తల్లిని చంపి బాలుడి నాటకాలు.. తెలివిగా తెలుసుకున్న సైంటిస్ట్ తండ్రి!

ఒక్కగానొక్క కొడుకు.. అల్లారుముద్దుగా పెంచుకున్నారు. కొడుకు భవిష్యత్తు బాగుండాలని నిరంతరం తపించారు. తండ్రి సైంటిస్ట్ కావడంతో ఆయన తమిళనాడులో ఉండగా.. కొడుకుతో భార్య యూపీలోని స్వగృహంలోనే ఉంటుంది. బాలుడిని చదివించుకుంటూ ప్రేమగా చూసుకుంటుంది. కానీ తల్లి ప్రేమ అర్థం చేసుకోలేని అతడు.. ఆవేశంలో తల్లిని గోడకేసి కొట్టి చంపాడు. ఆపై వదిలేసి వెళ్లిపోయాడు. తల్లి ఎంతకూ ఫోన్ లేపడం లేదని తండ్రి బాలుడికి చేయగా కథలు చెప్పాడు. కానీ చివరకు దొరికిపోయి ఊచలు లెక్కబెడుతున్నాడు. అసలేం జరిగిందంటే.

తమిళనాడులోని కలపక్కం బాబా అటామిక్ రీసెర్చ్ సెంటర్ అసిస్టెంట్ సైంటిస్ట్‌గా పని చేస్తున్న వ్యక్తికి భార్య, 17 ఏళ్ల కుమారుడు ఉన్నారు. ఉన్నది ఒకటే కొడుకు కావడంతో గారాబంగా పెంచారు. తండ్రి ఉద్యోగ నిమిత్తం తమిళనాడులో ఉండగా.. తల్లి బాలుడితో సహా యూపీలోని గోరఖ్‌పూర్‌లో ఉంటుంది. అయితే ఇంటర్ మొదటి సంవత్సరం చదువుతున్న అతడు.. తల్లి చెప్పిన మాట అస్సలే వినకపోయేవాడు. డిసెంబర్ 3వ తేదీ రోజు ఉదయం కొడుకును కాలేజీకి వెళ్లమని తల్లి కోరింది. కానీ అతడు వెళ్లనంటూ గొడవ చేశాడు.

 ఆ తర్వాత బయట తిరిగీ తిరిగీ వచ్చి తల్లిని డబ్బులు ఇవ్వమని అడిగాడు. అయితే ఆమె వెంటనే డబ్బులు తెచ్చి అతడి మొహంపై కొట్టింది. ఇలా చేయడం మంచిది కాదంటూ హెచ్చరించింది. దీంతో తీవ్ర కోపోద్రిక్తుడైన కుమారుడు.. ఆవేశంలో తల్లిని గోడకేసి కొట్టాడు. ఆమె ఒక్కసారిగా కుప్పకూలిపోయినా పట్టించుకోకుండా.. బయటకు వెళ్లిపోయాడు. సాయంత్రం ఇంటికి వచ్చిన అతడికి తల్లి రక్తపుమడుగులో కనిపించింది. దీంతో భయపడిపోయిన అతడు తల్లి వద్దకు వెళ్లాడు. ఆమె చనిపోయినట్లు నిర్దారించుకున్నాడు. వెంటనే ఇంటికి తాళం వేసి స్నేహితుడి ఇంటికి వెళ్లిపోయాడు.

రెండ్రోజులు గడిసింది. అయితే 2 రోజుల నుంచి భార్య ఫోన్ తీయకపోవడంతో తండ్రి బాలుడికి ఫోన్ చేశాడు. అతను తల్లి గురించి చెప్పకుండా బుకాయించాడు. మరో రోజు చూసిన సైంటిస్ట్.. ఆ తర్వాతి రోజు కుమారుడిపై అనుమానంతో తనకు తెల్సిన వాళ్లకు ఫోన్ చేసి ఇంటికి వెళ్లమన్నాడు. అలా డిసెంబర్ 7వ తేదీన భార్య చనిపోయినట్లు తెలుసుకున్నాడు. వెంటనే యూపీకి వచ్చి పోలీసులకు ఫిర్యాదు చేశాడు. దీంతో అనుమానంగా వ్యవహరిస్తున్న కొడుకును అదుపులోకి తీసుకున్న పోలీసులు విచారణ చేపట్టాడు.

ముందు ఒప్పుకోకపోయినా ఆ తర్వాత బాలుడు నిజం ఒప్పుకున్నాడు. తాను తోసేయడం వల్లే తల్లి చనిపోయినట్లు చెప్పాడు. దీంతో కేసు నమోదు చేసుకున్న పోలీసులు బాలుడిని అరెస్ట్ చేశారు. అనంతరం అతడిని జువైనల్ హోమ్‌కు తరలించారు. భార్య చనిపోవడం, కుమారుడు జైలుకు వెళ్లడంతో తండ్రి కన్నీరుమున్నీరుగా విలపిస్తున్నాడు. తాను ఇంట్లోనే ఉండి ఉంటే ఇలా జరిగేది కాదంటూ వెక్కి వెక్కి ఏడ్చాడు.