ఏపీ సీఎం చంద్రబాబుపై షర్మిల ఆగ్రహం,,,,విద్యుత్ భారం మోపొద్దంటూ ఆందోళన

గత వైఎస్సార్‌సీపీ ప్రభుత్వం తప్పులు చేసింది కాబట్టే.. ప్రజలు వారికి బుద్ది చెప్పారన్నారు ఆంధ్రప్రదేశ్ కాంగ్రెస్ పార్టీ చీఫ్ వైఎస్ షర్మిల. జగన్ ప్రజలపై రూ.35 వేల కోట్ల విద్యుత్ ఛార్జీల భారాన్ని మోపారని.. ఇఫ్పుడు చంద్రబాబు ఇదే తప్పు చేస్తే.. ప్రజలు ఎవరికి చెప్పుకోవాలని ప్రశ్నించారు. కూటమి ప్రభుత్వం అధికారంలోకి వచ్చిన నాలుగు నెలల్లోనే ప్రజలపై ఇంత భారం మోపడం అన్యాయం కాదా అన్నారు. రాష్ట్రంలో విద్యుత్ ఛార్జీల పెంపును వ్యతిరేకిస్తూ కాంగ్రెస్ పార్టీ విజయవాడలో ధర్నా చేపట్టింది. ఈ ధర్నాలో ఏపీసీసీ చీఫ్ వైఎస్ షర్మిల లాంతర్లు చేతపట్టి వినూత్నంగా నిరసన చేశారు. నేటి మూడు రోజుల పాటు రాష్ట్ర వ్యాప్తంగా ఆందోళనలు నిర్వహిస్తున్నామన్నారు.

ఐదు నెలల పాలనలోనే ప్రజలకు చుక్కలు చూపిస్తున్నారు చంద్రబాబు అంటూ మండిపడ్డారు షర్మిల. గత వైఎస్సార్‌సీపీ ప్రభుత్వం తప్పు చేస్తే.. ఇప్పుడు శిక్ష ప్రజలకా అంటూ ప్రశ్నించారు. ఈ విషయంలో కేంద్రంతో చంద్రబాబు చర్చలు జరిపి.. ప్రజలపై భారం లేకుండా చూడాలని కోరారు. గత ప్రభుత్వాన్ని ఒక చేత్తో ఇస్తున్నారు.. మరో చేతితో తీసుకుంటున్నారన్నారని.. ఇప్పుడు కూటమి ప్రభుత్వం ఇస్తుంది పావల అయితే.. ప్రజల నుంచి వసూలు చేస్తుంది రూపాయి అని విమర్శించారు. అసలు సూపర్ సిక్స్ పూర్తిగా అమలు చేయకుండా ప్రజలను మోసం చేశారని మండిపడ్డారు. కేంద్రంలో ఎన్డీఏ అధికారంలో ఉందంటే.. ఏపీ ఎంపీలే కారణమని.. వెంటనే కేంద్రంతో మాట్లాడి విద్యుత్ ఛార్జీల భారం ప్రజలపై మోపకుండా చంద్రబాబు బాధ్యత తీసుకోవాలని కోరారు.

ప్రజలు ఏం పాపం చేశారు.. ఓట్లు వేసి గెలిపించడమే పాపమా అన్నారు షర్మిల. వైఎస్సార్‌సీపీ ప్రభుత్వం తొమ్మిది సార్లు కరెంటు ఛార్జీలు పెంచారని చంద్రబాబు ప్రతిపక్ష నేత హోదాలో ఆవేదన వ్యక్తం చేశారని.. అప్పుడు ఏకంగా రూ.35వేల కోట్ల భారం మోపారని చంద్రబాబు ఏడ్చినంత పని చేశారన్నారు. తమ టీడీపీ అధికారంలో ఉంటే ఈ భారాలు ఉండేవి కాదని.. 30 శాతం ఛార్జీలు తగ్గించే వాళ్లమని ఆయన చేసిన వ్యాఖ్యల్ని గుర్తు చేశారు. గత ప్రభుత్వంపై ఇన్ని మాటలు మాట్లాడిన చంద్రబాబు.. నాలుగు నెలల్లోనే ప్రజలపై రూ. 17వేల కోట్ల భారం ఎలా మోపుతున్నారని మండిపడ్డారు.

వైఎస్సార్‌సీపీ ప్రభుత్వం తప్పులు చేస్తేనే కూటమి పార్టీలకు ప్రజలు అధికారం ఇచ్చారన్న సంగతి మర్చిపోకూడదన్నారు షర్మిల. గత ప్రభుత్వం తప్పు చేస్తే విచారణ చేసి శిక్షించాలని.. అంతేకాని ప్రజలపై ఇలా భారం మోపడం సరికాదన్నారు. రాష్ట్రంలో వరదలతో ప్రజలు నష్టపోయారని.. నిత్యావసర వస్తువుల ధరలు భారీగా పెరిగాయన్నారు. ఇలాంటి కష్ట కాలంలో వారిపై భారం మోపడం ఏంటని ప్రశ్నించారు. ఏపీ ప్రజలకు ఇంత కష్టం వస్తే కేంద్రం ఎందుకు ఆదుకోవడం లేదన్నారు. కేంద్రంలోని ఎన్డీఏ ప్రభుత్వం ప్రత్యేక హోదా నుంచి ఆంధ్రప్రదేశ్‌కు అన్ని వెన్నుపోట్లేనని.. అన్నీ మోసాలేనని ధ్వజమెత్తారు. ఇంత అన్యాయం జరుగుతున్నా చంద్రబాబు ఎందుకు కేంద్రాన్ని నిలదీయడం లేదని.. ఇప్పుడు తీసుకున్న నిర్ణయాలను రోల్ బ్యాక్ చేయాలని కేంద్రాన్ని డిమాండ్ చేయాలన్నారు. వెంటనే విద్యుత్ ఛార్జీల పెంపు నిర్ణయాన్ని ఉపసంహరించుకోవాలని కోరారు.