ఐటీ ఫ్రెషర్లు ఎగిరిగంతేసే వార్త.. టెక్ దిగ్గజం టీసీఎస్ కీలక ప్రకటన.. వచ్చే ఏడాదిలో..!

దేశీయ దిగ్గజ టెక్ కంపెనీ టాటా కన్సల్టెన్సీ సర్వీసెస్ (టీసీఎస్) కీలక ప్రకటన చేసింది. వచ్చే ఆర్థిక సంవత్సరం 2025-26లో ఇంజినీరింగ్ క్యాంపస్ల నుంచి ఫ్రెషర్స్ నియమాకాలు పెంచేందుకు ప్రణాళికలు సిద్ధం చేస్తున్నట్లు తెలిపింది. ఐటీ రంగంలో అధిక వృద్ధి అంచనాలు ఉన్న క్రమంలో ఈ మేరకు చర్యలు చేపట్టినట్లు టీసీఎస్ చీఫ్ హ్యూమ్ రీసోర్స్ ఆఫీసర్ మిలింద్ లక్కడ్ ఎకనామిక్ టైమ్స్‌తో తెలిపారు. ప్రస్తుత ఆర్థిక సంవత్సరంలో 40 వేల మంది ఐటీ ఫ్రెషర్స్ నియామకాలు చేపడతామన్న తమ లక్ష్యాన్ని మరింత పెంచుతున్నట్లు చెప్పారు. దీంతో ఐటీ ఉద్యోగం కోసం చూస్తున్న ఫ్రెషర్లకు ఇది అదిరే శుభవార్తగా చెప్పవచ్చు.

భారత అతిపెద్ద ఐటీ సర్వీసెస్ సంస్థగా కొనసాగుతున్న టీసీఎస్ ఈ ఆర్థిక సంవత్సరంలో 40 వేల మంది ఫ్రెషర్లను ఆన్‌బోర్డ్ చేసుకునే ట్రాక్‌లో ఉందని మిలింద్ లక్కడ్ తెలిపారు. లేటెస్ట్ ఆర్టిఫిషియల్ ఇంటెలిజెన్స్ (AI), జెనరేటివ్ ఏఐ లేదా జెన్ఏఐ టూల్స్ వంటి వివిధ రంగాల్లో ఈ ఆర్థిక సంవత్సరం 2024-25 ముగిసే నాటికి 40 వేల మంది ట్రైనింగ్ ఆన్ బోర్డింగ్ పూర్తి చేస్తామన్నారు. 'వచ్చే ఆర్థిక సంవత్సరం 2025-26లో ఈ సంఖ్య మరింత పెరుగుతుందని నేను భావిస్తున్నా. వచ్చే ఫైనాన్షియల్ ఇయర్ 2026కి సంబంధించిన ప్లానింగ్ సైకిల్ ప్రారంభించడం జరిగింది.' అని ఎకనామిక్ టైమ్స్ కి ఇచ్చిన ఇంటర్వ్యూలో తెలిపారు. ఫ్రెషర్స్ నియామకాలతో పాటు హైయ్యర్ క్యాడర్ సిబ్బంది సంఖ్యను సైతం పెంచుకుంటోంది టీసీఎస్. డిమాండ్ వైపు నుంచి కొన్ని వర్టికల్స్ బాగా పని చేస్తున్నాయని, విస్తృత ఆధారిత వృద్ధిని ఆశిస్తున్నట్లు మిలింద్ లక్కడ్ తెలిపారు.

టీసీఎస్, ఇతర అగ్రశ్రేణి ఐటీ కంపెనీలు ప్రస్తుత ఆర్థిక సంవత్సరం మొదటి అర్ధ భాగంలో ఆదాయ వృద్ధి, డీల్ పైప్ లైన్‌లో మంచి ఫలితాలు చూపించాయి. ఈ క్రమంలో ఐటీ రంగం వృద్ధిపై సంస్థల్ల ఆశావాదం వచ్చింది. చాలా సంస్థలు 12 నెలల విరామం తర్వాత క్యాంపస్ నియామకాలను పునఃప్రారంభించాయి. ఫ్రెషర్లను నియమించుకోవడం, శిక్షణ ఇవ్వడం దాని వ్యూహానికి ప్రధానమైనదిగా.. టీసీఎస్ గత కొన్ని సెమిస్టర్లలో విద్యార్థులకు శిక్షణ ఇవ్వడంపై దృష్టి సారిస్తోంది. వాళ్లు గ్రాడ్యుయేట్ అయిన తర్వాత బహుళ సాంకేతికతల కోసం నియమించుకోవడంపై దృష్టి సారిస్తోంది.

మరోవైపు.. టీసీఎస్ తమ ఉద్యోగులను వారానికి ఐదు రోజులు ఆఫీసుకు వచ్చి పని చేయాలని పిలుస్తోంది. ఉద్యోగులను ఆఫీసులకు వచ్చేలా చేసేందుకు ప్రోత్సాహకాలు ఇస్తోంది. ఆఫీసులో పని చేయడం అంటే ఇతరులతో కలిసి పని చేయడం, ఇతరుల నుంచి నేర్చుకోవడం, వృత్తిపరమైన అనుభవాలు పంచుకోవడం వంటివి ఉంటాయని, దీంతో ఉత్పాదకత పెరుగుతుందని టీసీఎస్ పేర్కొంది.