దేశంలోనే తొలి సీ ప్లేన్ సర్వీస్ అక్కడే.. ప్రస్తుత పరిస్థితి ఏంటంటే

పర్యాటక రంగానికి ఊతమిచ్చేలా ఏపీ ప్రభుత్వం సరికొత్త కార్యక్రమం ప్రారంభించనుంది. విజయవాడ దుర్గమ్మను దర్శించుకున్న భక్తులు.. శ్రీశైలం మల్లన్నను కూడా త్వరగా దర్శించుకునేలా రెండు ప్రాంతాల మధ్య సీ ప్లేన్ సర్వీస్ అందుబాటులోకి తేనుంది. నవంబర్ 9న విజయవాడ శ్రీశైలం సీ ప్లేన్ సర్వీసును ముఖ్యమంత్రి నారా చంద్రబాబు నాయుడు ప్రారంభిస్తారు. అయితే ప్రారంభం కంటే ముందు ట్రయల్ రన్ నిర్వహించారు. విజయవాడ ప్రకాశం బ్యారేజీ నుంచి శ్రీశైలం వరకూ సీ ప్లేన్ నడిపారు. శ్రీశైలం జలాశయంలో సీ ప్లేన్ సురక్షితంగా దిగింది. దీంతో ట్రయల్ రన్ విజయవంతమైనట్లు అధికారులు ప్రకటించారు. డీ హవిల్లాండ్ ఎయిర్‌క్రాఫ్ట్ సంస్థ ఈ సీ ప్లేన్ తయారుచేసింది. ఇందులో మొత్తం 14 సీట్లు ఉన్నాయి. నవంబర్ 9న విజయవాడ పున్నమిఘాట్‌లో చంద్రబాబు ఈ సీ ప్లేన్ ప్రారంభిస్తారు.

మరోవైపు ఇప్పటికే మన దేశంలో రెండు చోట్ల సీ ప్లేన్ సర్వీసులు ప్రారంభమయ్యాయి. అండమాన్ నికోబార్ దీవులతో పాటుగా, గుజరాత్‌లోనూ సీ ప్లేన్ సర్వీసులు ప్రారంభించారు. దేశంలోనే తొలి సీ ప్లేన్ సర్వీసును గుజరాత్‌లో ప్రారంభించారు. కెవాడియాలోని సర్దార్ వల్లభభాయ్ పటేల్ ఐక్యతా విగ్రహం నుంచి అహ్మదాబాద్‌లోని సబర్మతి రివర్ ఫ్రంట్ మధ్య సీ ప్లేన్ సర్వీసును ప్రధానమంత్రి నరేంద్ర మోదీ 2020 నవంబర్‌లో ప్రారంభించారు. అయితే కరోనా మహమ్మారి రావటంతో 2021 ఏప్రిల్‌లో ఈ సీ ప్లేన్ సర్వీస్‌ను నిలిచిపోయింది.

గుజరాత్‌లో ప్రధానమంత్రి నరేంద్ర మోదీ ప్రారంభించిన సీ ప్లేన్ సర్వీస్ కేవలం 80 రోజులు మాత్రమే సేవలు అందించింది. 2023 ఏప్రిల్ నుంచి ఈ సీ ప్లేన్ సేవలు నిలిపివేశారు.2024-25 బడ్జెట్ సందర్భంగా గుజరాత్ విమానయానశాఖ మంత్రి బల్వంత్ సింగ్ రాజ్‌పుత్.. గుజరాత్ అసెంబ్లీలో ఈ విషయాన్ని వెల్లడించారు. సర్దార్ వల్లభభాయ్ పటేల్ విగ్రహం వద్దకు పర్యాటకులకు ఆకర్షించేందుకు, ఆ ప్రాంతంలో పర్యాటక రంగం అభివృద్ధి కోసం ఈ సీ ప్లేన్ సర్వీస్ తెచ్చారు. అలాగే కెవాడియా , అహ్మదాబాద్ మధ్య దూరం 200 కిలోమీటర్లు కాగా.. ఈ దూరాన్ని కేవలం 45 నిమిషాల్లో చేరుకునేలా ఈ సీ ప్లేన్ ప్లాన్ చేశారు.

 అయితే 2 నెలల పాటు సేవలు అందించిన గుజరాత్ సీ ప్లేన్ సర్వీస్ ద్వారా 2,192 మంది ప్రయాణం సాగించారు. అయితే కరోనా సమయంలో వాణిజ్యపరమైన కారణాలతో స్పైస్ షటిల్ సంస్థ దీని నిర్వహణ నుంచి తప్పుకుంది. అలాగే టికెట్ రేట్లను కూడా రూ.5000 చేశారు. సర్వీసులను కూడా తగ్గిస్తూ వచ్చారు. ఆ తర్వాత 2023 ఏప్రిల్ నుంచి నిలిపివేశారు. సీ ప్లేన్ నిర్వహణ చూడ్డానికి ఏ సంస్థ ముందుకు రాని పరిస్థితుల్లో ప్రస్తుతం సర్వీసులు ఆగిపోయినట్లు బడ్జెట్ సందర్భంగా అప్పట్లో గుజరాత్ మంత్రి వెల్లడించారు. సీ ప్లేన్ నిర్వహణకు ఏ సంస్థ ఆసక్తి చూపకపోవటంతో దేశంలోనే తొలి సీ ప్లేన్ సర్వీసుగా నిలిచిన కెవాడియా అహ్మదాబాద్ సీ ప్లేన్ సర్వీస్ ప్రస్తుతం ఆగిపోయింది.