విస్తరిస్తున్న చైనా కొత్త వైరస్ వ్యాప్తి.. జపాన్‌, హాంకాంగ్‌లలో గుర్తింపు, ఆసియా దేశాల్లో గుబులు

చైనాలో ఇప్పుడు వెలుగుచూసిన కొత్త వైరస్.. మరోసారి ప్రపంచం మొత్తాన్ని తీవ్రంగా భయాందోళనకు గురిచేస్తోంది. సరిగ్గా ఐదేళ్ల క్రితం కొవిడ్ వైరస్ వ్యాప్తి చెందినట్లుగానే.. ఇప్పుడు హెచ్ఎంపీవీ వైరస్ (హ్యూమన్ మెటాప్‌న్యూమో వైరస్) చైనాలో రోజురోజుకూ చాపకింద నీరులాగా విస్తరిస్తోంది. కరోనా మహమ్మారికి ఏవైతే లక్షణాలు, వ్యాప్తి చెందే గుణం ఉందో సరిగ్గా అలాంటి లక్షణాలు, గుణాలు ఉన్న ఈ హెచ్ఎంపీవీ వైరస్ డేంజర్ బెల్స్ మోగిస్తోంది. దీంతో మరోసారి మానవాళిపై కొవిడ్ లాంటి పడగ తప్పదా అనే గుబులు నెలకొంది. అయితే ఇప్పటివరకు చైనాలోనే విస్తరిస్తున్న ఈ హెచ్ఎంపీవీ వైరస్.. ఇతర దేశాలకు కూడా పాకుతోంది. తాజాగా జపాన్, హాంకాంగ్ దేశాల్లో కూడా ఈ హెచ్ఎంపీవీ వైరస్ కేసులు నమోదు అవుతుండటం తీవ్ర చర్చనీయాంశంగా మారింది. దీంతో ఆసియా దేశాల్లో ఇప్పుడు హెచ్ఎంపీవీ వైరస్ గుబులు మరింత ఎక్కువైంది.

ఇక ఈ హ్యూమన్ మెటాప్‌న్యూమో వైరస్‌ చైనాను వణికిస్తుంది. ఈ హెచ్ఎంపీవీ వైరస్ కారణంగా లక్షల మంది ఆస్పత్రుల పాలై చికిత్స పొందుతున్నారు. ఇప్పటికే చైనాలోని ఉత్తర ప్రాంతాల్లో ఈ వైరస్ వ్యాప్తి అధికంగా ఉన్నట్లు ఇంటర్నేషన్ల్ మీడియా పేర్కొంటోంది. ఈ హెచ్ఎంపీవీ వైరస్ కట్టడి కోసం చైనా ఆరోగ్య శాఖ ఇప్పుడు తీవ్ర కసరత్తులు చేస్తుంది. అయితే ఈ హెచ్ఎంపీవీ వైరస్ అనేది ఇప్పటికిప్పుడు పుట్టుకొచ్చింది కాదని.. 20 ఏళ్ల క్రితమే దీన్ని గుర్తించినట్లు వైద్య నిపుణులు చెబుతున్నారు. అయితే ఇప్పుడు ఈ వైరస్ చైనాలో శరవేగంగా చాపకింద నీరులాగా వ్యాప్తి చెందుతున్నట్లు వార్తలు వస్తున్నాయి. అయితే ఈ వైరస్ వెలుగు చూసి 20 ఏళ్లు గడిచినా.. ఇప్పటికీ దీన్ని నివారణకు వ్యాక్సిన్ గానీ, మందు గానీ కనుగొనక పోవడం గమనార్హం. అయితే ఈ 20 ఏళ్లలో ఈ హెచ్ఎంపీవీ వైరస్ మరింత శక్తివంతంగా మారినట్లు కొన్ని కథనాలు వస్తున్నాయి.

 ఇప్పటివరకు చైనాలోనే ఉన్న ఈ హెచ్ఎంపీవీ వైరస్.. ఇప్పుడు జపాన్, హాంకాంగ్ దేశాలకూ విస్తరించింది. జపాన్ వ్యాప్తంగా 7.18 లక్షల కేసులు నమోదయ్యాయని.. ఒక్క 2024 డిసెంబర్ నెలలోనే 94,259 కొత్త కేసులు వెలుగుచూసినట్లు జపాన్ బ్రాడ్ కాస్టింగ్ కార్పొరేషన్ నివేదిక స్పష్టం చేసింది. ఇక జపాన్‌లోని 5 వేల ఆస్పత్రులు, క్లినిక్‌లలో హెచ్ఎంపీవీ వైరస్ బాధితులకు చికిత్స అందిస్తున్నట్లు జపాన్ బ్రాడ్ కాస్టింగ్ కార్పొరేషన్ వెల్లడించింది. ఇక చిన్నా పెద్దా అని తేడా లేకుండా ఈ హెచ్ఎంపీవీ వైరస్ బాధితుల్లో అన్ని వయసుల వారు ఉన్నారని.. పిల్లలు, వృద్ధుల సంఖ్య అధికంగా ఉన్నట్లు వివరించింది.

మరోవైపు.. ఈ హ్యూమన్ మెటాప్‌న్యూమో వైరస్‌ కేసులు హాంకాంగ్ దేశంలోనూ నమోదయ్యాయి. అయితే హాంకాంగ్‌లో చాలా తక్కువ సంఖ్యలో ఉండటం కాస్త ఊరట కల్గించే అంశం. ఇక ఈ వైరస్ వ్యాప్తిని కట్టడి చేసేందుకు హాంకాంగ్ వైద్య శాఖ స్థానిక ప్రజల్లో అవగాహన కల్పిస్తోంది. చైనా నుంచి ఈ హెచ్ఎంపీవీ వైరస్.. జపాన్, హాంకాంగ్ దేశాలకు విస్తరించడంతో.. ప్రస్తుతం ఆసియాలోని మిగితా దేశాల్లో తీవ్ర భయాందోళనలు నెలకొన్నాయి. మరికొన్ని రోజుల్లో ఈ వైరస్ తమ దేశాల్లోనూ వ్యాప్తి చెందే అవకాశాలు ఉన్నాయనే భయాలు తీవ్రం అవుతున్నాయి.