రిజికా కాయిన్ కేసు,,,సోనుసూద్‌కు అరెస్ట్ వారెంట్

కనోరా కష్టకాలంలో అనేక మందికి ఆర్థిక సాయం చేసి రియల్ హీరో అనిపించుకున్న నటుడు సోనుసూద్‌కు లుథియానా కోర్టు అరెస్ట్ వారెంట్ జారీ చేసింది. రిజికా కాయిన్ మోసం కేసులో వాంగ్మూలం ఇవ్వడానికి రాకపోవడంతో నటుడిని వెంటనే అరెస్ట్ చేసి కోర్టులో హాజరు పరచాలని ముంబయిలోని ఓషివారా పోలీస్ స్టేషన్‌ ఆదేశాలు ఇచ్చింది. అసలీ రిజికా కాయిన్ కేసు ఏంటి, దానికి హీరో సోనుసూద్‌కు గల సంబంధం ఏమిటో మనం ఇప్పుడు తెలుసుకుందాం.

రిజికా కాయిన్ పేరుతో 10 లక్షల మోసం..!

పంజాబ్‌లోని లుథియానాకు చెందిన న్యాయవాది రాజేశ్ ఖన్నా తనను ఓ వ్యక్తి ఆర్థికంగా మోసం చేశాడంటూ ఇటీవలే కోర్టుకు వెళ్లారు. మోహిత్ శర్మ అనే వ్యక్తి రిజికా కాయిన్ పేరుతో తనతో 10 లక్షల రూపాయలు పెట్టుబడి పెట్టించాడని పేర్కొన్నారు. అయితే ఈ కేసులో సాక్ష్యంగా నటుడు సోనుసూద్ పేరును తెలిపారు. దీంతో విచారణ నిమిత్తం సోనుసూద్ కోర్టుకు హాజరు కావాలని కోర్టు తెలిపింది. కానీ నటుడు ఈ కేసులో వాంగ్మూలం ఇచ్చేందుకు హాజరు కాలేదు.

సాక్షిగా వాంగ్మూలం ఇచ్చేందుకు రాకపోవడంతోనే..

పలుమార్లు న్యాయస్థానం సమన్లు పంపినా సోనుసూద్ రాకపోవడంతో లుథియానా కోర్టు నేడు నాన్ బెయిలబుల్ అరెస్ట్ వారెంట్ జారీ చేసింది. ముంబయిలోని అందేరి వెస్ట్‌లో ఉన్న ఒషివారా పోలీస్ స్టేషన్‌కు ఆదేశాలు జారీ చేసింది. సోనుసూద్‌ను అరెస్ట్ చేసి కోర్టులో హాజరు పరచాలంటూ లుథియానా జ్యుడిషియల్ మేజిస్ట్రేట్ రమన్ ప్రీత్ కౌర్ ఉత్తర్వుల్లో పేర్కొన్నారు. అలాగే ఈ కేసును ఈనెల 10వ తేదీకి వాయిదా వేశారు.

నాకు ఈ కేసులో ఎలాంటి సంబంధమూ లేదు..: సోనుసూద్

అయితే ఈ కేసుపై స్పందించిన సోనుసూద్ షాకింగ్ కామెంట్లు చేశారు. మూడో పక్షానికి సంబంధించిన విషయంలో సాక్షిగా లుథియానా కోర్టు తనను పిలిచిందని.. పలుమార్లు సమన్లు కూడా పంపించిందని చెప్పారు. అలాగే తన తరఫు న్యాయవాదులు ఈ సమన్లపై స్పందించారని వివరించారు. ఫబ్రవరి 10వ తేదీన జరిగే విచారణలో పాల్గొన్ని తనకీ కేసుతో ఎలాంటి సంబంధం లేదని న్యాయస్థానంలో చెబుతానని వెల్లడించారు. ఆ తర్వాతే మీడియా వేదికగా ప్రకటన చేస్తానని కూడా పేర్కొన్నారు. కేవలం పాపులారిటీ కోసం పలువురు.. కావాలని సెలబ్రిటీల పేర్లను తెరపైకి తేవడం బాధాకరం అని సోనుసూద్ ఆవేదన వ్యక్తం చేశారు. దీనిపై కచ్చితంగా తాను చట్ట పరమైన చర్యలు తీసుకుంటానని వివరించారు. చూడాలి మరి ఏం జరగనుంది అనేది.