ఏపీలో పింఛన్లు తీసుకునేవారికి గమనిక.. ఇకపై వాళ్లకు అకౌంట్‌లలో డబ్బులు జమ, ఇలా చేయండి!

ఆంధ్రప్రదేశ్ ప్రభుత్వం పింఛన్‌ విషయంలో మరో కీలక నిర్ణయం తీసుకుంది. కొంతమంది విద్యార్థులు దివ్యాంగ పింఛన్‌లు పొందుతున్నారు.. వారిలో కొందరు సొంత ఊరికి దూరంగా హాస్టల్స్, గురుకులాల్లో చదువుకుంటున్నారు. వీరు ప్రతి నెల సొంత ఊరికి వచ్చి పింఛన్ తీసుకోవాల్సి వస్తోంది. ప్రతినెలా సెలవు పెట్టి ఊరికి రావడం ఆర్థికంగా ఇబ్బందిగా మారగా.. మరికొందరు ప్రయాణం చేయడానికి ఇబ్బందిపడుతున్నారు. ఈ సమస్యలకు చెక్ పెడుతూ ప్రభుత్వం కీలక నిర్ణయం తీసుకుంది. ఇకపై వారి బ్యాంకు అకౌంట్‌లలోనే డబ్బులు జమ చేయాలని నిర్ణయించింది. దివ్యాంగ విద్యార్థులకు పింఛన్‌ డబ్బుల్ని బ్యాంకు అకౌంట్‌లలో జమ చేసేందుకు అధికారులు సిద్ధమయ్యారు.

ఇలా బ్యాంక్ అకౌంట్‌లో పింఛన్ డబ్బుల్ని జమ చేసే వెసులుబాటు కేవలం దూర ప్రాంతాల్లో చదువుకుంటున్న వారికే పరిమితం చేసింది ప్రభుత్వం. అలాగే తమకు బ్యాంకు అకౌంట్‌లలో పింఛన్ డబ్బుల్ని జమ చేసేందుకు సమ్మతి తెలిపిన వారికే వర్తింపచేస్తారు. గ్రామ, వార్డు సచివాలయాల ద్వారా అర్హులను గుర్తించే పనిలో ఉన్నారు అధికారులు. ఈ మేరకు పింఛన్ పొందే దివ్యాంగులైన విద్యార్థులు దూర ప్రాంతంలో ఉండి చదువుకుంటుంటే.. వారికి డీబీటీ ద్వారా బ్యాంకు అకౌంట్‌లో డబ్బులు జమ చేసేందుకు ప్రభుత్వం అవకాశం కల్పించినట్లు అధికారులు తెలిపారు.

ఇలా పింఛన్ డబ్బుల్ని ప్రతి నెలా నేరుగా బ్యాంక్ అకౌంట్‌లలో జమ చేసేందుకు కొన్ని డాక్యుమెంట్లు సమర్పించాలని అధికారులు సూచిస్తున్నారు. విద్యార్థులు స్టడీ సర్టిఫికేట్, బ్యాంక్ పాస్‌బుక్ మొదటి పేజీ కాపీ, ఆధార్ కార్డు కాపీ, సదరం సర్టిఫికెట్, పెన్షన్ ఐడీ, స్కూల్ / కాలేజీ ఐడీ, సెల్ఫ్ ఫోటో, ఎంపీడీఓ ధ్రువీకరిస్తూ పత్రం సమర్పించాలన్నారు. ఈ డాక్యుమెంట్లను డీఆర్డీఏ పీడీ కార్యాలయంలో అందించాలని సూచించారు. ఈ అవకాశాన్ని ఉపయోగించుకోవాలని అధికారులు సూచిస్తున్నారు. ప్రతినెలా ఊరికి వెళ్లి డబ్బులు తీసుకునే పని లేకుండా.. నేరుగా బ్యాంక్ అకౌంట్‌లలోనే డబ్బుల్ని జమ చేయనున్నారు. వచ్చే నెల నుంచి ఈ విధానాన్ని అమలు చేసే అవకాశం ఉంది.

ప్రతి నెలా ఒకటో తేదీన ఇచ్చే పింఛను తీసుకోవడానికి.. ఒక రోజు ముందే కాలేజీలు, స్కూళ్లలో అనుమతి తీసుకుని అవస్థలు పడుతూ రావాల్సి వచ్చేదంటున్నారు దివ్యాంగ విద్యార్థులు. ఒంటరిగా ఊరికి రావడానికి ఇబ్బందిగా మారిందని.. తిరిగి వెళ్లడానికి అవస్థలు పడుతున్నామంటున్నారు. దీనికి తోడు ఆర్థికంగా భారంగా మారిందంటున్నారు.. తమ ఇబ్బందులను దృష్టిలో ఉంచుకుని బ్యాంకు అకౌంట్‌లలో పింఛను సొమ్ము జమ చేయడానికి ప్రభుత్వం తీసుకున్న నిర్ణయంపై హర్షం వ్యక్తం చేస్తున్నారు.

రాష్ట్రవ్యాప్తంగా దివ్యాంగుల కోటాలో ఎన్టీఆర్‌ భరోసా పథకం కింద 8.50 లక్షల మంది ప్రతి నెలా పింఛన్‌లు తీసుకుంటున్నారు. వీరికి వయసుతో సంబంధం లేకుండా 45 శాతం వైకల్యం పైబడిన వారికి వివిధ విభాగాల్లో రూ.6 వేల నుంచి రూ.15 వేల వరకు పించన్ అందిస్తోంది ప్రభుత్వం. వీరిలో 10వేలమంది విద్యార్థులు గురుకులాలు, హాస్టల్స్‌లో చదువుకుంటూ పింఛను అందుకుంటున్నట్లు గుర్తించారు. వీరిలో సమ్మతి తెలిపిన వారికి బ్యాంక్ అకౌంట్‌లలోకి పింఛన్ డబ్బుల్ని జమ చేస్తారు.