సునీతా విలియమ్స్ చిన్ననాటి కల .. ఏమవ్వాలనుకున్నారు?

9 నెలల పాటు అంతరిక్షంలోనే చిక్కుకుపోయిన భారత సంతతి వ్యోమగామి సునీతా విలియమ్స్ ఎట్టకేలకు భూమ్మీదకు చేరుకున్నారు. బుధవారం రోజు ఉదయం తెల్లవారుజామున 3.27 గంటలకు అమెరికాలోని ఫ్లోరిడా తీరంలో క్షేమంగా ల్యాండ్ అయ్యారు. మొత్తంగా 3 సార్లు అంతరిక్షంలోకి వెళ్లిన సునీతా విలియమ్స్‌కు సంబంధించిన అన్ని విషయాలను తెలుసుకునేందుకు ప్రజలు ఆసక్తి కనబరుస్తున్నారు. అయితే ఆమె డ్రీమ్ జాబ్ వ్యోమగామి కావడం కాదని తెలుసుకుని షాక్ అవుతున్నారు. మరి ఆమె ఏం కావాలని కలలు కన్నారో మనం ఇప్పుడు తెలుసుకుందాం.

సునీతా విలియమ్స్ పూర్వీకులది గుజరాత్‌లోని మోహసానా జిల్లా ఝాలాసన్. తండ్రి దీపక్ పాండ్యా న్యూరో అటానమిస్ట్ కాగా.. వృత్తిరీత్యా అమెరికాలో స్థిరపడ్డారు. ఈక్రమంలోనే అక్కడే బోనీ పాండ్యాతో ప్రేమలో పడి పెళ్లి చేసుకున్నారు. అయితే మూడో సంతానంగా సునీతా విలియమ్స్ పుట్టారు. సునీతా విద్యాభ్యాసం అంతా అమెరికాలోనే సాగింది. హైస్కూల్ పూర్తయ్యాక యునైటెడ్ నావల్ అకాడమీ నుంచి డిగ్రీ తీసుకున్నారు. అనంతరం అమెరికా నావికా దళంలో ఉద్యోగిగా చేరారు.

అయితే హైస్కూల్లో చదువుకునే రోజుల్లో సునీతా విలియమ్స్‌కు సైన్స్ పట్ల ఆసక్తి ఎక్కువగా ఉండడంతో.. వెటర్నరీ డాక్టర్ కావాలని కలలు కన్నారు. కానీ టామ్ క్రూజ్ చిత్రం టాప్ గన్ ప్రజాదారణతో అమెరికా నావల్ అకాడమీనీ సందర్శించారు. ఆ తర్వాతే ఆమె కెరియర్ మలుపు తిరిగింది. ముఖ్యంగా నావల్ అకాడమీ నుంచి విపరీతమైన ప్రేరణ పొందిన ఆమె.. నావల్ ఏవియేషన్ ట్రైనింగ్ కమాండ్‌లో చేరింది. కానీ యుద్ధ విమానాన్ని నడిపే అవకాశం మాత్రం రాలేదు.

1989లో సునీతా విలియమ్స్ నావికాదల విమాన చోదకురాలిగా మారారు. ముఖ్యంగా వర్జీనియాలోని నార్ఫోక్‌లోని హెలికాప్టర్ కంబాట్ సపోర్ట్ స్క్వాడ్రన్ 8కి నియమించబడ్డారు. అదే సమయంలో మధ్యధరా, ఎర్ర సముద్రం, పెర్షియన్, గల్ఫ్ దేశాలకు దళాలను రవాణా చేయడంలో, మానవతా సహాయం అందించడంలో కీలక పాత్ర పోషించారు. బలమైన నాయకత్వం, తీవ్రమైన పరిస్థితుల్లోనే వేగంగా పుంజుకునే సామర్థ్యం ప్రదర్శించడంతో.. మరింత పేరు వచ్చింది.

ఆ తర్వాతే సునీతా విలియమ్స్‌ను నాసా వ్యోమగామిగా ఎంపిక చేసింది. 1998లో అంతరిక్ష యానంలో శిక్షణ తీసుకున్న ఈమె.. 2006 డిసెంబర్‌లో తొలిసారి స్పేస్‌లోకి వెళ్లారు. జూన్ 2007 వరకు అక్కడే ఉండగా.. రెండోసారి 2017లో నాలుగు నెలల పాటు అంతరిక్ష కేంద్రంలో గడిపారు. మూడోసారి ఏకంగా 286 రోజులు అక్కడే ఉండాల్సి వచ్చింది.