బీచ్ వద్ద రిసార్టుకు వెళ్లిన ముగ్గురు యువతులు.. ఆ తర్వాత స్విమ్మింగ్‌పూల్‌లోకి దిగి

కర్ణాటకలో విషాదం చోటు చేసుకుంది. మంగళూరులోని ఓ రిసార్ట్‌లో ముగ్గురు యువతులు శవాలుగా తేలారు. ఇంజినీరింగ్ చదివే ముగ్గురు యువతులు.. ఆదివారం కావడంతో బీచ్ వద్ద ఉన్న రిసార్టుకు వెళ్లారు. అక్కడ సంతోషంగా గడుపుతూ.. స్విమ్మింగ్ పూల్ లోకి దిగారు. అయితే వారిలో ఎవరికీ ఈత రాకపోవడం గమనార్హం. మొదట దిగిన విద్యార్థి మునిగిపోతుందని గ్రహించిన మిగితా ఇద్దరు యువతులు.. ఆమెను కాపాడేందుకు వెళ్లారు. కానీ వారికి కూడా ఈత రాకపోవడంతో.. అందరూ కలిసి అందులోనే గిల గిలా కొట్టుకుంటూ ప్రాణాలు విడిచారు. ఈ ఘటన మొత్తం ఆ రిసార్ట్‌లో ఉన్న సీసీటీవీ ఫుటేజీలో రికార్డ్ అయింది. తాజాగా ఆ వీడియో బయటికి రావడంతో సోషల్ మీడియాలో వైరల్‌గా మారింది.

మైసూరులోని ఓ ఇంజినీరింగ్ కాలేజీలో చదువుతున్న కీర్తన (21), నిశిత (21), పార్వతీ (20) అనే ముగ్గురు యువతులు.. ఆదివారం రోజున మంగళూరులో ఉన్న వాజ్కో బీచ్ రిసార్ట్‌కు వెళ్లారు. ఈ సందర్భంగా ఆ రిసార్ట్‌లో ఎంజాయ్ చేస్తున్నారు. ఇక అక్కడే ఉన్న స్విమ్మింగ్ పూల్‌లో కొద్దిసేపు ఈత కొడదామని అందులోకి దిగారు. అయితే ఆ స్విమ్మింగ్ పూల్ లోతుగా ఉండటం, అంతేకాకుండా ఆ ముగ్గురు యువతులకు ఈత రాకపోవడం వారికి శాపంగా మారింది. ఒక యువతి నీటిలో మునిగిపోతుండగా.. ఆమెను కాపాడేందుకు మిగిలిన ఇద్దరు వెళ్లారు. ఈ క్రమంలోనే స్విమ్మింగ్‌పూల్ లోతు ఎక్కువగా ఉండగా.. వారు బయటికి రాలేక అందులో ఊపిరి ఆపుకోలేక అందులోనే పడి కొట్టుకుని చనిపోయారు.

ఇక ఈ మొత్తం ఘటనకు సంబంధించిన వీడియో అక్కడే ఉన్న సీసీటీవీలో రికార్డ్ కాగా.. తాజాగా నెట్టింట వైరల్‌గా మారింది. అయితే ఆ స్విమ్మింగ్ పూల్ వద్ద రిసార్ట్ సిబ్బంది గానీ, రెస్క్యూ సిబ్బంది గానీ ఎవరూ లేకపోవడం తీవ్ర విమర్శలకు కారణం అవుతోంది. ఆ సమయంలో అక్కడ మిగిలిన టూరిస్ట్‌లు కూడా లేకపోవడం గమనార్హం. ఈ ఘటనతో పోలీసులు రంగంలోకి దిగి.. కేసు నమోదు చేసుకుని దర్యాప్తు చేస్తున్నారు.

పోలీసుల విచారణలో కీలక విషయాలు వెలుగులోకి వచ్చాయి. ఆ రిసార్ట్‌లో ఉన్న స్విమ్మింగ్ పూల్ వద్ద లైఫ్‌గార్డులు, ప్రాణాలను రక్షించే పరికరాలు, పూల్ లోతును సూచించే స్పష్టమైన సంకేతాలు ఏమీ లేవని గుర్తించారు. ఈ ఘటన జరిగిన నేపథ్యంలో ఆ వాజ్కో బీచ్ రిసార్ట్‌ను అధికారులు సీజ్ చేసే అవకాశాలు ఉన్నట్లు తెలుస్తోంది. ఇప్పటికే ఆ రిసార్ట్ ఓనర్, మేనేజర్‌ను పోలీసులు అరెస్ట్ చేశారు. అయితే ఈ ప్రమాదం జరిగిన సమయంలో వాజ్కో బీచ్ రిసార్ట్‌లో ఏడుగురు ఉద్యోగులు విధుల్లో ఉన్నారని నిర్వాహకులు వెల్లడించారు.