. తాజాగా మరో 2 శాతం పెంచడంతో ఇప్పటి నుంచి విడుదలయ్యే అన్ని ప్రభుత్వ నోటిఫికేషన్లకు మహిళా రిజర్వేషన్లు 35 శాతం అమలు చేయనున్నారు. ఈ క్రమంలోనే మహిళా సాధికారతకు మధ్యప్రదేశ్‌లోని బీజేపీ ప్రభుత్వం తీసుకున్న ముందడుగు అని ఆ రాష్ట్ర ఉపముఖ్యమంత్రి రాజేంద్ర శుక్లా అభివర్ణించారు.

సివిల్ సర్వీస్ రిక్రూట్‌మెంట్‌ సహా అన్ని రాష్ట్ర ప్రభుత్వ ఉద్యోగాలకు ఈ 35 శాతం రిజర్వేషన్లు వర్తిస్తాయని మధ్యప్రదేశ్ ప్రభుత్వ వర్గాలు వెల్లడించాయి. అన్ని సర్వీసుల్లో మహిళల రిజర్వేషన్ శాతాన్ని పెంచుతున్నట్టు ఆయన స్పష్టం చేశారు. అంతేకాకుండా రాష్ట్రంలోని మెడికల్ కాలేజీల్లో అసిస్టెంట్ ప్రొఫెసర్ల నియామకానికి గతంలో ఉన్న వయో పరిమితిని పెంచడం సహా మరిన్ని కీలక నిర్ణయాలకు మంత్రిమండలి ఆమోద ముద్ర వేసినట్లు వివరించారు. ఇప్పటివరకు మధ్యప్రదేశ్‌లో మెడికల్ కాలేజీ అసిస్టెంట్ ప్రొఫెసర్ల వయో పరిమితి 40 ఏళ్లు ఉండగా.. దాన్ని మరో 10 ఏళ్లు పెంచడంతో అది కాస్తా 50 ఏళ్లకు పెరిగింది.