కాంగ్రెస్ రోడ్‌షోలో బీజేపీ జెండాలు.. ప్రియాంక గాంధీ కౌంటర్ మామూలుగా లేదుగా

మహారాష్ట్ర అసెంబ్లీ ఎన్నికల ప్రచారానికి నేటితో తెరపడనుంది. చివరిరోజు.. బీజేపీ, కాంగ్రెస్‌తోపాటు శివసేన, ఎన్సీపీ పార్టీలు హోరాహోరీ ప్రచారానికి తెరలేపాయి. ఇక చివరి రోజు ప్రచారం కావడంతో రోడ్ షోలు, ర్యాలీలు, ప్రచార సభలతో మహారాష్ట్ర అంతటా దద్దరిల్లిపోయింది. ఈ క్రమంలోనే నాగ్‌పూర్‌లో కాంగ్రెస్ పార్టీ ఆదివారం నిర్వహించిన ఎన్నికల రోడ్ షోలో ఒక ఆసక్తికరమైన పరిణామం చోటు చేసుకుంది. ఆరెస్సెస్ కంచుకోట అయిన నాగ్‌పూర్‌లో ప్రియాంక గాంధీ నేతృత్వంలో కాంగ్రెస్ పార్టీ రోడ్ షో జరుగుతుండగా.. ఓ భవనంపై ఉన్న బీజేపీ కార్యకర్తలు ఆ పార్టీ జెండాలను ఊపి నినాదాలు చేశారు. దీంతో అక్కడ ఉన్న కాంగ్రెస్ పార్టీ శ్రేణులు కూడా.. తమ పార్టీ జెండా ఊపుతూ మరింత గట్టిగా నినాదాలు చేశారు.

ఈ సందర్భంగా ప్రియాంక గాంధీ వాద్రా స్పందించారు. వెంటనే మైక్ తీసుకుని.. చిరునవ్వుతో బీజేపీ కార్యకర్తలకు గట్టిగా కౌంటర్ ఇచ్చారు. బుధవారం జరగనున్న మహారాష్ట్ర ఎన్నికల పోలింగ్‌కు ఆల్‌ ది బెస్ట్‌ అంటూ చెప్పారు. అంతేకాకుండా "బీజేపీ మిత్రులారా.. మీకు ఎన్నికల శుభాకాంక్షలు. కానీ ఈ మహారాష్ట్ర అసెంబ్లీ ఎన్నికల్లో మహా వికాస్ అఘాడీ గెలుస్తుంది" అని అన్నారు. ప్రియాంక గాంధీ చెప్పిన ఈ మాటలకు కాంగ్రెస్ పార్టీ కార్యకర్తలకు ఎక్కడిలేని ఉత్సాహం వచ్చింది. దీంతో పెద్ద ఎత్తున నినాదాలతో ఆ ప్రాంతాన్ని హోరెత్తించారు.

బీజేపీ శ్రేణుల నినాదాలు, వాటికి ప్రియాంక గాంధీ ఇచ్చిన కౌంటర్‌కు సంబంధించిన వీడియో ప్రస్తుతం సోషల్ మీడియాలో తెగ వైరల్ అవుతుండగా.. బీజేపీ, కాంగ్రెస్ శ్రేణులు పోటా పోటీగా కామెంట్లు పెడుతున్నారు. ఇక నాగ్‌పూర్‌లో ప్రియాంక గాంధీ వాద్రా రోడ్‌షో ముగిసిన తర్వాత నాగ్‌పూర్ సెంట్రల్ కాంగ్రెస్ అభ్యర్థి బంటీ షెల్కే, స్థానిక బీజేపీ మద్దతుదారుల మధ్య తీవ్ర వాగ్వాదం జరిగినట్లు తెలుస్తోంది. అయితే ఈ విషయాన్ని బయటకు రానివ్వకుండా దాచారని సమాచారం.

 బీజేపీ సైద్ధాంతిక మాతృసంస్థ అయిన ఆర్‌ఎస్‌ఎస్‌ ప్రధాన కార్యాలయం మహారాష్ట్రలోని నాగ్‌పూర్‌లో ఉంది. దీంతో నాగ్‌పూర్ మొత్తం బీజేపీ కంచు కోటగా భావిస్తారు. ఇక కేంద్రమంత్రి, బీజేపీ అగ్రనేత నితిన్‌ గడ్కరీ 2014 నుంచి వరుసగా నాగ్‌పూర్ లోక్‌సభ స్థానం నుంచి విజయం సాధిస్తూనే ఉన్నారు. ఇక ఈ నాగ్‌పూర్ లోక్‌సభ నియోజకవర్గం పరిధిలో 6 అసెంబ్లీ నియోజకవర్గాలు ఉండగా.. అందులో 4 స్థానాలు ప్రస్తుతం బీజేపీ చేతిలో ఉన్నాయి. దీంతో ఇలాంటి బీజేపీ కంచుకోటలో రోడ్ షో నిర్వహించిన ప్రియాంక గాంధీ.. బీజేపీ శ్రేణులకు కౌంటర్ ఇచ్చారు.