పోలీసుల అదుపులో వైఎస్ అవినాష్ రెడ్డి పీఏ.. కోర్టు నిర్ణయం వెలువడిన కొద్దిసేపట్లోనే

సోషల్ మీడియాలో అసభ్యకర పోస్టుల కేసులో వైసీపీ ఎంపీ, వైఎస్ అవినాష్ రెడ్డి పీఏ రాఘవరెడ్డిని ఏపీ పోలీసులు అదుపులోకి తీసుకున్నారు. ఈ కేసులో బెయిల్ ఇవ్వాలంటూ రాఘవరెడ్డి ఏపీ హైకోర్టులో పిటిషన్ దాఖలు చేశారు. రాఘవరెడ్డి ముందస్తు బెయిల్ పిటిషన్‌ను విచారించిన హైకోర్టు.. తాజాగా పిటిషన్ తిరస్కరించింది. హైకోర్టు నిర్ణయం వెలువడిన వెంటనే పులివెందుల పోలీసులు.. రాఘవరెడ్డి ఇంటికి వెళ్లారు. అనంతరం రాఘవరెడ్డిని అదుపులోకి తీసుకుని విచారణ కోసం పులివెందుల పోలీస్ స్టేషన్ తీసుకెళ్లారు.

టీడీపీ అధినేత చంద్రబాబు నాయుడు, నారా లోకేష్, జనసేనాని పవన్ కళ్యాణ్, వంగలపూడి అనిత, ఏపీ కాంగ్రెస్ చీఫ్ వైఎస్ షర్మిల వంటి వారిపై సోషల్ మీడియాలో అసభ్యకర పోస్టులు పెట్టారంటూ వైసీపీ సోషల్ మీడియా కార్యకర్త వర్రా రవీందర్ రెడ్డిని పోలీసులు అరెస్ట్ చేసిన సంగతి తెలిసిందే. అయితే వర్రా రవీంద్ర రెడ్డితో అభ్యంతరకర పోస్టులు పెట్టించారని వైఎస్ అవినాష్ రెడ్డి పీఏ రాఘవరెడ్డిపై అభియోగాలు ఉన్నాయి. అలాగే గతేడాది నవంబర్‌లో నమోదైన ఎస్సీ, ఎస్టీ కేసులో రాఘవరెడ్డి నిందితుడిగా ఉన్నారు. అయితే కొన్ని రోజులు పరారీలో ఉన్న రాఘవరెడ్డి.. ఆ తర్వాత ముందస్తు బెయిల్ కోరుతూ కడప కోర్టులో పిటిషన్ వేశారు. అయితే ఆ పిటిషన్‌ను కడప కోర్టు కొట్టివేసింది.

 ఆ తర్వాత ఏపీ హైకోర్టులో రాఘవరెడ్డి ముందస్తు బెయిల్ పిటిషన్ దాఖలు చేశారు. ఈ పిటిషన్ విచారించిన హైకోర్టు కొన్ని రోజులు అరెస్ట్ చేయకుండా ఉత్తర్వులు ఇచ్చింది. తాజాగా రాఘవరెడ్డి ముందస్తు బెయిల్ పిటిషన్‌ను ఏపీ హైకోర్టు తిరస్కరించింది. దీంతో రాఘవరెడ్డి ఇంటికి వెళ్లిన పులివెందుల పోలీసులు.. ఆయనను విచారణ కోసం పోలీస్ స్టేషన్ తరలించారు.

మరోవైపు ముందస్తు బెయిల్ పిటిషన్ అంశం హైకోర్టులో పెండింగ్‌లో ఉన్నప్పుడు రాఘవరెడ్డి.. పోలీసులు విచారణకు పిలిచినప్పుడల్లా హాజరయ్యారని వైసీపీ శ్రేణులు చెప్తున్నాయి. కోర్టు ఆదేశాల మేరకు రాఘవరెడ్డి విచారణకు సహకరించారని గుర్తుచేస్తున్నాయి. కానీ ఇప్పుడు బెయిల్ పిటిషన్ రద్దు కాగానే రాఘవరెడ్డిని అదుపులోకి తీసుకోవటం ఏమిటని ప్రశ్నిస్తున్నాయి. మరి పులివెందుల పోలీసులు రాఘవరెడ్డిని అరెస్ట్ చేస్తారా లేదా.. విచారించి వదిలేస్తారా అనేది తెలియాల్సి ఉంది.