ప్రత్యేక బృందాల ప్లాన్ సక్సెస్.. పోలీసులకు చిక్కిన వర్రా రవీందర్ రెడ్డి

వైసీపీ సోషల్ మీడియా కార్యకర్త వర్రా రవీందర్‌రెడ్డిని ఏపీ పోలీసులు అదుపులోకి తీసుకున్నట్లు తెలిసింది. ఇటీవల పులివెందుల వద్ద వర్రా రవీందర్‌రెడ్డిని పోలీసులు అదుపులోకి తీసుకున్నారు. అనంతరం 41ఏ కింద నోటీసులు ఇచ్చి విడిచిపెట్టారు. మరో కేసు కింద అదుపులోకి తీసుకోవడానికి వెళ్తే అప్పటికే వర్రా రవీందర్ రెడ్డి అజ్ఞాతంలోకి వెళ్లిపోయాడు. ఈ నేపథ్యంలో అప్పటి నుంచి గాలిస్తున్న పోలీసులు శుక్రవారం అతన్ని అదుపులోకి తీసుకున్నట్లు తెలిసింది. ఏపీ- తెలంగాణ సరిహద్దుల్లోని మహబూబ్‌నగర్ ప్రాంతంలో వర్రా రవీందర్‌రెడ్డి పోలీసులకు చిక్కినట్లు సమాచారం. శనివారం మీడియా ఎదుట హాజరుపరిచే అవకాశాలు ఉన్నాయి.

వైసీపీ ప్రభుత్వ హయాంలో.. అప్పటి ప్రతిపక్షనేతలపై వర్రా రవీందర్ రెడ్డి సోషల్ మీడియా వేదికగా అభ్యంతర వ్యాఖ్యలు, పోస్టులు పెట్టారనే ఆరోపణలు ఉన్నాయి. చంద్రబాబు, పవన్‌ కల్యాణ్, నారా లోకేష్, వైఎస్ షర్మిల, వంగలపూడి అనిత, వైఎస్ సునీత సహా పలువురు విపక్ష నేతలపై అసభ్యకరమైన పోస్టులు పెట్టారు. ఈ నేపథ్యంలోనే పోలీసులు పులివెందుల వద్ద మంగళవారం వర్రా రవీందర్ రెడ్డిని అదుపులోకి తీసుకున్నారు. అనంతరం కడప పోలీస్ స్టేషన్‌కు తరలించి.. బుధవారం తెల్లవారుజామున 41ఏ నోటీసులు ఇచ్చి విడిచిపెట్టారు. అయితే మరో కేసులో వర్రాను అరెస్ట్ చేసేందుకు రాజంపేట పోలీసులు వెళ్లగా.. అప్పటికే వర్రా రవీందర్ రెడ్డి కనిపించకుండా పోయాడు.

అయితే వర్రా రవీందర్‌రెడ్డిని కడప పోలీసులు వదిలేయడంపై ఏపీ ప్రభుత్వం సీరియస్ అయ్యింది. ముఖ్యమంత్రి నారా చంద్రబాబు నాయుడు, డీజీపీ ద్వారకా తిరుమలరావు దీనిపై ఆగ్రహం వ్యక్తం చేశారు. డీజీపీ ఆదేశాలతో కర్నూలు రేంజ్ డీఐజీ ప్రవీణ్ కుమార్.. కడప జిల్లా ఎస్పీ కార్యాలయానికి చేరుకుని దీనిపై విచారించారు. అనంతరం డీఐజీ నివేదిక మేరకు కడప జిల్లా ఎస్పీ హర్షవర్ధన్ రాజును ప్రభుత్వం బదిలీ చేసింది. మరో పోలీసు అధికారిపైనా చర్యలు తీసుకుంది. వర్రా రవీందర్ రెడ్డిని అదుపులోకి తీసుకునేందుకు నాలుగు ప్రత్యేక బృందాలను కూడా ఏర్పాటు చేసింది. ఈ బృందాలు హైదరాబాద్, పులివెందుల, బెంగళూరు, కమలాపురం ప్రాంతాల్లో గాలింపు చర్యలు చేపట్టాయి. ఈ నేపథ్యంలో మహబూబ్‌నగర్‌ పరిసర ప్రాంతాల్లో వర్రా రవీందర్‌రెడ్డిని పోలీసులు అరెస్ట్ చేసినట్లు తెలిసింది. శనివారం మీడియా ఎదుట హాజరుపరిచే అవకాశాలు ఉన్నాయి. వర్రా రవీందర్ రెడ్డి మీద మంగళగిరితో పాటుగా హైదరాబాద్‌లోనూ కేసులు నమోదయ్యాయి.