బీజేపీకి బిగ్ షాక్.. ప్రభుత్వానికి మద్దతు ఉపసంహరణ, ప్రభుత్వం కూలిపోతుందా

మణిపూర్‌లో అధికారంలో ఉన్న బీజేపీకి బిగ్ షాక్ తగిలింది. ఇప్పటికే ఏడాదికి పైగా ఆ రాష్ట్రంలో తెగల మధ్య హింసాత్మక సంఘటనలతో తీవ్ర ఉద్రిక్త పరిస్థితులు నెలకొన్న వేళ.. తాజాగా ప్రభుత్వంలో భాగంగా ఉన్న నేషనల్ పీపుల్స్ పార్టీ -ఎన్‌పీపీ తన మద్దతును ఉపసంహరించుకుంది. అయితే ఇప్పటికే కుకీ పీపుల్స్ పార్టీ కూటమి నుంచి వైదొలగగా.. ఇప్పుడు ఎన్‌పీపీ కూడా అదే బాటలో బయటికి రావడం మణిపూర్ రాజకీయాల్లో తీవ్ర చర్చనీయాంశంగా మారింది. మరోవైపు.. మణిపూర్ ముఖ్యమంత్రి ఎన్ బీరెన్ సింగ్‌ను.. పదవి నుంచి తొలగించి కొత్త ముఖ్యమంత్రిని నియమించాలనే డిమాండ్లు అధికార కూటమిలోని కొంతమంది ఎమ్మెల్యేలు బహిరంగంగానే బీజేపీ హైకమాండ్‌కు సూచిస్తుండటం.. ఆ రాష్ట్ర రాజకీయాల్లో హాట్‌ టాపిక్‌గా మారింది.

మణిపూర్‌లో నెలకొన్న హింస, జాతుల మధ్య ఘర్షణను తగ్గించి.. పరిస్థితులను సాధారణ స్థాయికి తీసుకురావడంలో బీరెన్ ప్రభుత్వం పూర్తిగా విఫలమైందని.. కూటమి నుంచి బయటికి వచ్చిన తర్వాత ఎన్‌పీపీ తీవ్ర ఆరోపణలు గుప్పించింది. బీజేపీ జాతీయ అధ్యక్షుడు జేపీ నడ్డాకు లేఖ రాసిన ఎన్‌పీపీ.. గత కొన్ని నెలలుగా మణిపూర్‌లో పరిస్థితులు మరింత దిగజారినట్లు వెల్లడించింది. ఈ హింసాత్మక సంఘటనల్లో ఎంతో మంది అమాయక ప్రజలు ప్రాణాలు కోల్పోయినట్లు వివరించింది. మణిపూర్‌లో పరిస్థితులు రాకపోవడం, అందుకు కావాల్సిన చర్యలను తీసుకోవడంలో ప్రభుత్వం విఫలం అయిందని.. అందుకే ప్రభుత్వానికి మద్దతు ఉపసంహరించుకుంటున్నట్లు తీసుకున్నట్లు ప్రకటించింది.

అయితే మణిపూర్ ప్రభుత్వానికి ఎన్‌పీపీ మద్దతును ఉపసంహరించుకున్నా.. బీరెన్ సింగ్ ముఖ్యమంత్రి పదవికి మాత్రం ఎలాంటి ఢోకా లేదు. 60 మంది శాసన సభ్యులు ఉన్న మణిపూర్ అసెంబ్లీలో బీజేపీకి సొంతంగా 37 మంది ఎమ్మెల్యేల బలం ఉంది. అంతేకాకుండా మొత్తం ఎన్డీఏ కూటమికి 53 మంది ఎమ్మెల్యేల మద్దతు ఉంది. అయితే ప్రస్తుతం కూటమి నుంచి బయటికి వచ్చిన ఎన్‌పీపీకి కేవలం ఏడుగురు ఎమ్మెల్యేలు మాత్రమే ఉన్నారు. దీంతో ఎన్‌పీపీ మద్దతు ఉపసంహరించుకోవడం వల్ల బీరెన్ సింగ్ ప్రభుత్వానికి వచ్చిన ఇబ్బంది ఏమీ లేదు. ఇక నాగా పీపుల్స్ ఫ్రంట్ -ఎన్‌పీఎఫ్‌కు ఐదుగురు ఎమ్మెల్యేలు, జేడీయూ పార్టీ నుంచి ఒకరు, ముగ్గురు స్వతంత్ర ఎమ్మెల్యేల మద్దతు కూడా బీరెన్ సింగ్ ప్రభుత్వానికి ఉంది. మరోవైపు.. ప్రతిపక్ష పార్టీల్లో కాంగ్రెస్‌ పార్టీకి ఐదుగురు ఎమ్మెల్యేలు, కుకీ పీపుల్స్ పార్టీ-కేపీఏకు ఇద్దరు ఎమ్మెల్యేలు ఉన్నారు. అయితే బీరెన్ సింగ్ ప్రభుత్వానికి మద్దతు ప్రకటించిన కుకీ పీపుల్స్ పార్టీ.. హింసాత్మక సంఘటనలన నేపథ్యంలో ఎన్డీఏ ప్రభుత్వానికి మద్దతు ఉపసంహరించుకుంది.

మరోవైపు.. మణిపూర్‌లో ఉద్రికత్తలు కొనసాగుతున్నాయి. జిరిబామ్ జిల్లాలో భద్రతా బలగాలు, నిరసనకారుల మధ్య జరిగిన కాల్పుల్లో ఒక నిరసనకారుడు చనిపోయాడు. ఆదివారం రాత్రి పలువురు నేతల ఆస్తులు, పార్టీ కార్యాలయాలపై నిరసనకారులు దాడులు చేసినట్లు పోలీసులు వెల్లడించారు. ఈ సందర్భంగా జరిగిన అల్లర్లలో 21 ఏళ్ల అథౌబా మృతి చెందినట్లు తెలిపారు. అయితే అతడిపై ఎవరు కాల్పులు జరిపారో అనేది మాత్రం పోలీసులు స్పష్టం చేయలేదు. ఇక ఆందోళన చేస్తున్న వారిని చెదరగొట్టేందుకు పోలీస్‌ ప్రత్యేక కమాండోలు ఆయుధాలు ప్రయోగించినట్లు స్థానికులు ఆరోపిస్తున్నారు. ఈ కాల్పుల్లో అథౌబా మరణించగా మరో ఇద్దరు గాయపడినట్లు తెలిపారు.

మరోవైపు.. కుకీ మిలిటెంట్లు మహిళలు, పిల్లలపై దాడులు చేసి హత్య చేయడంపై మణిపూర్‌లో హింసాత్మక సంఘటనలు కొనసాగుతున్నాయి. ఈ నేపథ్యంలో స్కూళ్లు, కాలేజీలకు 2 రోజులు సెలవులు ప్రకటించారు. ఇంఫాల్ పశ్చిమ, తూర్పు జిల్లాల్లోని యూనివర్సిటీలు, కాలేజీలతో సహా అన్ని ప్రభుత్వ విద్యా సంస్థలను మంగళవారం వరకు మూసివేస్తున్నట్లు మణిపూర్ ప్రభుత్వం సోమవారం తెలిపింది. జిరిబామ్ జిల్లాలో మిలిటెంట్లు ముగ్గురు మహిళలు, ముగ్గురు చిన్నారులను హతమార్చడంతో.. స్థానికులు తీవ్రంగా ఆగ్రహించారు. ఈ నేపథ్యంలోనే శనివారం మణిపూర్‌లోని ముగ్గురు మంత్రులు, ఆరుగురు ఎమ్మెల్యేల ఇళ్లపై దాడులు చేసి.. వారి ఇళ్లకు నిప్పు పెట్టారు. మంత్రులు, ఎమ్మెల్యేల వాహనాలకు నిప్పంటించారు. దీంతో మణిపూర్‌లో మరోసారి తీవ్ర ఉద్రిక్త పరిస్థితులు నెలకొనగా.. 7 జిల్లాల్లో ఇంటర్నెట్ సేవలు నిలిచిపోయాయి.

ప్రస్తుతం మణిపూర్‌ పరిస్థితిపై కేంద్ర హోంశాఖ మంత్రి అమిత్ షా ఆదివారం సమీక్ష నిర్వహించారు. ఈశాన్య రాష్ట్రంలో శాంతిభద్రతలకు అన్ని విధాలా చర్యలు తీసుకోవాలని ఉన్నతాధికారులకు ఆదేశాలు ఇచ్చారు. ఈ సందర్భంగా ఆదివారం మహారాష్ట్ర ఎన్నికల ర్యాలీలను రద్దు చేసుకున్న అమిత్ షా.. నాగ్‌పూర్ నుంచి ఢిల్లీకి వచ్చి.. మణిపూర్‌లో శాంతిభద్రతల పరిస్థితిని పరిశీలించారు.