గ్యాస్, చమురు అమెరికా నుంచే కొనాలి.. లేకుంటే పన్నులు పెంచుతా: ట్రంప్ వార్నింగ్

అమెరికా ఎన్నికల్లో విజయం సాధించిన రిపబ్లికన్ నేత డొనాల్డ్ ట్రంప్.. జనవరి 20న ఆ దేశ 47 అధ్యక్షుడిగా బాధ్యతలు చేపట్టనున్నారు. అయితే, తన 2.0 పాలన ఎలా ఉండబోతుందో ఆయన ఇప్పటికే వెల్లడించారు. ఇమ్మిగ్రేషన్, వాణిజ్యం సహా అన్నింటిలోనూ సమూల మార్పులు తప్పవని సంకేతాలు ఇచ్చారు. చైనా, మెక్సికో, కెనడా సహా పలు దేశాలపై దిగుమతి సుంకాలు వడ్డింపు తప్పదని హెచ్చరించిన విషయం తెలిసిందే. తాజాగా, యూరోపియన్‌ యూనియన్‌ను దేశాలకు ట్రంప్ హెచ్చరికలు చేశారు. తమతో వాణిజ్య అంతరాన్ని తగ్గించకపోతే తీవ్ర పరిణామాలు ఉంటాయని పేర్కొన్నారు. గ్యాస్‌, చమురు అమెరికా నుంచే కొనుగోలు చేయాలని, అలా చేయకుంటే అన్ని టారిఫ్‌లను పెంచేస్తామని ఆయన హెచ్చరించారు. ఈ మేరకు తన సొంత సోషల్ మీడియా వేదిక ట్రూత్ సోషల్‌లో పోస్ట్ చేశారు.

కాగా, అమెరికా- ఐరోపా సమాఖ్య మధ్య వాణిజ్య అంతరం భారీగా ఉన్నట్లు వైట్‌హౌస్ నివేదికలు వెల్లడిస్తున్నాయి. 2022లో లెక్కల ప్రకారం.. ఈ అంతరం 202.5 బిలియన్ డాలర్లు ఉన్నట్లు తెలిసింది. ఆ ఏడాది ఐరోపా సమాఖ్య దేశాల నుంచి 553 బిలియన్ డాలర్లు ఉత్పత్తులను అమెరికా దిగుమతి చేసుకోగా.. ఈయూకి 350.8 బిలియన్ డాలర్ల విలువైన ఉత్పత్తులను ఎగుమతి చేసింది. ఈ నివేదికను ప్రస్తావించిన ట్రంప్.. భారీ అంతరాన్ని త్వరితగతిన తగ్గించాలని డిమాండ్ చేశారు.

గతంలోనూ ట్రంప్ అధ్యక్షుడిగా ఉన్నప్పుడు ఈయూతో వాణిజ్య అంతరాన్ని ప్రధానంగా ప్రస్తావించారు. దీనిని మెరుగుపరుకోవాలని, లేకుంటే నాటోకు అదనంగా ఇస్తోన్న నిధులను నిలిపివేస్తామని చెప్పారు. ఐరోపా కూడా తమకు సహకరించాలని సూచించారు. ఇదిలా ఉండగా.. ఇటీవల ఫ్లోరిడాలోని తన మార్-ఎ-లాగో ఎస్టేట్‌లో ఇటీవల ట్రంప్ మాట్లాడుతూ.. అనాలోచిత ఒప్పందాల కారణంగా తమ దేశం చాలా కోల్పోతోందని అన్నారు. అమెరికా తిరిగి సుసంపన్నం కావాలంటే టారిఫ్‌లను పెంచడం ఒక్కటే మార్గమని అభిప్రాయపడ్డారు.

ఇక, రెండోసారి అమెరికా అధ్యక్షుడిగా బాధ్యతలు చేపట్టిన తొలిరోజే కీలక నిర్ణయాలు తీసుకునేందుకు ట్రంప్‌ సిద్ధమవుతున్నారు. ఇందులో భాగంగా దాదాపు 50 ఎగ్జిక్యూటివ్‌ ఉత్తర్వులను జారీ చేయనున్నట్లు తెలుస్తోంది. మరోవైపు, అమెరికాకు ప్రత్యామ్నాంగా ఐరోపా సమాఖ్య ప్రయత్నాలు చేపట్టింది. దక్షిణ అమెరికా దేశాలపై బ్రెజిల్, అర్జెంటీనా, ఉరుగ్వే, పరాగ్వే‌లతో భారీ వాణిజ్య ఒప్పందం చేసుకుంటోంది. దీని వల్ల ఈయూ, దక్షిణ అమెరికా దేశాల్లోని 700 మిలియన్ల మంది ప్రజలకు ప్రయోజనం చేకూరనుంది. ఈ ఒప్పందంపై సంతకం చేసిన వెంటనే.. ఈయూ చీఫ్ ఉర్సులా వోన్ డెర్ లేయెన్.. ట్రంప్ పేరు ప్రస్తావించకుండానే తీవ్ర విమర్శలు చేశారు. స్వేచ్ఛా వాణిజ్యంతో పోల్చితే బలమైన గాలులు వ్యతిరేక దిశలో వీస్తున్నాయని పరోక్షంగా అమెరికాతో ఒప్పందాలపై ఆరోపణలు చేశారు.