అమ్మాయిని వీడియో తీసిన యువకుడు.. చివరకు యువతిపైనా కేసు

విశాఖపట్నం జిల్లా గాజువాకలో ఓ అమ్మాయిని ఓ యువకుడు వీడియో తీశాడు. ఇది గమనించిన యువతి.. ఈ విషయాన్ని తన కుటుంబసభ్యులకు చేరవేసింది. దీంతో యువకుడిని ప్రశ్నించిన యువతి కుటుంబసభ్యులు. ఆవేశంలో అతనిపై చేయి చేసుకున్నారు. అనంతరం మీ తల్లిదండ్రులకు చెప్తామంటూ ఓ గదిలో బంధించారు. కానీ ఆ తర్వాత ఏం జరుగుతుందనేదీ వారు ఊహించలేకపోయారు. పక్కింటి అమ్మాయి వీడియో తీయటం ఆ యువకుడి పాలిట శాపమైతే అతన్ని బంధించడం ఆమె కుటుంబసభ్యులు జైలుకు వెళ్లటానికి కారణమవుతోంది.

గాజువాక పోలీసులు చెప్తున్న వివరాల ప్రకారం.. విజయనగరం జిల్లా ఫూల్‌బాగ్‌‌కు చెందిన భాస్కర్‌రావు అన యువకుడు ఫార్మాసిటీలో ఉద్యోగం చేస్తున్నారు. ఫార్మాసిటీలోని ఓ కంపెనీలో భాస్కరరావు ల్యాబ్‌ టెక్నీషియన్‌గా పని చేస్తున్నాడు. అయితే గాజువాక శ్రీనగర్‌ సమీపంలోని శ్రీరాంనగర్‌లో భాస్కరరావు అద్దె ఇంట్లో ఉంటున్నాడు. అయితే శనివారం ఉదయం భాస్కరరావు పక్కింటి యువతిని వీడియో తీసినట్లు తెలిసింది. ఈ విషయాన్ని గుర్తించిన యువతి కుటుంబ సభ్యులు భాస్కరరావు వద్దకు వచ్చి అతన్ని గట్టిగా నిలదీశారు. భాస్కరరావు సెల్ ఫోన్‍లోనివీడియోను డిలీట్‌ చేయించటమే కాకుండా అతనిపై చేయి చేసుకున్నారు.

నువ్వు చేసిన పనిని మీ అమ్మానాన్నకు చెప్తామంటూ బెదిరించారు. వాళ్లు వచ్చిన తర్వాత నీ సంగతి తేలుస్తామంటూ భాస్కర్‌రావును యువతి కుటుంబసభ్యులు ఓ ఇంట్లో బంధించారు. ఆ గది బయట తాళం వేసి.. భాస్కరరావు చేసి పనిని విజయనగరంలోని తల్లిదండ్రులకు తెలియజేశారు. అయితే భాస్కరరావు తల్లిదండ్రులు వచ్చి.. గది తలుపులు తెరిచి చూసేసరికి.. అతని విగతజీవుడై కనిపించాడు. గదిలోని సీలింగ్ ఫ్యాన్ రాడ్డుకు ఉరేసుకుని కనిపించాడు. దీంతో భాస్కరరావు తల్లిదండ్రులు కన్నీరుమున్నీరుగా విలపిస్తున్నారు. అయితే భాస్కరరావు ముఖంపై గాయాలున్నాయంటూ.. ఈ విషయాన్ని పోలీసులకు చేరవేశారు.

భాస్కరరావు తల్లిదండ్రుల ఫిర్యాదు మేరకు కేసు నమోదు చేసుకున్న పోలీసులు.. ఘటనాస్థలికి చేరుకుని అక్కడి పరిస్థితిని పరిశీలించారు. యువతి సహా ఆమె కుటుంబ సభ్యులు నలుగురిపై కేసు నమోదు చేశారు. వీరిని అదుపులోకి తీసుకుని.. ప్రశ్నిస్తున్నట్లు తెలిసింది. అయితే భాస్కరరావు ముఖంపై గాయాలున్నాయని తల్లిదండ్రులు ఆరోపిస్తున్నారు. తమ కొడుకును కొట్టి చంపేశారంటూ ఆరోపిస్తున్నారు.