10 ఏళ్లు దాటిన వాహనాలు సీజ్.. 45 రోజుల్లో 2200 వెహికల్స్ స్వాధీనం

దేశ రాజధాని ఢిల్లీలో రోజురోజుకూ కాలుష్యం తీవ్రతరం అవుతుండటంతో ఢిల్లీ సర్కార్ అనేక చర్యలు చేపడుతోంది. ఈ క్రమంలోనే తాజాగా కాలం చెల్లిన వాహనాలను ఎక్కడికక్కడ సీజ్ చేస్తోంది. 10 ఏళ్లు దాటిన డీజిల్ వాహనాలు, 15 ఏళ్లు దాటిన పెట్రోల్ వాహనాలు కనపడితే స్వాధీనం చేసుకుంటోంది. ఈ క్రమంలోనే గత 45 రోజుల్లోనే ఏకంగా 2234 కాలం తీరిన వాహనాలను సీజ్ చేసింది. నేషనల్ క్యాపిటల్ రీజియన్ పరిధిలో రోజురోజుకూ పెరుగుతున్న కాలుష్యాన్ని తగ్గించేందుకు ఢిల్లీలోని ఆమ్ ఆద్మీ పార్టీ ప్రభుత్వం తీసుకున్న చర్యల్లో భాగంగానే ఓవరేజ్ వాహనాల భరతం పడుతోంది.

గత కొన్ని రోజులుగా ఢిల్లీ, దాని పరిసర ప్రాంతాల్లో గ్రేడెడ్‌ రెస్పాన్‌ యాక్షన్‌ ప్లాన్‌ 3, 4వ దశలను ఆతిశీ ప్రభుత్వం అమలు చేస్తోంది. సీజ్ చేసిన ఓవరేజ్ వాహనాల్లో 10 ఏళ్లు దాటిన 260 డీజిల్ ఫోర్ వీలర్ వాహనాలు ఉన్నాయని ఢిల్లీ రవాణా శాఖ అధికారులు పేర్కొంటున్నారు. 15 ఏళ్లు దాటిన 1156 పెట్రోల్ బైకులు, 818 పెట్రోల్ త్రీవీలర్స్, ఫోర్ వీలర్స్‌ స్వాధీనం చేసుకున్నట్లు వెల్లడించారు. ఈ ఓవరేజ్ వాహనాల సీజ్ చేసే డ్రైవ్‌ ఈ ఏడాది డిసెంబర్ వరకు కొనసాగుతుందని అధికారులు స్పష్టం చేశారు. పర్యావరణ నిబంధనలను అమలు చేయడానికి.. కాలం తీరిన వాహనాల నుంచి వెలువడే ఉద్గారాలను తగ్గించే ప్రయత్నంలో ఇది ఒక భాగమని ఢిల్లీ రవాణా శాఖ పేర్కొంది.

ఓవరేజ్‌ వాహనాలపై కఠిన చర్యలు తీసుకోవడంతో పాటు ఢిల్లీ రవాణాశాఖ కొత్త పోర్టల్‌ని ప్రారంభించారు. ఇందులో భాగంగానే అధికారులు స్వాధీనం చేసుకున్న వాహనాలను స్క్రాప్‌కు పంపించడం, వెనక్కి తీసుకోవడం, విక్రయించడం సులభతరం చేయడంతోపాటు.. స్క్రాపింగ్ ప్రక్రియను క్రమబద్ధీకరించడానికి, వాహనాల ఓనర్లకు అలాంటి వాహనాల నిర్వహణ కోసం స్పష్టమైన స్టాండర్డ్‌ ఆపరేటింగ్ విధానాన్ని అందించేందుకు ఈ ప్లాట్‌ఫామ్ ప్రారంభించారు. ఇటీవల ఢిల్లీ హైకోర్టు ఇచ్చిన ఆదేశాల ప్రకారం.. వాహనాలను మెయింటైన్ చేసేందుకు 2024 మార్గదర్శకాలను కచ్చితంగా పాటించాలని ఢిల్లీ రవాణా శాఖ రిజిస్టర్డ్ వెహికల్ స్క్రాపింగ్ ఫెసిలిటీస్‌కి ఆదేశాలు జారీ చేసింది.

ఈ ఆదేశాలను పాటించకపోతే ప్రోగ్రామ్ నుంచి మినహాయించబడవచ్చని వెల్లడించింది. ఇక ఢిల్లీలో 10 సంవత్సరాల కంటే పాత డీజిల్ వాహనాలను.. 15 సంవత్సరాల కంటే పాతబడిన పెట్రోల్ వాహనాలపై ఇప్పటికే నిషేధం విధించిన విషయం తెలిసిందే. ఈ క్రమంలోనే ఢిల్లీలో ఓవరేజ్‌ వాహనాలను పట్టుకునేందుకు డ్రైవ్ చేపడుతూ వచ్చారు. 15 ఏళ్ల కంటే పాత వాహనాలను బహిరంగ ప్రదేశాల్లో పార్కింగ్ చేయడాన్ని నేషనల్ గ్రీన్ ట్రిబ్యునల్ సైతం నిషేధించింది. ఇప్పటివరకు ఢిల్లీ రవాణాశాఖ 55 లక్షలకుపైగా ఓవరేజ్ వాహనాల రిజిస్ట్రేషన్ రద్దు చేసింది.