మైక్ ముందు మంత్రినే కాదు.. మక్కెలిరగ్గొట్టించే మంత్రిని కూడా.. అంబటికి అనిత కౌంటర్

ఏపీలో అధికార, ప్రతిపక్ష నేతల మధ్య నిరంతరం ఏదో ఒక విషయంలో మాటల యుద్ధం కొనసాగుతూనే ఉంది. తాజాగా డిప్యూటీ సీఎం పవన్ కళ్యాణ్.. హోంశాఖపై చేసిన వ్యాఖ్యల నేపథ్యంలో.. వైసీపీ నేతలు హోంమంత్రి వంగలపూడి అనిత రాజీనామా చేయాలని డిమాండ్ చేస్తున్నారు. కూటమి సర్కారు శాంతిభద్రతల పర్యవేక్షణలో విఫలమైందని.. ప్రజలు ఈ ప్రభుత్వాన్ని ఇంటికి పంపుతారంటూ విమర్శిస్తున్నారు. ఈ క్రమంలోనే విలేకర్లతో మాట్లాడిన మాజీ మంత్రి అంబటి రాంబాబు హోంమంత్రి అనితపై విమర్శలు చేశారు. మీడియాతో మాట్లాడుతూ.. ఏపీ హోంమంత్రి మైకుల ముందు మాత్రమే మంత్రి అంటూ ఎద్దేవా చేశారు. పోలీసులను బదిలీ చేసే అధికారం కూడా ఆమెకు లేదంటూ సెటైర్లు వేశారు.

ఈ నేపథ్యంలో అంబటి రాంబాబు చేసిన వ్యాఖ్యలకు హోంమంత్రి వంగలపూడి అనిత కౌంటరిచ్చారు. ఈ మేరకు ఎక్స్ వేదికగా వంగలపూడి అనిత ట్వీట్ చేశారు. " అంబటి రాంబాబు గారూ.. నేను మైక్ ముందు హోంమంత్రినే కాదు.. మాతృమూర్తులతో సమానమైన స్త్రీజాతిని అగౌరపరుస్తూ అసభ్యంగా మాట్లాడే వారిని అంబేద్కర్ భావజాలంతో లాఠీ ఝులిపించి మక్కెలిరగ్గొట్టించే హోంమంత్రిని. వావివరుసలు లేకుండా ఆడపడుచులపై అచ్చోసిన ఆంబోతుల్లా సోషల్ మీడియాలో విరుచుకుపడే విపరీతాలని గట్టిగా ఎదిరించే విపత్తు నిర్వహణ శాఖ మంత్రిని. పైకి వేషధారణ, వస్త్రధారణ మారినా లోపల బుద్ధిమారని ఉగ్రవాద మనస్తత్వం కలిగిన వారితో చిప్పకూడు తినిపించే ఆత్మాభిమానం కలిగిన మహిళా మంత్రిని. సమాజానికి చీడపురుగుల్లా మారి..చిన్నారులు, మహిళలు, వృద్ధులనే తేడాలేకుండా ప్రవర్తించే ఉన్మాద,తీవ్రవాదులను చట్టప్రకారం కఠిన శిక్ష వేయించే సంకల్పమున్న హోంమంత్రిని కూడా" అంటూ ట్వీట్ చేశారు.

అయితే వంగలపూడి అనిత ట్వీట్‌కు అంబటి రాంబాబు రివర్స్ కౌంటర్ ఇచ్చారు. వంగలపూడి అనిత సెల్ఫ్ సర్టిఫికేట్‌కు తనకు అభ్యంతరం లేదన్న అంబటి రాంబాబు.. సంతోషం కూడా అని చెప్పుకొచ్చారు. అలాగే హోంమంత్రి బాధ్యతలు తీసుకోవాలని.. లేదంటే తాను బాధ్యతలు తీసుకుంటే పరిస్థితులు వేరుగా ఉంటాయన్న పవన్ కళ్యాణ్‌కు వంగలపూడి అనిత ఇవి చెప్పాలి కానీ తనకు కాదంటూ సెటైర్లు వేశారు.

ఇటీవల పిఠాపురం పర్యటనకు వెళ్లిన పవన్ కళ్యాణ్.. ఏపీలో శాంతిభద్రతలపై మాట్లాడుతూ హోంమంత్రి అనిత బాధ్యతలు తీసుకోవాలని అన్నాకు. పరిస్థితులు ఇలాగే కొనసాగితే తాను బాధ్యతలు తీసుకుంటానని.. తాను హోంమంత్రి అయితే పరిస్థితి వేరేగా ఉంటుందంటూ వ్యాఖ్యలు చేశారు. దీని ఆధారంగా ప్రభుత్వంపై వైసీపీ విమర్శలు చేస్తోంది.