మోదీ సర్కార్ గుడ్‌న్యూస్.. ఇక వారందరికీ రూ.10 లక్షలు, అప్లై చేసుకోండి

ప్రధానమంత్రి నరేంద్ర మోదీ అధ్యక్షతన బుధవారం సమావేశం అయిన కేంద్ర కేబినెట్.. పలు కీలక నిర్ణయాలకు పచ్చజెండా ఊపింది. పీఎం విద్యాలక్ష్మి పథకానికి తాజాగా కేంద్ర కేబినెట్ ఆమోదం కల్పించింది. డబ్బు లేక పేద విద్యార్థులు ఉన్నత విద్యను అభ్యసించేందుకు దూరం అవుతుండటంతో వారికి మేలు చేసేందుకు కేంద్రం.. ఈ పీఎం విద్యాలక్ష్మి పథకాన్ని అందుబాటులోకి తీసుకువచ్చింది.

ఈ పీఎం-విద్యాలక్ష్మీ పథకం ద్వారా దేశవ్యాప్తంగా ఉన్న 860 విద్యాసంస్థల్లో ప్రవేశాలు పొందిన విద్యార్థులకు ఈ ప్రయోజనం కలగనుంది. ఆ విద్యార్థులకు రూ.7.50 లక్షల వరకు లోన్ లభించనుంది. విద్యార్థులకు ఈ లోన్‌ ఇచ్చేందుకు.. కేంద్రం హామీ ఇవ్వనుంది. ఈ లోన్‌లో 75 శాతం వరకు బ్యాంకులకు కేంద్ర ప్రభుత్వం గ్యారంటీ ఇస్తుంది. ఈ పీఎం విద్యాలక్ష్మి పథకం ద్వారా ప్రతీ సంవత్సరం 22 లక్షల మందికి పైగా ప్రతిభావంతులైన విద్యార్థులకు లబ్ది చేకూరనుంది. పీఎం విద్యాలక్ష్మి పథకం కింద నాణ్యమైన ఉన్నత విద్యాసంస్థలో అడ్మిషన్ తీసుకునే ఏ విద్యార్థికి అయినా ట్యూషన్ ఫీజులు, ఇతర కోర్సు సంబంధిత ఖర్చులను భరించడానికి.. ఎలాంటి హామీ గానీ.. తాకట్టు గానీ లేకుండా బ్యాంకులు, ఆర్థిక సంస్థల నుంచి కేంద్రం హామీతో లోన్ అందిస్తారు. ఈ పథకం పూర్తిగా డిజిటల్‌గా ఉండి.. సరళమైన, పారదర్శకమైన, స్టూడెంట్ ఫ్రెండ్లీ వ్యవస్థ ద్వారా అందించనున్నట్లు కేంద్రం తెలిపింది.

ఈ పథకంలో భాగంగా రూ.8 లక్షల లోపు వార్షిక ఆదాయం ఉన్నవారికి ఈ పథకం వర్తింపజేయనున్నారు. రూ.10 లక్షల వరకు రుణాలపై 3 శాతం వడ్డీ రాయితీ కూడా కల్పించనున్నారు. అయితే ఇప్పటికే ఏదైనా ప్రభుత్వ స్కాలర్‌షిప్‌ అందుకుంటున్న విద్యార్థులు ఈ పథకానికి అనర్హులు అని కేంద్రం వెల్లడించింది. పీఎం విద్యాలక్ష్మి వెబ్‌సైట్‌ ద్వారా అర్హులైన విద్యార్థులు ఈ లోన్‌ల కోసం దరఖాస్తు చేసుకోవచ్చని కేంద్ర ప్రభుత్వ వర్గాలు తెలిపాయి.

ఈ క్రమంలోనే బుధవారం సమావేశం అయిన కేంద్ర మంత్రి వర్గం తీసుకున్న నిర్ణయాలను కేంద్ర రైల్వే శాఖ మంత్రి అశ్వినీ వైష్ణవ్‌ తాజాగా మీడియాకు వెల్లడించారు. పీఎం విద్యాలక్ష్మి పథకంతోపాటు తీసుకున్న మరిన్ని నిర్ణయాలను వివరించారు. ఫుడ్ కార్పొరేషన్ ఆఫ్ ఇండియా - ఎఫ్‌సీఐలో మూలధన అవసరాల కోసం ఏకంగా రూ.10,700 కోట్లను కేటాయించేందుకు కేంద్ర కేబినెట్ ఆమోదం తెలిపినట్లు అశ్వినీ వైష్ణవ్ పేర్కొన్నారు. ఎఫ్‌సీఐ ఆపరేషన్ సామర్థ్యాన్ని పెంచుకునేందుకు కేంద్రం భారీగా నిధులు కేటాయించిందని తెలిపారు. 2004-14 మధ్య 10 ఏళ్లతో పోల్చితే.. 2014-2024 మధ్య 10 ఏళ్లలో రైతులకు 4 రెట్లు అధికంగా ఆహార సబ్సిడీని తమ ప్రభుత్వం అందించిందని మంత్రి అశ్వినీ వైష్ణవ్ స్పష్టం చేశారు.